Read KIMERU BIBLE PROTESTANT EDITION Luk 21 Bible Online

Luk 21 - KIMERU BIBLE PROTESTANT EDITION bible

Luk 21

¹Jesû nî aaraithîrîrie na aroona ûrîa itonga biaritaga biewa biaao kîûrûûne.

²Nî oonere ntigwa îmwe yaarî nkîa îkîrita ciringi ijîîrî.

³Rîu arauga “Ndîbwîra na mma atî, ntigwa îîjî nkîa îkûrita mbeecha inyingî nkûrûki ya bangî bonthe barîa barita mbeecha ciaao.

⁴Nîkwîthîrwa bau bangî bonthe barita îmwe kuuma kîrî irîa nyingî barî nacio, îndî ntigwa îîjî, kinya këethîra nî nkîa, îkûrita mbeecha cionthe irîa îgûkarî nacio.”

⁵Aritwa bamwe ba Jesû nî baambîrîrie kwaria bakiugaga ûrîa kîûrû kîagemetue na maiga ja goro na biewa birîa Mûrungu aaritagîrwa. Nawe Jesû arauga,

⁶“Îgiita nî rîîjîte rîrîa maiga jaja jonthe bûkwona jakamomorwa, kwage iiga rîa gûtigwa îgûrû rîa rîngî.”

⁷Aritwa baawe baramûûria, “Mûritani, nîrî mantû jaja jagakarîka? Nîmbi îgaatwonia atî mantû jaja jarî akuî gûkarîka?”

⁸Nawe arabeera, “Imenyagîîreni bûtîkeeje kwaîrua nîûntû antû babaingî bakeeja bakigwetaga riîtwa rîaakwa bakiugaga, nîbo Kristû na bakiugaga îgiita rîgûkinya. Îndî bûkábathingata.

⁹Bûgákîra rîrîa bûkaigua gûkîrûûwa na bwaigua thirikarî ikîgarûrwa. Nîkwîthîrwa no mwanka mantû jau jambe jakarîke, îndî mûthiro jwa nthîgûrû jûtîrakinya.”

¹⁰Rîu arabeera, “Mûgongo jûkarwaa na jûngî, na nthîgûrû îrwee na îngî.

¹¹Gûkeethîrwa kûrî na kwinaina gûkûnene kwa nthîgûrû na gûntû gûkwingî kwîthîrwe kûrî na mpara na mîrimo îmîî na mantû jakûmakania. Ningî gûkeethîrwa kûrî na ndwano inene kuuma îgûrû.

¹²Îndî mbere ya mantû jau jonthe jathithîka, bakabûgwata na babûthangîkie. Ningî bakabwikia iromberoone bûgambîthue na bûgerwe ncheera. Bûgaikua mbere ya anene na mûrûngamîîri ba nthîgûrû nîûntû bwa riîtwa rîaakwa.

¹³Rîu nîrîo rîkeethîrwa rîrî îgiita rîrîega rîa kwaa akûûjî baakwa.

¹⁴ Tontû bûû, bûkáinogia mathûgaanio kana bwithangîkia bûkîûragia ûrîa bûkabeera bakîbûgambithia

¹⁵nîûntû nkabwaa jarîa bûkabeera na ûûme. Gûtî mûnthû weenu ûkoomba kûregana na jarîa bûkauga kana ajakararia.

¹⁶Bûgakûnyanîrwa nî aciari beenu, na ataana ba nyakwe na antû ba ndûgû cieenu na acoore, kîrî anene na bamwe beenu bakooragwa.

¹⁷Bûkathûûrwa nî antû bonthe nîûntû bwa riîtwa rîaakwa.

¹⁸Îndî gûtî kinya rûchiûri kinya rûmwe rwa mûtwe jweenu rûkaûra.

¹⁹Kûûmîria kweenu gûgatûma bwoone ûtûûro bwa kenya na kenya.

