Read KIMERU BIBLE PROTESTANT EDITION Luk 3 Bible Online

Luk 3 - KIMERU BIBLE PROTESTANT EDITION bible

Luk 3

¹Kûrî mwakeene jwa îkûmi na îtaano Kaisarî Tiberio akîathanaga; na Pontio Pilatû aarî mûrûngamîîri wa Judea; na Herode aarî mwathi wa Galili; na mûtaana wa ng'ina arî mwathi wa Iturea na Trakoniti; na Lusania arî mwathi wa Abilini;

²Anasi na Kaifa barî athînjîri-Mûrungu barîa anene, nîrîo Mûrungu aarîrie Johana mûtaana wa Zekaria arî rwanda.

³Johana nî eetîre agîtûmagîîria nthîgûrû irîa ciaarî akuî na mûuro jwa Jorodani, akîîraga antû bairire na babatithue nîkenda barekerwa meeyia jaao.

⁴ O ta ûrîa kwandîkîtwe yukuune rîa Kîroria Isaya; “Kajû gakwigîîgua rwanda gakiugaga: ‘Thuranîreni njîra nîûntû bwa Mwathani, erekanieni tûjîra twaawe.

⁵Mîguuru yonthe îkariindwa, na tûrîma na irîma bithetherwe bing'ananîrue, na njîra irîa irî na ithioro cierekanue, na tûjîra tûrîa tûtîng'ananîrîtie, tûng'ananîrue.

⁶Antû bonthe bakoona wonokio bwa Mûrungu.’”

⁷ Antû babaingî nî beetîre kîrî Johana bakîendaga ababatithia na arabeera, “Îbuî rûciara rwa njoka! Nûû ûbwîrîte bûmatuke îkanûkia rîrîa rîîjîte?

⁸ Onanieni na mathithio jeenu atî nî bwirirîte buru. Bûkambîrîrieni gûciîra, ‘Tuî tûrî nchiarwa cia Abrahamu.’ Nîkwîthîrwa ndîbwîra na mma atî Mûrungu oomba kweethia maiga jaja nchiarwa cia Abrahamu.

⁹ Îndî nandî choka nî yûkîrîtue îrîka mîtî kuuma mîriine. O mûtî jûrîa jûtîciara maciara jameega jûgatemwa jûgerwe mwankiine.”

¹⁰Antû bau baramûûria, “Tûkathithia atîa îndî?”

¹¹Nawe arabacokeria, “Ûrîa ûrî na nguû ijîîrî nî agaîre ûrîa ûtî nayo, na ûrîa ûrî na biakûrîa nî arûmie ûrîa ûtî nabio.”

¹² Kinya aritithia ûgoti nî beetîre kûbatithua na baramûûria, “Mûritani, tuî tûkathithia atîa?”

¹³Nawe arabacokeria, “Bûgéetia ûgoti bûbwingî nkûrûki ya ûrîa bûtuîri.”

¹⁴Kinya asikarî baramûûria, “A tuî tûkathithia atîa?” Nawe arabeera, “Bûgátuunya muntû kinya ûrîkû gîntû kîaawe kana bûandîîra muntû mantû jatîo. Ningî ng'anagîrweni nî mûchaara jweenu.”

¹⁵Antû barambîrîria kûgîa na wîrîgîîro bûbwingî na barathûgaania atî Johana oomba kwîthîrwa nîwe Kristû.

¹⁶Johana areera antû bonthe atîrî, “Ndîbûbatithia na rûûjî, îndî ûrîa wîjîte, arî na inya nkûrûki yaakwa. Ni ntîagîrîte gûkundûra mîrigi ya îratû biaawe. Ûû nîwe ûkabûbatithia na Roho Ûmûtheru na mwanki.

¹⁷Nî agwete gîtaarû kîaawe nîkenda eera nkano irîa irî îtîriine rîaawe. Ageeka nkano nchukuune yaawe, îndî agaakîîria maûngo na mwanki jûrîa jûtîûmba kwoora.”

¹⁸Johana nî aaritanîre antû agîtumagîra mooritani mwanya mwanya na aratûmîîria Nteto Injega akîîraga antû bagarûre mîîtîre yaao.

¹⁹ Johana nî eerîre Herode ûrîa waarî mûnene atî aatabuîri kûjûkia Herodia, mûka wa mûtaana wa ng'ina aa mwekûrû waawe. Ningî nî aamwîrîre maatia jangî jamaingî jarîa aathithîtie.

²⁰Rîu Herode arathithia îatia rîrînene nkûrûki ya jangî, narîo nî kûingîra Johana ncheera.

