Read KIMERU BIBLE PROTESTANT EDITION Luk 2 Bible Online

Luk 2 - KIMERU BIBLE PROTESTANT EDITION bible

Luk 2

¹Îgiiteene rîu mûnene wa nthîgûrû irîa ciaathagwa nî Aroma, tawe Kaisarî Agustû nî aaritîre Waatho atî antû bonthe barîa baarî waathaniine bwaawe batarwe.

²Gûtarwa kûû kwa mbere kwathithîrue rîrîa Kuirinû aarî mûrûngamîîri wa Sîria.

³Antû bonthe nî beetîre ntûûreene ciaao gûtarîrwa ku.

⁴Tontû bûû, Josefu nî aumîre ntûûreene ya Nazarethi îrîa yaarî Galili na areeta ntûûreene ya Daudi îrîa yeetagwa Bethlehemu kûu Judea, nîûntû aarî wa rûrîîjo rwa Daudi.

⁵Nî eetîre gûtarwa arî na Maria, ûrîa agûraga. Îgiiteene rîu Marîa nî aarî ûmûrito.

⁶Barî kûu, îgiita rîa Maria rîa kuurûka rîrakinya.

⁷Nî aaciarîre rikithathi ya kaîjî, na arakaoga na itambaa, na arakamamia rûkongoroone rûrîa ng'ombe ciarîjagîra nîûntû gûtaarî na antû a gûkara mîkaweene.

⁸Gûntû kûu nî kwaarî na arîîthi bûûrîîne ûtukû baakarîtie ndîîthia ciaao.

⁹Mûraîka wa Mwathani nî abaumîîre na mwago jwa Mwathani jûrabathaarîra nteere cionthe na baraigua ûguaa bûbwingî.

¹⁰Mûraîka arabeera, “Bûgákîra! Mbûreterete Nteto Injega irîa igatûma antû bonthe bagwîrua.

¹¹Tontû naarua kûu ntûûreene ya Daudi nî bûciarîri Mwonokia, tawe Kristû Mwathani.

¹²Rûrû nîru rûkaa rwano kîrî buî: bûkeethîra kaana gakûnji na itambaa na kamamîtue rûkongoroone.”

¹³Kagiiteene o kau kongwa mûraîka ûu amwe na njûûrî ya araîka bangî ba îgûrû barakumia Mûrungu bakiugaga,

¹⁴“Ûkumio kîrî Mûrungu Ûrîa Ûrî îgûrû mono, na thîîrî nthîgûrûûne kîrî antû barîa agwîragua nîbo!”

¹⁵Rîrîa araîka babatigîre na baraitia îgûrû, arîîthi nî beeranîre atîrî, “Twîteni Bethlehemu, tûkoone ûntû bûu bûthithîkîte, bûrîa Mwathani atûmenyithia.”

¹⁶Tontû bûû, bareeta na mpwîî, na bareethîra Maria na Josefu na gakeenke karîa kaamami rûkongoroone.

¹⁷Arîîthi bagûkoona, nî baaberîre ûrîa baarî bakwîrwa nî mûraîka bwegiî kaana kau.

¹⁸Antû bonthe barîa baigîrue mantû jarîa arîîthi baugaga nî baarigarîre mono.

¹⁹Îndî Maria ka eekîre mantû jau jonthe nkoroone akîjathûgaanagîria mono.

²⁰Arîîthi nî baanîre bagîkumagia na gûkaatha Mûrungu nîûntû bwa mantû jonthe jarîa baarî bakwigua na bakwona, o ta ûrîa baarî bakwîrwa.

²¹ Ntukû ya inyanya kuuma agûciarwa, kaana nî gaatanîrwe na kareetwa Jesû, riîtwa o rîrîa kaaei nî mûraîka mbere ya kinya ng'ina agîa îu.

²² Îgiita rîa Josefu na Maria kwitheria rîgûkinya, o ta ûrîa Waatho bwa Musa bwaugîîte, nî baikîrie kaana Jerusalemu nîkenda bakanenkanîra kîrî Mwathani,

²³ o ta ûrîa kwaandîki waathoone bwa Mwathani: “O rikithathi ya antû na ya nyomoo cionthe rikanenkanîrwa kîrî Mwathani.”

²⁴Ningî Waatho bwa Mwathani buugîîte kûritagwe kîgongwana kîa “Nkûngûthikû ijîîrî kana tûjea twîrî.”

²⁵Îgiiteene rîu nî kwaarî muntû weetagwa Simioni kûu Jerusalemu. Aarî muntû ûmwagîru na waakîraga Mûrungu na nî aatûûraga eteerete rîrîa antû ba Israeli bakoonokua. Roho Ûmûtheru nî aarî ndeene yaawe.

²⁶Nî aaguûrîri nî Roho Ûmûtheru atî atîkua mbere ya oona Kristû ûrîa Mwathani eeranîrîte.