²⁰“Rîrîa bûkoona ntûûra ya Jerusalemu îcîgîîrîîtue nî njûûrî cia asikarî, bûmenye îgiita rîa kûmomorwa kwa ntûûra îîu rîrî akuî gûkinya.

²¹Îgiita rîu barîa bakeethîrwa barî Judea nî bamatûke irîmeene, na barîa bakeethîrwa barî ntûûreene nî baumagare oome ya ntûûra. Ningî barîa bakeethîrwa barî miuundeene, bagákûrûka ntûûreene.

²² Nîkwîthîrwa iu ikeethîrwa irî ntukû cia îkanûkia nîkenda jarîa jaandîki jakoojûra.

²³“Wûûi kîrî barîa bakeethîrwa barî na îu kana barî na tûkenke tûgwonka! Nîkwîthîrwa mîthangîko îkoojûra nthîgûrû na mûthûûro jwa Mûrungu jûkinyîre antû baba bonthe.

²⁴Bamwe bakooragwa na nchiû na bangî bagatawa baikue ithamîrioone nthîgûrû ingî. Antû batî Ayahudi bakainyîîria antû ba Jerusalemu mwanka rîrîa îgiita rîa kwaathana rîa antû bau rîkaathira.”

²⁵ “Mantû ja kûmakania jakooneka jakiuma riûeene na mweriine na kinya kuuma kîrî njota. Antû ba kuuma mîgongo yonthe bakaaga wîrîgîîro na baigue ûguaa nîûntû bwa kûruruma kwa mîgombe ya îria.

²⁶Antû bakagirîka nî ûguaa bagîkîraga mantû jarîa bakwona jeejîîrîte nthîgûrû. Nîkwîthîrwa mainya ja îgûrû jakainainua kuuma kûrîa jakaraga.

²⁷ Nyuma ya jau nîrîo bûkoona Mûtaana wa Muntû eejîte arî îtuune arî na inya na mwago jûmûnene.

²⁸Rîrîa bûkoona mantû jau jaambîrîria gûkarîka, gîeni na ûchamba nîûntû gûkûûrwa kweenu kûrî akuî.”

²⁹Rîu Jesû arabeera ngerekano îîjî: “Tegeeni mûkûû, na bûtege mîtî ingî yonthe.

³⁰Rîrîa bwonaga îkîtheûka, nî bûmenyaga îgiita rîa ngai rîrî akuî.

³¹O ûu kinya buî, rîrîa bûkoona mantû jau jonthe jagîkarîka, bûmenye atî Ûnene bwa Mûrungu bûrî akuî.”

³²Ndîbwîra na mma atî nthukî îîjî îtîthira, mantû jaja jonthe jatîrakarîka.

³³Îgûrû na nthî bikathira, îndî nteto ciaakwa itîthira.

³⁴Ningî Jesû arabeera, “Kareeni bwithuranîrîte na bwimenyere bûtîkeeje kwîthîrwa ngûgî yeenu nî kûrîa na kûnyua na kûmakîra mantû ja ûtûûro bûbû. Bwathithia ûu Ntukû îîu îkabûkirimania bûtithûranîrîte.

³⁵Nîkwîthîrwa Ntukû îîu îgaakinya rîrîa antû bonthe barîa batwîre nthîgûrû batîkûmenya.

³⁶Îmenyereeni magiita jonthe bûtîkûthithia mantû jamaaî, bûkîrombaga Mûrungu abwee inya ya kûûmîîria mantû jaja jonthe jagîkarîka. Ningî bûrombe nîkenda bûûmba gwîtîkîrîka nî Mûtaana wa Muntû.”

³⁷Jesû aakaraga akîritanaga kîûrûûne mûthenya na gwatuka ageeta kûraara kîrîmeene kîa Mîzeituni.

³⁸O rûûkîrî kainda antû bonthe nî beetaga kîûrûûne kûthikîîria akîritana.