Read KIMERU BIBLE PROTESTANT EDITION Luk 19 Bible Online

Luk 19 - KIMERU BIBLE PROTESTANT EDITION bible

Luk 19

¹Jesû nî eetîre na mbere na aratonya Jeriko. Ntûûreene îû,

²nî kwaarî na muntû ûmwe weetagwa Zakayo. Zakayo aarî mûnene wa aritithia ûgoti na aarî gîtonga.

³Nî aageragia kwona Jesû, îndî nîûntû aarî ûmûkûî atîngîûûmba kûmwona nîûntû bwa antû kwingîa.

⁴Tontû bûû, aroogîa mbere yaawe na araitia mûkûûne jûrîa jwaarî akuî na arîa Jesû aakûrûkîrîîte, nîkenda amwona.

⁵Jesû agûkinya antû au, araraithîîria îgûrû na aramwîta, “Zakayo kinya nthî na mpwîî, nîûntû nkaa mûgeni waaku.”

⁶Tontû bûû, arakinya nthî na mpwîî na aragwata Jesû ûgeni kwaawe agwîrîtue.

⁷Rîrîa antû bonthe boonere ûu baranung'una bakiugaga, “Akûgwatwa ûgeni nî muntû mwîyia.”

⁸Zakayo ararûngama na areera Mwathani, “Nkagaîra nkîa nusu ya into biaakwa, na nkëethîrwa ntûnyîte muntû kinya ûrîkû gantû, nkamûcokeria karî maita jana.”

⁹Jesû arauga, “Naarua wonokio bûgûkinya nyomba îîjî, tontû kinya ûûjû nî ûmwe wa nchiarwa cia Abrahamu.

¹⁰ Nîkwîthîrwa Mûtaana wa Muntû eejîre gûcwaa na kwonokia barîa baûrîte.”

¹¹ Bathikîîrîte Jesû o ûu, arabaa ngerekano nîûntû nî aarî agûkinya akuî na Jerusalemu na nîûntû antû nî baathûgaanagia atî Ûnene bwa Mûrungu bûkeeja o ntûti.

¹²Tontû bûû, Jesû arauga, “Îgiiteene rîmwe nî kwaarî na muntû ûmwe waarî na îgweta rîrînene. Nî aithuranîîre gwîta rûgendo nthîgûrû ya kûraaja nîkenda aeethua mûnene wa nthîgûrû îîu na nyumeene acoke.

¹³Mbere ya eeta, nî eetîre nthûûmba ciaawe îkûmi na aranenkera o nthûûmba mbeecha ing'anene na cia nthûûmba ingî. Arabeera atîrî, ‘Îteeni bûkathûkûme nacio mwanka rîrîa ngacoka.’

¹⁴Îndî antû ba kuuma kwaao batamwendeete na baratûmana kûu eetîte bakiugaga, ‘Tûtîkwenda muntû ûu atûtongeeria kaîrî.’

¹⁵“Rîrîa muntû ûu aacokere akûthiria kûjûkia ûnene, nî eerîre nthûûmba irîa aanenkerete mbeecha ciîte kîrî we nîkenda bamwîra mpongeeri ya mbeecha irîa aabanenkerete baaritithia ngûgî.

¹⁶Nthûûmba îrîa yeetîre îrî mbere îramwîra, ‘Mûnene, mbeecha irîa waanenkeere nî iciaranîte maita îkûmi.’

¹⁷Nawe aramîîra, ‘Nî bwega mono, ûrî nthûûmba înjega! Tontû nî weete mwîtîkua kûmenyeera into biniini mono, nandî ngûkwethia mûtongeeria wa ntûûra îkûmi.’

¹⁸Nthûûmba ya ijîîrî nayo îreeta îrauga, ‘Mûnene, mbeecha irîa waanenkeere nî iciaranîte maita jataano.’

¹⁹Nawe aramîîra, ‘Naagwe ûkaa mûtongeeria wa ntûûra ithaano.’

²⁰Rîu nthûûmba îngî îreeta îrauga, ‘Mûnene, ka mbeecha irîa waanenkeere, ntwîre ncikûûnjîte na gîtambaa,

²¹ngîgûkîraga nîûntû ûrî muntû ûmûûmo. Ûjûkagia birîa bitî biaaku na ûgakeetha birîa ûtîaandîte.’

²²Nawe aramîîra, ‘Ndîkûgiitîra îgamba ngîtumagîra nteto irîa waarîa na kanyua gaaku. Gwe nthûûmba îmbîî! Nî waijî atî ndî muntû ûmûûmo, ûjûkagia birîa bitî biaawe na agakeetha arîa ntîaandîte.

