Read KIMERU BIBLE PROTESTANT EDITION Luk 23 Bible Online

Luk 23 - KIMERU BIBLE PROTESTANT EDITION bible

Luk 23

¹Rîu antû bau bonthe baraikia Jesû kîrî Pilatû.

²Baraambîrîria kûmûthitanga bakiugaga, “Nî tûrethîre muntû ûûjû akîremagia antû ba mûgongo jweetû, na agîkanagia antû kûritîra Kaisarî ûgoti, na agiciîtaga Kristû, mûnene.”

³Pilatû aramûûria, “Gwe nîgwe mûnene wa Ayahudi?” Jesû aramûcokeria, “Nîgwe ûkuuga u.”

⁴Pilatû areera athînjîri-Mûrungu barîa anene amwe na ntundu atîrî, “Gûtî ûthûûku nkwona muntû ûûjû athithîtie.”

⁵Îndî bo baraciûmia kûmwîra, “Ûritani bwaawe nî bûtûmîte antû barega kwathîka Galili yonthe. Aambîrîrie Galili na rîu akwîja mwanka gûkû.”

⁶Rîrîa Pilatû aigîrue ûu, nî oorîrie këethîra muntû ûû aarî wa kuuma Galili.

⁷Rîrîa aigîrue atî nî wa kuuma Galili, kûrîa Herode aathaga, arauga aikue kîrî Herode, ûrîa waarî Jerusalemu îgiiteene rîu.

⁸Rîrîa Herode oonere Jesû, nî aagwîrîrue mono nîkwîthîrwa nî airîragîria kûmwona mono. Nî aarî akwigua mantû jegiî Jesû na nî eerîgagîîra kwona akîringa kîama noo kîmwe.

⁹Tontû bûû, Herode arooria Jesû biûria bibingî îgiita rîrîraaja, îndî Jesû ataacokia kîûria kinya kîmwe.

¹⁰Athînjîri-Mûrungu barîa anene na aritani ba Waatho barairita kwîra Herode mantû jamathûûku mono jegiî Jesû.

¹¹Herode na asikarî baawe baramûcikûûra na baramûmeneeria. Rîu Herode aramwîkîra nguû înthongi ya ûnene na arauga aikue kîrî Pilatû.

¹²Herode na Pilatû baatwîre barî anthû îndî kuuma ntukû îîu baratuma ûcoore.

¹³Pilatû nî eetîre athînjîri-Mûrungu barîa anene na athani na antû

¹⁴na arabeera, “Bûraretere muntû ûûjû bûkiugaga atî nî atûmîte antû barega kwathîka, na ndîgûcûnkûûna bwega gûtî ûntû kinya bûmwe bwa bûrîa bûramûthitangîrîte ndîramûgwata nabu.

¹⁵Kinya Herode, gûtî maatia aramûgwatîre najo, nîkîo gîtumîte amûcokia kîrî tuî. Gûtî ûntû athithîtie bûûmba gûtûma ooragwa.

¹⁶Tontû bûû, ndiuga aûûrwe ibooko rîu arekeerue.” [

¹⁷O îgiita rîa kîatho kîa Pasaka, Pilatû nî aathaûraga muntû ûrîa antû baaugaga bathaûrîrwe.][5]

¹⁸Kîrîndî kîonthe nî kîaringîre gîtuma gîkiugaga, “Nî oragwe! Tûthaûrîre Baraba!”

¹⁹Baraba aingîri ncheera nîûntû bwa gûtûma antû ba ntûûra barega kwathîka na nîûntû bwa kûûraga muntû.

²⁰Pilatû nî eerencere antû kaîrî akîendaga kûrekeeria Jesû.

²¹Îndî bararinga gîtuma bakiugaga, “Mwambithie! Mwambithie!”

²²Pilatû nî oorîrie antû rîa jathatû atîrî, “Nî maatia jarîkû muntû ûûjû athithîtie? Ntîkwona arî na maatia joomba gûtûma ooragwa. Tontû bûû, ndiuga aûûrwe ibooko rîu arekeerue.”

²³Îndî bararinga gîtuma mono bakiugaga no mwanka aambwe. Tontû bûû, Pilatû arabaathîkîra na

²⁴aragiita îgamba kûthithue ûrîa beendaga.

²⁵Arathaûra muntû ûu baugîre bathaûrîrwe, ûrîa waingîri nîûntû bwa gûtûma antû barega kwathîka na nîûntû bwa kûûraga muntû. Îndî aranenkanîra Jesû kîrî bo beeta kûmûthithîria ûrîa bakenda.

²⁶Rîrîa beetîte kûmwamba, nî baatirimanîre na Simioni wa kuuma Kurene aumîte muundeene na baramûgwata baramûkamatithia mûtharaba arî nyuma ya Jesû.

²⁷Antû babaingî barathingata Jesû. Bamwe baarî aka barîa baithikîrîte bakîrîraga nîûntû bwaawe.

²⁸Jesû araciûgûra na arabeera, “Eekûrû ba Jerusalemu, bûkárîra nîûntû bwaakwa, îndî rîreeni nîûntû bweenu na bwa aana beenu.

