Read KIMERU BIBLE PROTESTANT EDITION Luk 6 Bible Online

Luk 6 - KIMERU BIBLE PROTESTANT EDITION bible

Luk 6

¹ Ntukû îmwe ya sabatû Jesû na aritwa baawe nî baakûrûkîrîîte miuundeene ya nkano. Aritwa baawe barauna nkano na baraambîrîria gwikitha bakîrîjaga.

²Afarisayo bamwe barabooria atîrî, “Nîmbi îgûtûma bûthithia ûntû bûrîa Waatho buugîîte bûkáthithua ntukû ya sabatû?”

³ Jesû arabooria, “Ka bûtathoma ûrîa Daudi na antû barîa aarî nabo baathithîrie rîrîa baarî na mpara?

⁴ Nî aakûrûkîre kîûrûûne arajûkia mîgaate îrîa yaathûrîri Mûrungu ararîa, na ararûmia barîa aarî nabo, kinya këethîra Waatho bwetîkîîrîtie athînjîri-Mûrungu bonka barîa mîgaate îîu.”

⁵Tontû bûû, arabeera atîrî, “Mûtaana wa Muntû nîwe Mwathi wa sabatû.”

⁶Ntukû îngî ya sabatû, Jesû nî aakûrûkîre kîromberoone na araritana. Kûu nî kwaarî na muntû woonji njara ya ûrîo.

⁷Aritani ba Waatho na Afarisayo nî baategeete boona këethîra akooria muntû ûu ntukû ya sabatû, nîkenda boona ûntû bwa kûmûthitanga nabu.

⁸Îndî Jesû akûmenya ûrîa beendaga, areera muntû ûu atîrî, “Njû aja.” Muntû ûu arookîîra na ararûngama mbere yaawe.

⁹Rîu Jesû arabeera, “Ndîbûûria atîrî, Waatho nî bwîtîkîîrîtie muntû aathithia ûntû bûbwega kana bûbûûî ntukû ya sabatû? Nî bwega kwonokia ûtûûro bwa muntû kana kûrekana nawe akua?”

¹⁰Akûraithîîria bonthe barîa baarî ku, areera muntû ûu atîrî, “Tambûrûkia njara îîu yaaku.” Aratambûrûkia njara, na îrabua.

¹¹Îndî Afarisayo na aritani ba Waatho baraigua marûrû, na baraireba ûrîa bakathithîria Jesû.

¹²Îgiita rîu Jesû araitia kîrîmeene kûromba, na araraara kûromba Mûrungu ûtukû bunthe.

¹³Gûgûkea rûûnene, areeta aritwa baawe na arathuura kuuma kîrî bo antû îkûmi na baîrî barîa eetîre atûmwa.

¹⁴Nabo nî: Simioni ûrîa eetîre Peterû na Anderea mûtaana wa ng'ina, na Jakubu na Johana, na Filipû na Batholomeo,

¹⁵na Mathayo na Toma, na Jakubu mûtaana wa Alifayo na Simioni ûrîa weetagwa Zilote,

¹⁶na Judasi mûtaana wa Jakubu na Judasi Iskarioti, ûrîa waakunyanîîre Jesû.

¹⁷Jesû areenamania nabo kuuma kîrîmeene ararûngama antû arîa kwang'ananîrîtie. Antû au nî kwaarî na aritwa baawe babaingî. Ningî nî kwaarî na ntundu înene ya antû kuuma nthîgûrû ya Judea yonthe, na kuuma Jerusalemu na ba kuuma mpwîroone cia Tiro na Sidoni. Antû bau bonthe beetîte kûthikîîra ûritani bwa Jesû na boorua mîrimo yaao.

¹⁸Kinya barîa baathangîkagua nî roho inthûûku nî baarî o na baroorua.

¹⁹Antû bau bonthe nî baageragia kûmûringithia nîûntû inya nî yaumaga kîrî we na îkabooria bonthe.

²⁰Jesû araraithîria aritwa baawe na arauga, “Kûgwîrua nî kweenu buî bûrî nkîa, nîkwîthîrwa Ûnene bwa Mûrungu nî bweenu.

²¹Kûgwîrua nî kweenu buî bûrî na mpara nandî, nîkwîthîrwa bûkanyirua. Kûgwîrua nî kweenu buî barîa bakûrîra nandî, nîkwîthîrwa nyumeene bûkatheka.

²² Kûgwîrua nî kweenu buî barîa bûthwîrwe nî antû, na bûkaathûrwa na bûkaruumwa na bûkathûûkîrua riîtwa nîûntû bwa Mûtaana wa Muntû.

²³ Ntukû îîu yakinya, bûkagwîrua na bûkûngûîre, nîkwîthîrwa bûrî na îtuui rîrînene îgûrû, nîkwîthîrwa ûu nîu biûjûjû biaao biaathithîîrie iroria.

²⁴Îndî rî, wûi kîrî buî barîa bûrî itonga, nîkwîthîrwa nî bûthirîtie kwona kîrîa kîbûgwîragia.

²⁵Wûi kîrî buî barîa banyiri nandî, nîkwîthîrwa bûkarîîwa nî mpara.

²⁶Wûi kîrî buî rîrîa antû bonthe bakabûkûmia na babûgonge, nîkwîthîrwa o ûu nîu biûjûjû biaao biaathithîîrie iroria bia ûrongo.”

