Read KIMERU BIBLE PROTESTANT EDITION Luk 24 Bible Online

Luk 24 - KIMERU BIBLE PROTESTANT EDITION bible

Luk 24

¹Ntukû ya mbere ya kiumia rûûkîrî kainda eekûrû barîa nî baajûkîrie maguta ja marashi bareeta kaburiine.

²Bagûkinya, nî beethîîre iiga riingiritîtue rîrauma mûromoone jwa kaburi.

³Rîrîa baakûrûkîre kaburiine, bateethîre mwîrî jwa Mwathani Jesû ku.

⁴O barigarîtue nî mantû jau, o ntûti baroona antû baîrî barî rûteere rwaao beekîrîte nguû igûkengakenga.

⁵Nî baamakîre mono na bareenamîîra baratirithia moothiû jaao nthî. Antû bau nabo barabeera, “Nîkî bûgûcwaa muntû ûrî mwoyo kîrî barîa akuû?

⁶ Atî aja, nî ariûkîre. Ririkaneni nî aabwîrîre mbere ya auma Galili atî,

⁷‘Mûtaana wa Muntû no mwanka anenkanîrwe kîrî antû babaaî bamwambe, na ntukû ya ithatû ariûke.’”

⁸Rîu eekûrû bararirikana ûrîa aabeerîre,

⁹na barauma kaburiine, bareeta kwîra aritwa barîa îkûmi na ûmwe na kinya antû bangî jonthe jarîa baarî bakwîrwa.

¹⁰Eekûrû bau beetîre kwîra atûmwa ûrîa mantû jaakari baarî: Maria Magidalina na Joanina na Maria ng'ina wa Jakubu na eekûrû bangî barîa baathingataga Jesû.

¹¹Îndî atûmwa bateetîkîrie nîûntû nteto iu ciaakari ta rûûo.

¹²Îndî Peterû arookîîra na aroogîa kaburiine, arakuamîîra ndeene na aroona itambaa bibierû birîa aaogi nabio. Akwona ûu aracoka arigarîtue nî mantû jarîa jaakarîkîte.

¹³Ntukû o îîu athingati baîrî ba Jesû nî beetîte ntûûreene yeetagwa Emaûsi, îrîa yaarî kilomita îkûmi kuuma Jerusalemu.

¹⁴Beetîte nî beeranaga mantû jonthe jarîa jaarî jakûthithîka.

¹⁵O bakîaragia mantû jau, Jesû wengwa arabagwatagwata na areetania nabo.

¹⁶Nî baamwonaga îndî bataamûmenyaga.

¹⁷Nawe arabooria, “Nî nteto îrîkû iji nkwigua bûkîaria?” Nabo bararûngama ki; moothiû jaao jakîonanagia barî na kîeba.

¹⁸Rîu ûmwe waabo ûrîa weetwagwa Kileopasi aramûûria, “Ka ûrî mûgeni wenka Jerusalemu? Ka ûtiijî mantû jarîa jarathithîkîre gûkû ntukû inkai ithiri?”

¹⁹Nawe arabooria, “Mantû mabi?” Nabo baramwîra, “Nî mantû jegiî Jesû wa Nazarethi, ûrîa ûrarî kîroria. Mantû jarîa arathithagia na ûritani bwaawe bûraarî na inya înene kuuma kîrî Mûrungu na bûraringithagia antû bonthe.

²⁰Athînjîri-Mûrungu barîa anene na athani nî baramûtwîrîre kûûragwa na aambwa mûtharabeene.

²¹Îndî tuî tûreerîgîîrîte atî nîwe ûgaakûûra antû ba Israeli! Ningî amwe na bûu naarua nî ntukû ya ithatû kuuma mantû jau jakûthithîka.

²²Eekûrû bamwe ba gîkundi gîeetû bagûtûrigaria mono. Barookere kaburiine kainda mono,

²³na bakwîthîra mwîrî jwaawe jûtî ku, bacooka kîrî tuî baatwîra atî baakwona kîoneki kîa araîka barîa baamenyithîrîe Jesû nî ariûkîte.

²⁴Bamwe beetû bagwîta kaburiine nî beethîîre mantû jakari o ûrîa eekûrû bakuugîîte. Îndî batîmwonere.”

²⁵Rîu Jesû arabeera, “Îbuî biaa, nîatîa bûûmîtie biongo bieenu, bwarega gwîtîkia mantû jarîa iroria biaugîre!

²⁶Ka bûtîraagîrîte Kristû athaangîkua ûu arathangîkîrue na nyumeene akûrûka mwagoone jwaawe?”

