Read KIMERU BIBLE PROTESTANT EDITION Luk 4 Bible Online

Luk 4 - KIMERU BIBLE PROTESTANT EDITION bible

Luk 4

¹Jesû nî aumîre Jorodani, oojûri Roho Ûmûtheru. Roho nî aamûtongeererie mwanka rwanda.

²Nî aakarîre kû ntukû mîrongo îna akîgeragua nî Nkoma. Ntukû iu cionthe, gûtîkîo aarûma. Ntukû iu ikûthira nî aigîrue mpara.

³Nkoma aramwîra, “Ûkëethîrwa ûrî Mûtaana wa Mûrungu, îîra iiga rîrî rîee mûgaate.”

⁴ Jesû areera Nkoma atîrî, “Nî kwaandîki Maandîkoone atî ‘Muntû atîtûûraga mwoyo nîûntû bwa kûrîa mûgaate akî.’”

⁵Nkoma aramwitithia antû araaja na aramwonia moonene jonthe ja nthîgûrû,

⁶na aramwîra, “Ngakwaa inya ya kwathaga moonene jaja jonthe na nkwee mwago jwaajo. Nî nenkeretwe moonene jaja na ndoomba kûnenkera o ûrîa nkeenda.

⁷Tontû bûû, ûgänturîrîa maru na ûkanthaathayia, moonene jaja jonthe jakaa jaaku.”

⁸ Jesû aracokeria Nkoma aramwîra, “Kwaandîki, ‘Thaathagia Mwathani Mûrungu waaku, na ûmûtumîkagîre we wenka.’”

⁹Nkoma aratongeeria Jesû mwanka kathûmbî ka kîûrû kîa Jerusalemu na aramwîra, “Këethîra ûrî Mûtaana wa Mûrungu, ciarûkie nthî;

¹⁰ nîûntû nî kwaandîki, ‘Akeera araîka baawe bakûmenyeere na bagûkarie’

¹¹ na ‘bakûgwatîîre ûtîkeeje kûringwa kûgûrû gwaaku nî iiga.’”

¹² Jesû aracokeria Nkoma atîrî, “Maandîko jarîuga, ‘Ûkágeria Mwathani Mûrungu waaku.’”

¹³Rîrîa Nkoma aathirîrie kûgeria Jesû na njîra cionthe, aramûtiga mwanka rîrîa akoona kaanya kaangî.

¹⁴Jesû oojûri Roho Ûmûtheru nî aacokere Galili na nteto imwegiî iratamba nthîgûrû iu yonthe.

¹⁵Nî aaritanîre iromberoone biaao agîkumagua nî antû bonthe.

¹⁶Agûkinya Nazarethi, ntûûreene îrîa arereerwe, nî aakûrûkîre kîromberoone ntukû ya sabatû, o ta ûrîa kwaarî wîthîre bwaawe kûthithagia. Nî aarûngamîre nîkenda athoma Maandîko.

¹⁷Nî aanenkerwe yuku rîa Kîroria Isaya. Akûguûria aroona arîa kwaandîki,

¹⁸ “Roho wa Mwathani arî kîrî ni, nîûntû nî ambathûrîte ntûmagîîria Nteto Injega kîrî nkîa. Antûmîte nîkenda ndita atae ûkomboone, na ntûma atumuumu boona. Ntûûme barîa bainyîrîtue boone ûciathi.

¹⁹Ntûmîîrie îgiita rîrîa Mwathani akoonokia antû baawe.”

²⁰Jesû arakunîka yuku, na aracokeria ûrîa waamenyagîîra kîrombero, rîu arakara nthî. Antû bonthe barîa baarî ku baramûkûnîîra kûnûû.

²¹Araambîrîria kûbeera, “Naarua Maandîko jaja bwathiria kûthomerwa jakûjûra.”

²²Antû bonthe nî bamûkumîrie na bararigarua nî nteto irîa aaragia na barauga, “Anga ûjû tî mûtaana wa Josefu?”

²³Arabeera atîrî, “Gûtî nkaanja bûkambîîra njuno îîjî, ‘Ndagitarî ciorie gwengwa; thithia aja ntûûreene yaaku jarîa jonthe twigîtue nî ûthithîtie kûûrîa Kaperinaumu.’”

