Read KIMERU BIBLE PROTESTANT EDITION Luk 22 Bible Online

Luk 22 - KIMERU BIBLE PROTESTANT EDITION bible

Luk 22

¹Mambura ja mîgaate îrîa îtiimbithîtue, kîrîa gîtagwa Pasaka, nî kîaarî akuî gûkinya.

²Athînjîri-Mûrungu barîa anene na aritani ba Waatho nî baacwaga ûrîa bakooraga Jesû na witho nîûntû nî baakîraga antû.

³Rîu Nkoma arakûrûka ndeene ya Judasi ûrîa weetagwa Iskarioti, ûmwe wa aritwa barîa îkûmi na baîrî.

⁴Nî eetîre na araaranîria na athînjîri-Mûrungu barîa anene na asikarî barîa baakaragia kîûrû, ûrîa akabateetheeria kûgwata Jesû.

⁵Nabo nî baagwîrîrue na baramwîra bakamwaa mbeecha.

⁶Tontû bûû, nî eetîkîrîrie na araambîrîria gûcwaa kaanya ka kûmûkunyanîra antû batîkûmenya.

⁷Ntukû ya mambura ja mîgaate îrîa îtiimbîthîtue nî yakinyîre. Ntukû îîu nîyo gatûrûme karîa kaarîjagwa kîathoone gîa pasaka kaathînjagwa.

⁸Tontû bûû, Jesû aratûma Peterû na Johana arabeera, “Îteeni bûgatûthuranîrîre biakûrîa bia Pasaka nîkenda twîja kûrîa.”

⁹Nabo baramûûria, “Nîkû ûkwenda twîta kûmîthuranîra?”

¹⁰Arabeera atîrî, “Bûgîkûrûka ntûûreene, bûgacemania na muntû ûkamatîte mûtûngi jwa rûûjî. Mûthingateeni mwanka nyomba îrîa agakûrûka.

¹¹Bwakûrûka ku bwîre mwene nyomba, ‘Mûritani arîkwîra mwee nyomba yaaku ya ageni nîkenda we na aritwa baawe barîîra biakûrîa bia Pasaka ku.’

¹²Nawe akabwonia nyomba înene îrî ngorobeene na îrî na gûntû gwa kûrîra. Kûu nîku bûkathuranîra biakûrîa.”

¹³Bareeta na bareethîra gûkari o ta ûrîa aabeerîte na barathuranîra biakûrîa bia Pasaka.

¹⁴Thaa cia kûrîa igûkinya, Jesû nî aakarîre nthî amwe na atûmwa baawe na bararîa biakûrîa.

¹⁵Nawe arabeera, “Nî ndîrairiragîîria mono kûrîjanîra biakûrîa bia Pasaka naabuî mbere ya nthangîkua.

¹⁶Ndîbwîra na mma atî, ntîrîa biakûrîa bia Pasaka kaîrî mwanka rîrîa gîtûmi kîa kîatho gîkî gîkamenyekana Ûneneene bwa Mûrungu bweja.”

¹⁷Rîu Jesû arajûkia gîkombe, na aracokeria Mûrungu nkaatho na arauga, “Jûkieni gîkombe gîkî na bûnyûe.

¹⁸Ndîbwîra na mma atî kuuma nandî ntînyua ndibei kaîrî mwanka rîrîa Ûnene bwa Mûrungu bûkeeja.”

¹⁹Rîu arajûkia mûgaate na athiria gûcokeria Mûrungu nkaatho, arajûng'enyûranga na arabanenkera akiugaga, [“Jûjû nî mwîrî jwaakwa jûrîa jûnenkanîri nîûntû bweenu. Thithagieni ûjû bûkîndirikanaga.”

²⁰O ûu bakûthiria kûrîa arabanenkera gîkombe akiugaga, “Gîkombe gîkî nî kîrîkanîro gîkîerû kîrîa kîrikithîtue na tharike yaakwa îrîa îgwîtûûrwa nîûntû bweenu.][3]

²¹Îndî menyeni atî ûrîa ûgankunyanîra nî akûrîa amwe naani.

²²Nîkwîthîrwa Mûtaana wa Muntû agakua o ta ûrîa Mûrungu abangîte, îndî wûûi kîrî muntû ûrîa ûkamûkunyanîra!”

²³Rîu baraambîrîria kûûrania bongwa ûrîa kîrî bo ûkathithia ûntû bûu.