²⁷Roho Ûmûtheru nî amûtongererie areeta kîûrûûne. Rîu aciari ba Jesû barakûrûka barî na Jesû nîkenda boojûria ûrîa Waatho bwa Musa bwaugaga.

²⁸Simioni aranenkerwa kaana kau geetagwa Jesû na arakagwata na aracokeria Mûrungu nkaatho akiugaga,

²⁹“Nandî Mwathani nîûntû ûkûûjûria wîrane bwaaku, reka nthûûmba yaaku îkue îrî na thîîrî,

³⁰Nîkwîthîrwa nkwona wonokio bwaaku,

³¹bûrîa gwe ûthuranîîrîte bûkûûjîîrwa nî antû bonthe.

³² Aa weerû bwa kûguûrîra antû barîa batî Ayahudi ûrîa weendaga, na nîkenda antû baaku ba Israeli boona ûkumio.”

³³Îthe na ng'ina nî baarigarîre mono bakwigua nteto irîa Simioni augaga ciegiî kaana kau.

³⁴Simioni arabatharima na areera Maria, ng'ina wa Jesû, “Kaana gaka gagatûma antû babaingî ba Israeli bathirue na bangî babaingî boonokue. Akeethîrwa arî rwano rûrîa rûgatûma antû babaingî baaria mantû jatîbuui,

³⁵nîkenda mathûgaanio jaao joonekana ûrîa jakari. Kinya gwe ûrûrû bûkari ta bwa muntû ûmuunti na rûchiû rûkamûnta nkoro yaaku.”

³⁶Nî kwaarî na mwekûrû waarî kîroria weetagwa Ana. Aarî mwarî wa Fanueli, wa kuuma mwîrîgeene jwa Asheri. Akûgûrwa, baakarîre na mûkûrû waawe mîaka mûgwanja rîu mûkûrû arakua.

³⁷Nî aatûûrîre arî ntigwa mwanka arakinyia mîaka mîrongo înaana na îna. Gûtî rîo auma kîûrûûne; aatûûraga ku akîthaathagia Mûrungu, agîciataga biakûrîa na akîrombaga ûtukû na mûthenya.

³⁸Îgiita rîu Jesû aarî akûreetwa kîûrûûne nîrîo Ana aakinyîre na aracokeria Mûrungu nkaatho na areera antû bonthe, barîa beetereete kwona Jerusalemu îkîonokua, mantû jegiî kaana kau.

³⁹ Rîrîa Josefu na Maria boojûrîrie jarîa jonthe Waatho bwaugaga jathithue, nî baacokere ntûûreene yaao Nazarethi îrîa yaarî Galili.

⁴⁰Mwana ûu nî aakûrîre bwega na aragea inya na ûûme bûbwingî na Mûrungu nî aagwîragua nîwe.

⁴¹ Aciari ba Jesû nî beetaga Jerusalemu kîathoone kîa Pasaka o mwaka o mwaka.

⁴²O ta ûrîa kwaarî wîthîre, rîrîa Jesû aakinyîrie mîaka îkûmi na îîrî, aciari baawe nî beetanîrie nawe Jerusalemu.

⁴³Thigûûnkû îkûthira, aciari ba Jesû nî baagwatîre rûgendo rwa gûcoka îndî Jesû aratigwa Jerusalemu. Aciari baawe batamenyaga atî agûtigwa.

⁴⁴Nî beetîre rûgendo rwa ntukû îmwe bakîthûgaanagia atî Jesû arî kîrî barîa baananîtie nabo. Îndî nî baambîrîrie kûmûcwaa kîrî antû ba ndûgû ciaao na acoore baao.

⁴⁵Bakûmwaga, baracoka Jerusalemu bakîmûcwaga.

⁴⁶Nyuma ya ntukû ithatû baramwîthîra kîûrûûne akari nthî amwe na aritani ba Waatho, abathikîîrîte na akîbooragia biûria.

⁴⁷Bonthe barîa baamwigagua nî baarigaragua mono nî ûûme bûrîa aarî nabu agîcokia biûria.

⁴⁸Rîrîa aciari baawe baamwonere nî baarigarîre mono na ng'ina aramûûria atîrî, “Mwana waakwa, nîkî ûtûmîte twathangîka ûjû? Abaagu naani tûramakîte mono tûgîgûcwaa.”

⁴⁹Jesû arabacokeria, “Nîmbi îratûmîte bûncwaa? Ka bûtîramenyaga nî mbuîri kwîthîrwa ndî nyomba ya Baaba?”

⁵⁰Îndî bataciûrîre nteto iu Jesû aabeerîre.

⁵¹Rîu Jesû araanania nabo mwanka Nazarethi na arakara akîbaathîkagîra. Ng'ina nî aakarîre akîthûgaanagîria mantû jau jonthe.

⁵² Jesû areeta na mbere akîûmîaga, na agîkûraga bwega, na akîgwîragia Mûrungu na antû.