²¹Rîrîa antû bonthe baathirîrie kûbatithua, Jesû kinya we nî aabatithîrue. Akîrombaga, îgûrû rîrarugûka,

²² na Roho Ûmûtheru akari ta kîjea areenama kîrî we. Kajû karaigîîgua kuuma îgûrû gakiugaga, “Gwe nîgwe Mûtaana waakwa ûrîa mpendeete. Nîngwîragua mono nîgwe.”

²³Jesû aambîrîrie gûtûmîîria aarî na ûkûrû bwa mîaka mîrongo îthatû. Antû baathûgaanagia atî aarî mûtaana wa Josefu ûrîa waarî mûtaana wa Heli.

²⁴Heli aarî mûtaana wa Mathati, na Mathati aarî mûtaana wa Lawi, na Lawi aarî mûtaana wa Meliki, na Meliki aarî mûtaana wa Janai, na Janai aarî mûtaana wa Josefu.

²⁵Josefu aarî mûtaana wa Matathia, na Matathia aarî mûtaana wa Amosi, na Amosi aarî mûtaana wa Nahumu, na Nahumu aarî mûtaana wa Esili, na Esili aarî mûtaana wa Nagai.

²⁶Nagai aarî mûtaana wa Maathi, na Maathi aarî mûtaana wa Matathia, na Matathia aarî mûtaana wa Semeini, na Semeini aarî mûtaana wa Joseki, na Joseki aarî mûtaana wa Juda.

²⁷Juda aarî mûtaana wa Joanani, na Joanani aarî mûtaana wa Resa, na Resa aarî mûtaana wa Zerubabeli, na Zerubabeli aarî mûtaana wa Shealitieli na Shealitieli aarî mûtaana wa Neri.

²⁸Neri aarî mûtaana wa Meliki, na Meliki aarî mûtaana wa Adi, na Adi aarî mûtaana wa Kosamu, na Kosamu aarî mûtaana wa Elimadamu, na Elimadamu aarî mûtaana wa Eri.

²⁹Eri aarî mûtaana wa Joshua, na Joshua aarî mûtaana wa Eliezeri, na Eliezeri aarî mûtaana wa Jorimu, na Jorimu aarî mûtaana wa Mathati, na Mathati aarî mûtaana wa Lawi.

³⁰Lawi aarî mûtaana wa Simioni, na Simioni aarî mûtaana wa Juda, na Juda aarî mûtaana wa Josefu, na Josefu aarî mûtaana wa Jonamu, na Jonamu aarî mûtaana wa Eliakimu.

³¹Eliakimu aarî mûtaana wa Melea, na Melea aarî mûtaana wa Mena, na Mena aarî mûtaana wa Matatha, na Matatha aarî mûtaana wa Nathani, na Nathani aarî mûtaana wa Daudi.

³²Daudi aarî mûtaana wa Jesii, na Jesii aarî mûtaana wa Obedi, na Obedi aarî mûtaana wa Boazi, na Boazi aarî mûtaana wa Salimoni, na Salimoni aarî mûtaana wa Nahashoni.

³³Nahashoni aarî mûtaana wa Aminadabu, na Aminadabu aarî mûtaana wa Adimini, na Adimini aarî mûtaana wa Arini, na Arini aarî mûtaana wa Hezironi, na Hezironi aarî mûtaana wa Perezi, na Perezi aarî mûtaana wa Juda.

³⁴Juda aarî mûtaana wa Jakubu, na Jakubu aarî mûtaana wa Isaaka, na Isaaka aarî mûtaana wa Abrahamu, na Abrahamu aarî mûtaana wa Tera, na Tera aarî mûtaana wa Nahori.

³⁵Nahori aarî mûtaana wa Serugi, na Serugi aarî mûtaana wa Reu, na Reu aarî mûtaana wa Pelegi, na Pelegi aarî mûtaana wa Eberi, na Eberi aarî mûtaana wa Shela.

³⁶Shela aarî mûtaana wa Kainani, na Kainani aarî mûtaana wa Arifakisadi, na Arifakisadi aarî mûtaana wa Shemu, na Shemu aarî mûtaana wa Noa, na Noa aarî mûtaana wa Lameki.

³⁷Lameki aarî mûtaana wa Methusela, na Methusela aarî mûtaana wa Enoki, na Enoki aarî mûtaana wa Jaredi, na Jaredi aarî mûtaana wa Mahalaleli, na Mahalaleli aarî mûtaana wa Kainani.

³⁸Kainani aarî mûtaana wa Enoshi, na Enoshi aarî mûtaana wa Sethi, na Sethi aarî mûtaana wa Adamu. Adamu ûrîa waarî mûtaana wa Mûrungu.