Read KIMERU BIBLE PROTESTANT EDITION Luk 5 Bible Online

Luk 5 - KIMERU BIBLE PROTESTANT EDITION bible

Luk 5

¹ Ntukû îmwe Jesû nî aarî rûteere rwa îria rîa Genesareti. Antû babaingî nî batitikanîte bakîendaga gwîta akuî nawe nîkenda bathikîîra rûteto rwa Mûrungu.

²Aroona itarû biîrî birî rûteere rwa îria, na eene nî baarî bagwîta kûthambia neeti iria baagwatagia nacio makûyû.

³Jesû araitia gîtarûûne kîa muntû weetagwa Simioni, na aramwîra agîtaîtithie aniini kiume akuî na nthî înjûmo. Jesû arakara nthî gîtarûûne na araritana antû arî ku.

⁴Rîrîa aathirîrie kwaria areera Simioni atîrî, “Îtaîtithia gîtarû kûrîa kworokeri na bûgere neeti cieenu îrieene bûgwatie makûyû.”

⁵ Simioni aramwîra, “Mwathi waakwa, tûreere kûgwatia makûyû ûtukû bunthe na gûtîkîo tûragwatia! Îndî nîûntû ûgûtwîra, nkagera neeti îrieene.”

⁶ Bakûgera neeti, nî baagwatîrie makûyû jamaingî mwanka neeti ireenda gûtwîkanga.

⁷Tontû bûû, bareeta barîa baarî gîtarûûne kîrîa kîngî nîkenda beeta kûbateethia. Bagwîta baroojûria itarû bio biîrî, mwanka bireenda kworokera.

⁸Rîrîa Simioni Peterû oonere ûu, araturia maru mbere ya Jesû akiugaga, “Itû Mwathani, umauma akuî naani nîûntû ndî mwîyia.”

⁹Simioni amwe na bonthe barîa baarî nawe nî baarigarîre mono boona ûrîa baagwatîrie makûyû jamaingî.

¹⁰Kinya Jakubu na Johana, ataana ba Zebedii barîa baritanagîria ngûgî na Simioni, nî barigarîre mono. Jesû areera Simioni atîrî, “Ûgákîra, kuuma nandî ûkagwatagia antû.”

¹¹Rîrîa baakinyîrie itarû biaao rûteere rwa îria, nî baatigîre into bionthe na baramûthingata.

¹²Îgiita rîmwe muntû waarî na mûrimo jwa mûtigiri nî oonere Jesû arî ntûûreene îmwe. Muntû ûu nî aigwîthîrie akuî na magûrû ja Jesû na aramwerenca akiugaga, “Itû Mwathani weenda mboria.”

¹³Aramûrîkîîra njara na arauga, “Nî nkwenda ûbua!” Muntû ûu aroora o rîu.

¹⁴ Jesû aramwîra, “Ûkéera muntû kinya ûrîkû. Îndî îta ûcionanie kîrî mûthînjîri-Mûrungu, na wîte ûrite kîgongwana o ta ûrîa Musa aathanîre, kîrî ûkûûjî kîrî antû atî ûkûbua.”

¹⁵Îndî antû baratambia nteto ciegiî Jesû gûntû kunthe na babaingî bareeta kîrî we kwigua ûritani bwaawe na kworua mîrimo îrîa yaabajîtie.

¹⁶Îndî arabatiga areeta gûntû gûtaarî na antû kûromba.

¹⁷Ntukû îmwe Jesû nî aaritanaga na nîûntû bwa inya kuuma kîrî Mwathani, nî ooragia barîa baajîtue. Îgiita rîu Afarisayo na aritani ba Waatho, barîa baumîte ntûûreene cionthe cia Galili, na cia Judea na ba kuuma Jerusalemu nî baakari nthî au aritanagîra.

¹⁸Kûrî antû bakamatîîre kîonje kîrî gîtandeene, na barageria gûkûrûka nyomba îrîa Jesû aaritanagîra,

¹⁹îndî nîûntû bwa ûrîa antû baingîi nî baaremerwe kûmûkûrûkia ndeene. Tontû bûû, baraitia îgûrûgûrû rîa nyomba îîu, na bararita maturubarî, na bareenîka kîonje kîu kîrî gîtandeene na baragîîka mbere ya Jesû.