²³Nîmbi îndî yaagirîrie wîîka mbeecha ciaakwa banki nîkenda rîrîa nkeeja ncijûkia amwe na maciara jaacio?’

²⁴Rîu areera barîa baarûngi au, ‘Mûtûnyeeni mbeecha îîu arî nacio na bûnenkere ûrîa ûciarithanîtie ciaawe maita îkûmi.’

²⁵Nabo baramwîra, ‘Mûnene, anga ciaawe itîciaranîte maita îkûmi!’

²⁶ Nawe arabeera, ‘Ndîbwîra atîrî, muntû ûrîa ûrî nabio, akeewa bingî bibingî nkûrûki. Ningî Ûrîa ûtî nabio agatunywa kinya bibikai birîa arî nabio.

²⁷Îndî reeteni anthû bau baakwa bateendaga mbîja kûbatongeeria aja na bûboorage nkîonaga.’”

²⁸Jesû akûthiria kuuga mantû jau aragwata rûgeendo rwa gwîta Jerusalemu arî mbere ya antû bangî.

²⁹Rîrîa aakinyîre kîrîmeene kîa Mîzeituni, akuî na ntûûra ya Bethifage na ya Bethania, aratûma aritwa baawe baîrî,

³⁰na arabeera, “Îteeni ntûûreene îîrîa îrî mbere yeenu. Bwakûrûka ku bûkoona gatigiri katheeki. Thaûreeni gatigiri kau gataakamata muntû noo ûrîkû na bûkareete.

³¹Muntû akëeja kûbûûria, ‘Nîkî bûgûkathaûra?’ Buuge ûjû, ‘Mwathani arî na ngûgî nako.’”

³²Rîu bareeta na bareethîra gûkari o ta ûrîa aabeerîte.

³³Rîrîa baathaûraga gatigiri, eene ko barabooria, “Nîkî bûkûthaûra gatigiri?”

³⁴Nabo barabeera, “Mwathani arî na ngûgî nako.”

³⁵Aritwa baawe baragaikia kîrî Jesû na baraara nguû ciaao mûgongo jwaako na baraitithia Jesû.

³⁶Jesû nî eetîre akamati nîko na antû nî baaraga nguû ciaao njîreene.

³⁷Rîrîa akinyîîre kîrîmeene kîa Mîzeituni, aritwa baawe babaingî baraambîrîria gûkumia Mûrungu na tûjû tûtûnene bagwîrîtue nîûntû bwa biama birîa baarî bakwona,

³⁸ bakiugaga, “Nî atharimi Mûnene ûrîa wîjîte riîtweene rîa Mwathani! Thîîrî îrokara îgûrû na ûkumio kîrî Mûrungu!”

³⁹Afarisayo bamwe barîa baarî ntunduune baramwîra, “Mwathani, îîra aritwa baaku bakire.”

⁴⁰Nawe arabacokeria, “Ndîbwîra atî, kinya baba bagakira, maiga jaja jaambîria kwaria na kajû gakanene.”

⁴¹Rîrîa aakinyîre akuî na ntûûra, nî aamîtegere na ararîra akiugaga,

⁴²“Wûûi këethîra bwamenya mantû jarîa jathithîka naarua gûkagîa thîîrî! Îndî nandî nî jaithi bûtîkajamenye.

⁴³Nîkwîthîrwa îgiita rîgaakinya rîrîa anthû baaku bagagûcîgîria nteere cionthe,

⁴⁴na bagakobora ntûûra na bathirie antû barîa barî ku. Gûtî muntû kinya ûmwe ûgatigara nîûntû bûtamenyere rîrîa Mûrungu aabûriûngîîre.”

⁴⁵Rîu Jesû arakûrûka kîûrûûne na araambîrîria kwînga barîa beendagîria into ku,

⁴⁶ akîberaga, “Nî kwaandîki ‘Nyomba yaakwa îkaa nyomba ya kûrombagîra,’ îndî buî nî bûmîethetie gîkurungu kîa atûnyani.”

⁴⁷ Jesû nî aaritanaga kîûrûûne ntukû cionthe. Athînjîri mûrungu barîa anene na aritani ba Waatho na atongeeria barîa anene ba kîrîndî nî beendaga kûmûûraga,

⁴⁸îndî baraaga ûrîa barîngîthithia nîûntû antû bonthe nî baamûthikîîrîte bwega bakîenda kwigua jonthe jarîa augaga.