Read KIMERU BIBLE PROTESTANT EDITION Luk 20 Bible Online

Luk 20 - KIMERU BIBLE PROTESTANT EDITION bible

Luk 20

¹Ntukû îmwe Jesû arî kîûrûûne nî aaritanaga antû na gûtûmîîria Nteto Injega. Athînjîri-Mûrungu barîa anene na aritani ba Waatho amwe na akûrû atongeeria nî bairitîre na baramûûria atîrî,

²“Twîre kûrîa ûritîte waatho bwa kûthithia mantû jaja na nûû ûkûeete Waatho bûbû?”

³Nawe arabacokeria, “Kinya ni nkabûûria kîûria. Û mbîreeni,

⁴nîkû Johana aaritîre waatho bwa kûbatithania? Nî kuuma kîrî Mûrungu kana nî kuuma kîrî antû?”

⁵Nabo baraaranîria bongwa bakiugaga, “Twamwîra ‘bwaumîte kîrî Mûrungu’ agatûûria, ‘Nîmbi yaagirîrie bûmwîtîkia?’

⁶Ningî twamwîra, ‘Bwaumîre kîrî antû,’ antû bonthe bagatûringa na maiga, nîûntû nî baijî bwega atî Johana aarî kîroria.”

⁷Tontû bûû, baramûcokeria barauga, “Tûtiijî kûrîa bwaumîre.”

⁸Nawe Jesû arabeera, “Kinya ni ntîbwîra nî Waatho bûrîkû ntumagîra kûthithia mantû jaja.”

⁹ Jesû nî aeere antû ngerekano îîjî: “Kûrî muntû ûmwe waarî na muunda jwa mîzabibû. Arajûkomborithia antû na areeta arakara nthîgûrû îngî îgiita rîrîraaja.

¹⁰Îgiita rîa gûketha rîakinya aratûma nthûûmba kîrî bau baakomborete muunda nîkenda bamûnenkera maketha jarîa jaarî ja mwene muunda. Îndî baraûûra nthûûmba îîu na baramîînga îtî na gantû.

¹¹Tontû bûû, aratûma nthûûmba îngî. Kinya yo baramîûûra, na baramîthithîria mantû jamathûûku, na baramîînga îtî na gantû.

¹²Ningî aratûma nthûûmba ya ithatû. Kinya yo baramîîkîra ngûma na baramîgera oome ya muunda.

¹³Rîu mwene muunda jwa mîzabibû arauga, ‘Nîatîa nkathithia? Ngaatûma mûtaana waakwa ûrîa mpendeete nîûntû bûomba kûmûgwatîra nthoni.’

¹⁴Îndî rîrîa antû bau baamwonere bareerana, ‘Ûjû nîwe mûrîaûkua. Tûmûûrageeni, nîkenda muunda jûjû jwaa jweetû.’

¹⁵Tontû bûû, baramuumagaria oome ya muunda jûu jwa mîzabibû na baramûûraga.” Jesû arooria, “Bûrîthûgaania nîatîa mwene muunda jûjû akathithia antû bau akomborithîtie muunda?

¹⁶Ka akeeja oorage antû bau na akomborithie antû bangî muunda jwaawe.” Rîrîa antû baigîrue ûu barauga, “Mûrungu nî ateethie ûntû bûu bûtîgakarîke.”

¹⁷ Îndî Jesû arabaraithîîria na arabooria, “Nî bwijî gîtûmi kîa maandîko jaja jaandîki atî: ‘Iiga rîrîa rîaregerwe nî aaki, nîrîo rîongwa rîeete rîa koona!’

¹⁸“Muntû ûrîa ûkarîgwîra akaunîkanga, îndî muntû ûrîa rîkagwîra rîkamûthia aee mûtu.”

¹⁹Aritani ba Waatho na athînjîri-Mûrungu barîa anene nî baagererie kûmûgwata îgiita o rîu rîongwa nîûntû nî baamenyere atî aaragia mantû jabeegiî rîrîa aabaeere ngerekano îîu. Îndî batamûgwatîre nîûntû nî baakîraga antû.

²⁰Tontû bûû, nî baacwîre kaanya ka kûmûgwata na baratûma antû barîa baacieethetie atî nî babeega nîkenda boona ûntû bwa kûmûthitangîra kuumania na rwaria rwaawe. Bageragia kûgwata Jesû nîkenda bamûnenkanîra kîrî mûrûngamîîri ûrîa waatûmi nî thirikarî ya Roma kwatha nthîgûrû îîu.