²⁰Rîrîa Jesû oonere ûrîa baarî na wîtîkio bûbwingî, areera kîonje kîu, “Mûcoore, ûkûrekerwa meeyia.”

²¹Aritani ba Waatho na Afarisayo baraambîrîria kûûrania, “Nî muntû ûkari ûjû ûkûruma Mûrungu? Ga kûrî ûngî ûûmba kûrekera meeyia tiga Mûrungu akî?”

²²Jesû akûmenya ûrîa baathûgaanagia, arabeera atîrî, “Nîmbi îgûtûma bûciûria biûria ta biu?

²³Nî bûrîkû bûûthû kuuga, nî kuuga, ‘Ûkûrekerwa meeyia,’ kana nî kuuga, ‘Ûkîîra ûciîtîre?’

²⁴Îndî nîkenda bûmenya atî Mûtaana wa Muntû arî na inya ya kûrekera meeyia arî nthîgûrû,” areera muntû ûu waarî kîonje atîrî, “Ndîkwîra ûkîîra, jûkia gîtanda gîaaku na waane.”

²⁵Rîu muntû ûu waarî kîonje arookîîra ntûti bonthe bakîonaga na arajûkia gîtanda kîaawe na araana agîkumagia Mûrungu.

²⁶Antû bonthe bakwona ûu nî baarigarîre mono na baraigua ûguaa barakumia Mûrungu bakiugaga, “Naarua tûkwona mantû ja kûrigaria.”

²⁷Jesû akûthiria kûthithia ûu, araumagara na aroona mûritithia ûgoti weetagwa Lawi arî ûbiciine yaawe na aramwîra, “Nthingata.”

²⁸Lawi aratiga into bionthe na aramûthingata.

²⁹Rîu arathithîria Jesû amwe na aritithia ûgoti babaingî na kinya antû bangî kîatho gîkînene kwaawe.

³⁰ Afarisayo na aritani ba Waatho nî baanung'unîre na barooria aritwa ba Jesû atîrî, “Nîkî bûkûrîa na bûkanyunyanîra na aritithia ûgoti na eeyia?”

³¹Jesû arabeera, “Barîa batîajîtue batîcwaga ndagitarî, îndî barîa bajîtue nîbo bamûcwaga.

³²Nteejîre gwîta barîa baagîru, îndî ndeejîre gwîta eeyia nîkenda bairira.”

³³Antû bamwe bareera Jesû atîrî, “Aritwa ba Johana na ba Afarisayo nî barombaga na bagaciata biakûrîa maita jamaingî. Îndî aritwa baaku batîciataga biakûrîa kana biakûnyua.”

³⁴Jesû arabeera, “Kwombîka antû barîa barî amwe na mûjûkania bareega kûrîa?

³⁵Îgiita rîgakinya rîrîa mûjûkania akajûkua aume kîrî bo. Rîu nîrîo bagaciata biakûrîa.”

³⁶Ningî Jesû arabaa ngerekano îîjî, “Gûtî muntû ûgiitaga nguû înjerû amîtumîîra îrî kîraka nguûûne înkûrû; akëeja kûthithia ûu akathûkia nguû îrîa njerû na kîraka kîu gîtîbuîra nguûne îîu nkûrû.

³⁷Ningî gûtî muntû wîkagîra ndua ithiriine bithithîtue na mîgûûta îmûkûrû. Akëeja kûthithia ûu ndibei îîu îgatambûra ithiri biu na îîtîke, na ithiri biee bia ûtheri.

³⁸Îndî no mwanka ndua îîkîrwe ithiriine bithithîtue na mîgûûta îmîerû.

³⁹Gûtî we ûnyunyaga ndibei îndûru, weenda kûnyua ndua. Nîkwîthîrwa augaga ‘Îrîa ndûru nîyo njega nkûrûki.’”