²⁴ Aritwa ba Jesû nî baakararanîrie bongwa bakîûranagia nî ûrîkû waao wonagwa arî ûmûnene kîrî bangî.

²⁵ Jesû arabeera, “Anene ba antû barîa batî Ayahudi baathaga antû bakîbainyagîîria na anene baciîtaga aguna-antû.

²⁶ Îndî buî bûgákara tabo. Ûrîa mûnene gatîgatîîne keenu, nî akare ta ûrîa mûnini buru kîrî bangî, na mûtongeeria eethîrwe akari ta ûrîa ûtumîkagîra bangî.

²⁷ Bûriuga nî ûrîkû mûnene kîrî ûngî: nî ûrîa ûkûreterwa biakûrîa kana nî ûrîa ûkûreeta biakûrîa? Gûtî nkaanja nî ûrîa ûkûreeterwa biakûrîa. Îndî ni ndî kîrî buî nkari ta ûrîa ûbûtumîkagîra.

²⁸“Buî nî bûkaranîtie naani îgiita rîonthe rîrîa nkûgerua.

²⁹Nkabûnenkera ûnene o ta ûrîa Baaba aanenkeere bu.

³⁰ Bûkarîjaga na bûnyunyage amwe naanî bûrî ûneneene bwaakwa bûkarîre itî bia ûnene na bûgambithie mîîrîga îkûmi na îîrî ya Israeli.”

³¹Jesû nî eerîre Peterû atîrî, “Simioni, Simioni, Nkoma nî arombete rûûtha rwa gûkûûnga ta nkano.

³²Îndî nî nkûrombereete nîkenda wîtîkio bwaaku bûtîkathire. Rîrîa ûgacoka kîrî ni wîîkîre aritwa bangî inya.”

³³Peterû aramûcokeria, “Mwathani, nî ncieejanîte gwikua ncheera amwe naagwe na kinya kûûragwa naagwe.”

³⁴Jesû aramwîra, “Ndîkwîra atîrî Peterû, ûtukû bwa naarua, mbere ya nchamba ya ngûkû îgamba, ûkeethîrwa ûnkaanîte maita jathatû.”

³⁵ Rîu Jesû arooria aritwa atîrî, “Rîrîa ndaabûtûmîre bwîta bûtî na kîbeeti kîa mbeecha kana kîondo kana iraatû rî, kûrî gîntû bwaagîre?” Nabo barauga, “Arî, gûtîkîo.”

³⁶Îndî Jesû arabeera, “Nandî ûrîa ûrî na kîbeeti kîa mbeecha kana kîondo nî ajûkie. Ûrîa ûtî na rûchiû nî eendie nguû yaawe arûgûre.

³⁷ Ndîbwîra atî jarîa jaandîki jambegiî atî, ‘Nî aagiitîîrwe îgamba ta ûmwe wa antû babaaî,’ noo mwanka joojûre.”

³⁸Aritwa baawe barauga, “Raithîria! Mwathani! Tûrî na nchiû ijîîrî.” Nawe arabeera, “Nîu ni.”

³⁹Jesû nî aumîre ntûûreene na areeta kîrîmeene kîa Mîzeituni, o ta ûrîa aamenyeretie. Aritwa baawe nabo nî baamûthingatîre.

⁴⁰Rîrîa aakinyîre kîrîmeene arabeera, “Rombeeni nîkenda bûtîkaagwe magerioone.”

⁴¹Arabatiga na areeta gataaria, antû arîa muntû arîngîgeera iiga rîgakinya na araturia maru na araromba akiugaga,

⁴²“Itû Baaba, mpebeeria gîkombe gîkî kîa mîthangîko. Amwe na bûu ûkáthithia ûrîa nkwenda îndî ka bûrîa ûkwenda bûthithîke.” [

⁴³Mûraîka kuuma îgûrû areeta kîrî we na aramwîkîra inya.

⁴⁴Nî aarombere nkûrûki arî na ûrûrû bûbwingî akiumaga rûûya rûkari ta ntata cia tharike.][4]

⁴⁵Akûthiria kûromba areeta kîrî aritwa baawe na areethîra bamami nîûntû nî baanogeetue nî kwithikîîra.

⁴⁶Rîu arabeera, “Nîkî bûmami? Ûkîîreeni na bûrombe bûtîkagwe magerioone.”