²¹Antû bau baatûmi baramûûria, “Mûritani, nî twijî atî mantû jarîa waragia na kinya jarîa ûritanaga nî ja mma buru. Ningî gwe ûtîkîraga muntû kinya ûrîkû rîrîa ûkwaria, îndî ûritanaga ûrîa Mûrungu endega muntû atûûra.

²²Û twîre këethîra Waatho nî bûgwîtîkîîria tûritaga ûgoti kîrî Kaisarî kana arî?”

²³Îndî Jesû araciûra atî nî mûtego baamwîkîîrîte na arabeera,

²⁴“Mbonieni mbeecha. Bakûmwonia arabooria, Ûthiû bûbû na maandîko jaja nî jaaû?” Nabo baramwîra, “Nî ja Kaisarî.”

²⁵Jesû arabeera, “Nenkagîreeni Kaisarî birîa birî biaawe, na bûritagîre Mûrungu birîa birî biaawe.”

²⁶Bakûremwa kûmûgwata na ûntû bûbûthûûku mbere ya antû, baarakira ki, barigarîtue nî ûrîa aabacokerie.

²⁷ Asadûkayo bamwe barîa baugaga atî antû baakuû batîriûkaga nî beetîre kîrî Jesû na baramwîra,

²⁸ “Mûritani, Musa aatwandîkîîre atî muntû akëeja gûkua na agatiga mwekûrû atî na twaana, no mwanka mûtaana wa ng'ina wa muntû ûu, agûre mwekûrû ûu nîkenda agaciarîra mûtaana wa ng'ina twaana.

²⁹Nandî rî, nî kwaarî na ataana mûgwanja ba muntû ûmwe. Mûtaana wa mbere nî aagûrîre mwekûrû îndî arakua aratiga mwekûrû atî na twaana.

³⁰Mûtaana wa baîrî nî aagûrîre mwekûrû ûu îndî kinya we arakua aramûtiga atî na twaana.

³¹Kinya wa bathatû mwanka wa mûgwanja nî baamûgûrîre îndî bonthe barakua baramûtiga atî na twaana.

³²Mûthieene kinya mwekûrû ûu nî aakuîre.

³³Tontû ataana bau mûgwanja bonthe nî baamûgûrîte rî, rîrîa akuû bakariûka, mûka ûu akeethîrwa arî mwekûrû waaû?”

³⁴Jesû arabeera, “Antû ba îgiita rîrî nî bagûranaga na bakagûrwa,

³⁵Îndî arûme na aka barîa Mûrungu akoona kwagîrîte abariûkie kuuma kîrî akuû, batîgûrana kana bagûrwa.

³⁶Nîkwîthîrwa batîkorokua nîûntû bakeethîrwa bakari ta araîka. Antû bau bakeethîrwa barî ataana ba Mûrungu nîûntû nî bariûkîte kuuma kîrî akuû.

³⁷ Musa nî augîîte bwega mantû jegiî kûriûka, rîrîa aragia mantû jegiî kîthaka kîrîa gîakanaga, na arauga Mwathani nî, ‘Mûrungu wa Abrahamu, na Mûrungu wa Isaaka na Mûrungu wa Jakubu.’

³⁸We tî Mûrungu wa barîa bakuîte îndî nî Mûrungu wa barîa barî mwoyo. Nîkwîthîrwa nîwe ûtûmîte beethîrwa barî mwoyo.”

³⁹Bamwe ba Aritani ba Waatho baramûcokeria, “Mûritani, ûkwaria bwega.”

⁴⁰Tontû bûû, gûtî muntû woomîrîîrie kûmûûria biûria bingî.

⁴¹Jesû arabooria, “Nîkî antû baugaga atî Kristû nî mûtaana wa Daudi?

⁴² Daudi wengwa nî augîîte Yukuune rîa Zaburi atî: ‘Mwathani nî eerîre Mwathani waakwa, kara nthî, rûteere rwa njara yaakwa ya ûrîo,

⁴³mwanka rîrîa nkaethia anthû baaku, gîkinyithio kîa magûrû jaaku.’

⁴⁴“Këethîra Daudi aamwîtîre ‘Mwathani’ rî, nîatîa oomba kwîthîrwa arî mûtaana waawe?”

⁴⁵Jesû nî eerîre aritwa baawe, antû bonthe bakiigagua,

⁴⁶“Imenyereeni aritani ba Waatho. Beetaga beekîrîte ndwambambio indaaja na beendaga gûkeethagua barî thokoone. Ningî beendaga gûkarîra itî birîa biega buru iromberoone na kweejagwa gîtîîo biathoone.

⁴⁷Baaîîragia ntigwa na bagacituunya into biaao na bakaromba maromba jamaraaja nîkenda boonwa nî antû. Bagaakanûkua nkûrûki ya antû bangî bonthe.”