²⁴ Arabeera, “Ndîbwîra na mma atî, gûtî kîroria kîrî îgweta ntûûreene yaakîo.

²⁵ Ndîbwîra na mma atî, nî kwaarî na ntîgwa inyingî Israeli rîrîa Elija aarî o, rîrîa îgûrû rîaingîrwe mîaka îthatû na nusu gûtîkuura na kûragîa na mpara înene nthîgûrû yonthe.

²⁶ Îndî Elija atatûmîrwe kîrî ntigwa kinya îmwe ya iu, tiga kîrî ntigwa îrîa yaatûuraga Zarefathi, nthîgûrûûne ya Sidoni.

²⁷ Ningî nî kwaarî antû babaingî baajîtue nî mûtigiri kûu Israeli rîrîa Kîroria Elisha aarî o, îndî gûtî kinya ûmwe waabo woorerue tiga Naamani ûrîa waumîte Sîria.”

²⁸Rîrîa antû bonthe barîa baarî kîromberoone baigîrue ûu nî baathûûrîre mono.

²⁹Nî bookîîrîre na baramuumagaria oome ya ntûûra. Baramwikia akuî na rwaara rwa kîrîma kîrîa ntûûra yaaki, bakîendaga kûmwarûkia.

³⁰Îndî Jesû arakûrûkîîra gatîgatî kaao na araciîtîra.

³¹Jesû nî eenamîre ntûûreene ya Kaperinaumu, îrîa yaarî Galili, na araritana antû kûrî ntukû ya sabatû.

³² Antû nî bararigarîrue mono nî ûritani bwaawe nîûntû bwa ûrîa ariitanaga arî na inya.

³³Kîromberoone kîu nî kwaarî na muntû waarî na roho înthûûku. Muntû ûu arakaya akiugaga,

³⁴“Wûûi! Nîatîa ûkwenda naatuî Jesû wa Nazarethi? Ka wîîjîte gûtwînyangia? Nînkûmenya gwe ûrî û. Ûrî Ûrîa Mûtheru wa Mûrungu.”

³⁵Îndî Jesû aramîgondokera aramîîra, “Kira ki na uume kîrî muntû ûûjû!” Rîrîa yaumaga kîrî we, îramûgwithia nthî gatîgatî kaao na îtamwîkîra rûgûma.

³⁶Antû bonthe nî baarigarîre na bareerana, “Nî nteto îkari atîa iji? Tontû arîgondokera roho inthûûku arî na inya na waatho bûbûnene, na ikauma!”

³⁷Mantû jamwegiî jaratamba nthîgûrû îîu yonthe.

³⁸Jesû nî aumîre kîromberoone na areeeta nyomba ya Simioni. Ng'ina wa mwekûrû wa Simioni nî aajîtue nî nchoma mono. Antû baramwerenca amworie.

³⁹Jesû ararûngama akuî nawe na aragondokera mûrimo jûu. Mwekûrû arabua na arookîîra ntûti na arabamathîra.

⁴⁰Rîrîa ûgoro bwakinyîre, bonthe barîa baarî na antû baajîtue nî mîrimo mwanya mwanya nî babaikîrie kîrî Jesû. Arabarîkîîra njara o ûmwe kwa ûmwe, na bonthe barabua.

⁴¹Jesû nî agondokeere roho inthûûku irauma kîrî antû babaingî. Roho iu nî ciakayaga ikiugaga, “Gwe ûrî Mûtaana wa Mûrungu.” Îndî aracigondokera na atîreke ciaria, nîûntû nî ciamenyaga atî nîwe Kristû.

⁴²Rîrîa gwakeere Jesû nî aumagarîre na areeta gûntû gûtaarî na antû. Antû baramûcwaa na rîrîa baamwonere, baramwerenca atîkaume kûu kwaao.

⁴³Îndî Jesû arabeera, “No mwanka ntûmîîrie Nteto Injega ciegiî Ûnene bwa Mûrungu ntûûreene irîa ingî kinya cio. Nîkwîthîrwa kîu nîkîo gîatûmîre Mûrungu aantûma.”

⁴⁴Tontû bûû, aratûmîîria iromberoone bia nthîgûrû ya Judea.