²⁷Rîu arabaataûrîra jonthe jarîa jamwegiî kwambîrîria na jarîa jaandîki nî Musa mwanka jarîa jaandîki nî iroria bionthe.

²⁸Bagûkinya ntûûreene îrîa beetîte, Jesû araambîria gûkûrûka ta muntû weetîte na mbere na rûgendo rwaawe.

²⁹Îndî baramûkinyîîria bakiugaga, “Itû rarîîra gweetû, nîûntû kûrî akuî gûtuka na gûkwambîrîria kûgîa muundu.” Tontû bûû, arakûrûka ntûûreene îîu gûkara nabo.

³⁰Rîrîa baakarîre nthî kûrîa biakûrîa, Jesû arajûkia mûgaate na arajûtharima, na arajûng'enyûranga na arabanenkera.

³¹Rîu meetho jaao jarakara ta jaamincûka na baramûmenya. Îndî ararima batîmwoone kaîrî.

³²Aritwa bau baraambîrîria kwîrana, “Nkoro cieetû itîkûgwîragua mono rîrîa agûtûtaûragîra Maandîko tûrî njîreene?”

³³Barookîîra o thaa iu, na baracoka Jerusalemu. Bagûkinya bareethîra aritwa barîa îkûmi na ûmwe amwe na antû bangî barîa baarî amwe nabo bothûranîte

³⁴bakiugaga, “Nî mma Mwathani nî ariûkîte, na agûcionania kîrî Simioni.”

³⁵Rîu athingati bau bobaîrî barabamenyîthia mantû jarîa boonete njîreene na ûrîa baamenyere Jesû rîrîa aabang'enyûrangîîre mûgaate.

³⁶Athingati bau baîrî bakîbeeraga mantû jau, Jesû wengwa arabaumîîra ntûti na ararûngama gatîgatîîne kaao arabeera, “Thîîrî îrokara naabuî.”

³⁷Îndî baramaka na baragwatwa nî ûguaa bûbwingî bakîthûgaanagia atî nî roho bakwona.

³⁸Îndî we arabeera, “Nîkî gîgûtûma bûmaka ûu na bûgia nkaanja nkoroone cieenu?

³⁹Tegeeni njara na magûrû jaakwa bwoone nî ni. Ntongeeni bwigue nî ni, nîûntû roho îtî nyama na mîrûitû ta ûrîa bûkwona ndî na jo.”

⁴⁰Nyuma ya kuuga ûu araboonia njara na magûrû.

⁴¹Nî baarigarîre mono bagwîrîtue îndî bararemwa kûmwîtîkia. O rîo nîrîo Jesû aaboorîrie, “Kûrî biakûrîa bûrî nabio aja?”

⁴²Baramûnenkera gîchûnchî kîa gîkûyû kîrugi.

⁴³Arajûkia na ararîa bonthe bategeete.

⁴⁴Rîu arabeera, “Jaja nîjo mantû jarîa ndaabwîrîre rîrîa ndaarî naabuî atî, mantû jonthe jarîa jambegiî na jaandîki Waathoone bwa Musa na jarîa jaaroretue nî iroria na kinya jarîa jarî kîrî Zaburi, no mwanka joojûre.”

⁴⁵Rîu arabaa ûûme bwa kûmenya ûrîa Maandîko jaugaga.

⁴⁶Jesû arabeera atîrî, “Ûjû nîu kwaandîki mantû jegiî Kristû. Akathaangîkua, na ntukû ya ithatû ariûke kuuma kîrî akuû.

⁴⁷Riîtweene rîaawe, antû bagatûmîîrua bairire nîkenda barekerwa meeyia kwambîrîria Jerusalemu mwanka nthîgûrûûne yonthe.

⁴⁸Naabuî bûrî akûûjî ba mantû jaja.

⁴⁹ Nkaabûtûmîra kîrîa Baaba augîre akabûtûmîra. Îndî eteereni bûrî ntûûreene îîjî mwanka rîrîa bûkoojûrwa nî inya yuumîte îgûrû.”

⁵⁰ Rîu arabatongeria bareeta mwanka Bethania. Arookîîria njara ciaawe îgûrû na arabatharima.

⁵¹O akîbatharimaga araitithua îgûrû na arabatiga.

⁵²Nabo baramûthaathayia na nyumeene baracoka Jerusalemu bagwîrîtue mono na

⁵³baraambîrîria gûkara kîûrûûne magiita jonthe bagîkumagia Mûrungu.