²⁹Nîkwîthîrwa îgiita nî rîîjîte rîrîa antû bakaugaga, ‘Kîtharimo nî kîrî aka barîa nthata na barîa batoonkia mwana!’

³⁰ Rîu bakaambîria kwîra irîma, ‘Tûkuûkîreeni,’ na beere tûrîma, ‘Tûriindeni.’

³¹Tontû këethîra nî bakûthangîkia muntû ûmwagîru ûjû rî, bakathangîkia antû barîa batî babaagîru atîa?”

³²Nî kwaarî atuunyani baîrî beetîte kûûragwa amwe na Jesû.

³³Rîrîa baakinyîre antû arîa eetagwa Gûntû kwa mûrûitû jwa kîongo, barabaamba o. Ûmwe rûteere rwaawe rwa ûrîo rwa Jesû na ûngî rûteere rwa ûmotho.

³⁴ Jesû arauga, “Baaba, barekere, nîûntû batîkûmenya ûrîa bakûthithia.” Rîu bararinga kuura nîkenda boona barîa bakagaana nguû ciaawe.

³⁵ Antû nî baarûngi akuî bategeete ûrîa gwakarîkaga rîrîa atongeeria ba Ayahudi bamûthekagîra bakiugaga, “Nî aroonokagia bangî, rîu nî acionokie këethîra nîwe Kristû, ûrîa Mûrungu athuurîte.”

³⁶ Kinya asikarî bareeta kûmûcikûûra, na baramûnenkera ndibei îrî na nchechû anyua, bakiugaga,

³⁷“Këethîra gwe nîgwe mûnene wa Ayahudi, cionokie.”

³⁸Îgûrû rîa kîongo kîaawe nî kwaandîki nteto iji: ÛÛJÛ NÎWE MÛNENE WA AYAHUDI.

³⁹Ûmwe wa atuunyani barîa baambanîrue nawe aramûruma akiugaga, “Anga gwe tîgwe Kristû? Cionokie na ûtwonokie kinya tuî!”

⁴⁰Îndî ûu ûngî aramûgondokera akiugaga, “Ka ûtîgûkîra Mûrungu? Gwe waatuîrîrwe îgamba o ta ûrîa aatuîrîrwe.

⁴¹Tuî nî tûbuîrîte gûkanûkua nîûntû bwa mantû jamaaî jarîa tûthithîtie. Îndî muntû ûûjû gûtî ûthûûku athithîtie.”

⁴²Rîu areera Jesû, “Ûndirikane, rîrîa ûgakinya ûneneene bwaaku.”

⁴³Jesû aramwîra, “Ka ngûkwîra na mma atî naarua ûkeethîrwa ûrî amwe naani îgûrû kwa Baaba.”

⁴⁴Thaa thita igûkinya, riûa nî rîatigîre kwara na kûragea muundu nthîgûrû yonthe mwanka thaa kenda.

⁴⁵ Gîtambaa kîrîa kîagitanîtie kîûrû kîratambûkîra gatîgatî biraa biîrî.

⁴⁶ Jesû arakaya na kajû gakanene arauga, “Baaba, nkûnenkanîra mwoyo jwaakwa kîrî gwe!” Akûthiria kuuga ûu, arakua.

⁴⁷Mûnene wa asikarî akwona ûrîa gwakarîkîre, nî aakumîrie Mûrungu akiugaga, “Gûtî nkaanja muntû ûûjû araarî muntû ûmwagîru!”

⁴⁸Antû bonthe barîa boothûranîte au bakwona ûrîa gwakarîkîre, baraana bakîringaringaga ibara biaao baithikîrîte.

⁴⁹ Eekûrû barîa baathingatîte Jesû kuuma Galili na antû bonthe barîa baamwijî, nî baarûngi gataaria bategeete ûrîa gûkûthithîka.

⁵⁰Nî kwaarî na muntû weetagwa Josefu wa kuuma ntûûreene îmwe ya Ayahudi yeetagwa Arimathea. Josefu aarî muntû ûmwagîru na aarî ûmwe wa kîama kîa atongeeria ba Ayahudi.

⁵¹Kinya këethîra aarî ûmwe wa kîama kîa atongeeria ba Ayahudi, ataagwatanîîre na ûrîa kîama kîu gîatuîre bwegiî Jesû. We nî eeteerete rîrîa Ûnene bwa Mûrungu bûkeeja.

⁵²Josefu nî eetîre kîrî Pilatû aramûromba rûûtha rwa kûthika mwîrî jwa Jesû.

⁵³Rîu arajûkia mwîrî jûu na arajûkûnja na chuka înjerû, na arajwîka kaburiine keenji iigeene. Gûtî muntû waarî akûthikwa kaburiine kau.

⁵⁴Îîu yaarî ntukû ya kwithuranîra nîûntû rûûnene kwaarî sabatû.

⁵⁵Eekûrû barîa beejanîtie na Jesû kuuma Galili barathingata Josefu mwanka baratiga boona kaburi karîa eekîre mwîrî jwa Jesû.

⁵⁶ Rîu baraana kûthuranîra maguta na marashi ja gwaka mwîrî jwaawe. Nî baanogokere ntukû ya sabatû o ta ûrîa Waatho bwaugaga.