²⁷“Îndî buî bûnthikîîrîte ndîbwîra: endageni anthû beenu na bûthithagîrie barîa babûthwîre mantû jameega.

²⁸Tharimageni barîa babûrumaga na bûrombagîre barîa babûthangîkagia.

²⁹Muntû akëeja gûkûringa rûthea, mûgarûkîrie kinya rûu rûngî. Ningî ûrîa ûgagûtûnya îgoti, mûnenkere kinya chati.

³⁰Ejaga wonthe ûrîa ûgakûromba. Ningî ûrîa ûgagûtuunya into biaaku ûkamwîtia.

³¹ Thithagîrieni antû bangî ûrîa bwendaga babûthithîria.”

³²“Bûkëethîrwa bwendaga barîa babwendaga rî, nî îtuui rîrîkû bûkoona? Kinya eeyia beendaga barîa babeendaga.

³³Këethîra no antû barîa babûthithagîria mantû jameega bûthithagîria mantû jameega rî, nî îtuui rîrîkû bûkoona? Gûtî rîo! Tontû kinya eeyia nou bathithagia.

³⁴Këethîra bûkoobithagia barîa bwîrîgagîîra bakoomba kûrîaa îrandû rîeenu rî, nî îtuui rîrîkû bûkoona? Kinya eeyia bakoobithagia eeyia bangî, berîgîrîte kûrîwa îrandû rîaao rîonthe.

³⁵Îndî buî endageni anthû beenu, na bûbathithagîrie mantû jameega. Koobithanagieni bûtîkwîrîgîîra kûrîwa; rîu bûkaewa îtuui rîrînene, na ningî bûkaa ataana ba Mûrungu Ûrîa Ûrî Îgûrû buru. Nîkwîthîrwa nî aigagîîrua barîa batî ncûûne na barîa barî ngoga kîaao.

³⁶Igagîîrueni bangî kîaao o ta ûrîa Abaagu weenu aigagîîrua antû kîaao.”

³⁷“Bûgátujagîra antû bangî, na Mûrungu atîbûgambithia; bûkámena bangî bûtîkeeje kûgambithua nî Mûrungu. Rekagîreeni bangî naabuî bûkarekerwa.

³⁸Eejanageni, na kinya buî bûkaejagwa nî Mûrungu. Bûkaewa bibingî, bikinyîîri, na bikaunîkara. Nîkwîthîrwa kîthimi kîrîa bûkathimagîra bangî nakîo, nîkîo Mûrungu akabûthimagîra nakîo.”

³⁹ Ningî Jesû nî aabeerîre ngerekano îîjî: “Ntumuumu yoomba gûtongeeria îngî? Bo-baîrî nîka bakaagwa îriinyeene.

⁴⁰ Gûtî mûritwa ûrî ûûme nkûrûki ya mûritani waawe. Îndî mûritwa ûrîa ûritani bwega buru akaraga ta mûritani waawe.

⁴¹Nîkî woonaga gatî karîa karî riitho rîa muntû ûngî, îndî gwe ûtîonaga mûgogo jûrîa jûrî riitho rîaaku?

⁴²Nîatîa ûûmba kwîra muntû ûngî, ‘Mûcoore, reka nkûrite gatî kau karî riitho rîaaku,’ rîrîa gwe gwengwa ûtîkwona mûgogo jûrîa jûrî riitho rîaaku? Gwe mûciayia, amba ûrite mûgogo jûrîa jûrî riitho rîaaku, na ûkoona bwega nîkenda ûûmba kûrita gatî karîa karî riitho rîa muntû ûngî.”

⁴³“Gûtî mûtî jûmwega jûciaraga maciara jamaaî, kana mûtî jûmûûî jûciara maciara jameega.

⁴⁴ O mûtî jûmenyekanaga nîûntû bwa maciara jaaju. Nkûû itîkeethagwa mîgeene kana nzabibû ikethwa mîtonguune.

⁴⁵ Muntû ûmwega aragia mantû jaameega kuuma nkoroone yaawe, na muntû ûmûûi aragia mantû jamathûûku kuuma nkoroone yaawe. Nîkwîthîrwa kanyua kaaragia mantû jarîa joojûri nkoroone.”

⁴⁶“Nîkî bûmbîtaga ‘Mwathani, Mwathani,’ na bûtîthithagia jarîa mbwîraga?

⁴⁷Ka mbwee ngerekano ya muntû ûrîa wîjaga kîrî ni, akathikîîra nteto ciaakwa, na akathithia ûrîa ikuuga.

⁴⁸Akari ta muntû ûrîa waakaga nyomba. Araamba kwînja mûsingi mwanka arakinyîra iiga. Rîrîa kwaurîre na mûguû jûraringa nyomba, îtaagwîîre nîûntû nî yaaki bwega.

⁴⁹Îndî muntû ûrîa ûthikagîîra nteto ciaakwa na akerega kûthithia ûrîa ikuuga, akari ta muntû ûrîa waakîre nyomba yaawe îtî na mûsingi jûmwega. Rîrîa kwaurîre na mûguû jûraringa nyomba îîu, nî yaagwîre ntûti na îramomokanga.”