⁴⁷O rîu akîaragia, antû babaingî batongeeretue nî Judasi, ûmwe wa aritwa barîa îkûmi na baîrî barakinya. Judasi areeta akuî na Jesû nîkenda amûcûnca.

⁴⁸Îndî Jesû aramûûria, “Judasi, ka ûgûkunyanîra Mûtaana wa Muntû ûkîmûcûncaga ta mûcoore?”

⁴⁹Rîrîa aritwa boonere ûrîa kwaarî akuî gûkarîka, barooria, “Mwathani, tûbatemange na nchiû?”

⁵⁰Ûmwe waao aragiita gûtû kwa ûrîo kwa nthûûmba ya mûthînjîri-Mûrungu ûrîa mûnene.

⁵¹Îndî Jesû arauga, “Ûkáthithia ûû kaîrî.” Jesû araringithia gûtû kwa muntû ûu na kûrabua.

⁵²Rîu Jesû areera athînjîri-Mûrungu barîa anene na asikarî barîa baakaragia kîûrû na akûrû atongeeria barîa beetîte kûmûgwata atîrî, “Ka bwîjîte na nchiû na nchûgûma teeka bwîjîte kûgwata mwamba?

⁵³ Rîrîa ndîratindaga naabuî kîûrûûne ntukû cionthe bûtîrangwataga. Îndî gaka nî kagiita keenu, na ka inya ya muundu kwaathana.”

⁵⁴Rîu baragwata Jesû na baramwikia mwanka nyomba ya mûthînjîri-Mûrungu ûrîa mûnene. Nawe Peterû aramûthingata arî gataaria.

⁵⁵Rîrîa antû baakîrie mwanki oome ya nyomba ya mûthînjîri-Mûrungu ûrîa mûnene, Peterû nî aakarîre nthî amwe nabo.

⁵⁶Rîu mwarî ûmwe waarî nthûûmba akwona Peterû akari nthî akuî na mwanki, aramûtega bwega na arauga, “Muntû ûjû nî mûthingati wa Jesû.”

⁵⁷Îndî Peterû arakaana akiugaga, “Wee! Mûka! Ntîmwijî.”

⁵⁸Nyuma ya kagiita gagakai muntû ûngî aroona Peterû na arauga, “Kinya gwe ûrî ûmwe waao.” Îndî Peterû aracokia, “Mûrûme! Arî! Ntî ûmwe waabo.”

⁵⁹Ningî nyuma ya û îthaa rîmwe rîkûthira muntû ûngî araaria arikithîtie arauga, “Gûtî nkaanja muntû ûûjû no mwanka eethîrwe arî mûthingati wa Jesû nîûntû aumîte Galili.”

⁶⁰Îndî Peterû arauga, “Mûrûme, ntiijî ûrîa ûkuuga.” O rîu akîaragia, nchamba ya ngûkû îragamba.

⁶¹Nawe Mwathani araciûgûra na araraithîîria Peterû. Peterû araririkana nteto irîa Mwathani amwîrîte atî, “Ûtukû bûbû, mbere ya nchamba ya ngûkû îgamba, ûgankaana maita jathatû.”

⁶²Peterû arauma au na ararîra mono.

⁶³Antû barîa baagwete Jesû nî bamûthekeere na kûmûûra.

⁶⁴Ningî nî baamwogere meetho na baramwîra, “Roria na ûtwîre nûû wakûringa?”

⁶⁵Nabo baramûmeneeria bakîmûrumangaga irumi bibingî.

⁶⁶Rûkîîrî gwakea, kîama kîa akûrû barîa atongeeria na athînjîri-Mûrungu barîa anene na aritani ba Waatho kîratirimana, na Jesû araikua kîrî bo.

⁶⁷Nabo baramwîra, “Twîre Këethîra nîgwe Kristû.” Îndî arabeera, “Kinya nkabwîra bûtîmbîtîkia.

⁶⁸Ningî kinya ndabûûria kîûria, bûtîncokeria kana bûndekeeria.

⁶⁹Îndî kuuma nandî Mûtaana wa Muntû akethagîrwa akari nthî rûteere rwa njara ya ûrîo ya Mweneinya Mûrungu.”

⁷⁰Antû bonthe barauga, “Ka ûrî Mûtaana wa Mûrungu?” Nawe arabacokeria, “Bûkuuga ndî we.”

⁷¹Nabo barauga, “Gûtî ûkûûjî bûngî tûkwenda nkûrûki ya bûu. Tuî twingwa tûkwigua ûrîa auga.”