Read KIMERU BIBLE PROTESTANT EDITION Luk 7 Bible Online

Luk 7 - KIMERU BIBLE PROTESTANT EDITION bible

Luk 7

¹Rîrîa Jesû athirîrie kûbaa ngerekano iu nî eetîre Kaperinaumu.

²Mûtongeeria wa asikarî, nî aarî na nthûûmba eendeete mono. Nayo nî yaajîtue na yaarî akuî gûkua.

³Rîrîa mûtongeeria ûu aigîrue mantû jegiî Jesû, nî aatûmîre akûrû barîa atongeeria ba Ayahudi kîrî we beeta kûmwerenca eete akoorie nthûûmba yaawe.

⁴Rîrîa baakinyîre kîrî Jesû baramwerenca mono bakîmwîraga, “Mûtongeeria ûu nî abuîrîte kûthithîrua ûntû bûu,

⁵nîkwîthîrwa nî eendeete nthîgûrû yeetû, na nîwe waatwakîîre kîrombero.”

⁶Tontû bûû, Jesû areetania nabo. Agûkinya akuî na nyomba, mûtongeeria ûu aratûma acoore baawe kîrî Jesû bamwîra ûjû, “Mwathani, ûkaithangîkia nîûntû ntîagîri gûkûgwata ûgeni nyomba yaakwa.

⁷Ntîonere bwagîrîte mbîja kîrî gwe ni ningwa. Îndî rita waatho na nthûûmba yaakwa îkabua.

⁸Kinya ni ndî muntû ûrî waathoone. Ndî na asikarî barîa mbathaga na mbîîraga ûmwe waao, ‘Îta!’ Na ageeta; na nkeera ûngî, ‘Njû!’ Na akeeja. Ningî nkeera nthûûmba yaakwa, ‘Thithia ûjû!’ Na îkathithia.”

⁹Rîrîa Jesû aigîrue ûu ararigara mono na aragarûka areera antû barîa bamûthingatîte atîrî, “Ndîbwîra atî, ntoona wîîtîkio ta bûbû kaîrî kinya nthîgûrûûne ya Israeli.”

¹⁰Rîrîa barîa baatûmi baacokere nyomba barethîra nthûûmba iu îkubua.

¹¹Nyuma ya kagiita gagakai, Jesû arî na aritwa baawe amwe na antû babaingî nî baagwatîre njîra bareeta ntûûreene yeetagwa Naini.

¹²Agûkinya akuî mpingîro ya ntûûra iu, aracemania na ntigwa na antû babaingî bakamatîte mwîrî jwa mwana wa ntigwa îîu.

¹³Rîrîa Mwathani oonere ntigwa îîu aramiigîîrua kîaao, na aramîîra atîrî, “Tiga kûrîra.”

¹⁴Jesû areeta araringithia îthandûkû, na antû barîa baarîkamatîte bararûngama. Jesû arauga atîrî, “Nthaka, ndîkwîra ûkîîra!”

¹⁵Nthaka îîu yaakuîte îrariûka îrakara nthî, na îraambîrîria kwaria. Jesû areera nthaka îte kîrî ng'ina.

¹⁶Antû bonthe baragwatwa nî ûguaa, na barakumia Mûrungu bakiugaga, “Kîroria gîkînene gîkwîja kîrî tuî. Mûrungu akwîja kwonokia antû baawe!”

¹⁷Mantû jegiî Jesû jaratamba nthîgûrûûne ya Judea yonthe na kinya nthîgûrû irîa ciaankeene nayo.

¹⁸Johana nî eerîrwe nî aritwa baawe mantû jarîa Jesû aathithagia.

¹⁹Johana areeta aritwa baawe baîrî na arabatûma kîrî Mwathani, beeta kûmûûria atîrî, “Nîgwe ûrîa tweerîri akeeja kana tweteere ûngî.”

²⁰Rîrîa antû bau baakinyîre kîrî Jesû, baramwîra, “Johana Mûbatithania atûtûmîte tûkûûria atîrî, ‘Nîgwe ûrîa tweerîri akeeja kana tweteere ûngî?’”

²¹O kagiita kau kongwa arooria antû babaingî barîa baarî na mîrimo na arenga roho inthûûku irauma kîrî barîa baarî nacio. Ningî aratûma atumuumu babaingî boona.

²² Rîu Jesû arabacokeria atîrî, “Îteeni bwîre Johana mantû jarîa bwona na jarîa bwaigua: atumuumu nî bakwona; bionje nî bigwîta, na barîa barî na mûtigiri nî bakwoorua, na barîa batiigagua nî bakwigua, na akuû nî bakûriûkua, na kinya Nteto Injega nî îgûtûmîîrua kîrî nkîa.

²³Kîtharimo nî kîrî muntû ûrîa ûtîgiaga na nkaanja ûntûûne bûmbegiî.”

²⁴Rîrîa barîa baatûmi nî Johana beetîre, Jesû nî aambîrîrie kwarîria antû mantû jegiî Johana: “Nîmbi bwetîte kwona rwanda? Nî rûthanje rûkwinainua nî ruuo?

²⁵Rîu nîmbi bweetîte kwona? Nî muntû weekîrîte nguû inthongi? Barîa bekagîra nguû inthongi na bagakara batîkwûinyîrua nî ngûgî no îrîkû batûûraga nyomba cia anene.

²⁶Nîmbi îndî bweetîte kwona? Nî kîroria? Îî, ga nkûbwîra na mma ûrîa bwoonere nî nkûrûki ya kîroria.

²⁷ Maandîko jaugîîte mantû jamwegiî atî, ‘Ngatûma muntû kîrî buî mbere ya eeja, nawe akathuranîra njîra yaawe.’

²⁸Ndîbwîra atîrî, kîrî barîa bonthe batûûra mwoyo, gûtî ûmûnene nkûrûki ya Johana; îndî amwe na bûu, ûrîa mûnini buru Ûneneene bwa Mûrungu nîwe mûnene kîrî Johana.”

²⁹ Aritithia ûgoti na antû bangî bonthe bakwigua mantû jau, nî baugîre atî mantû ja Mûrungu nî ja îota, nîûntû nî baarî bakûbatithua nî Johana.

³⁰Îndî Afarisayo na aritani ba Waatho nî baaregere mûbango jûrîa Mûrungu aababangîrîte, na bararega kûbatithua nî Johana.

³¹Jesû arauga, “Nkang'uanania antû ba nthukî îîjî na mbi? Nî antû ba mûthemba jûrîkû?

³²Bakari ta twaana tûkari nthî thokoone tûkîîranaga, ‘Tûbûringîre biempe, naabuî bwarega kwina; tûbwinîîre ndwîmbo cia kîeba, naabuî bwarega kurira.’

³³Johana Mûbatithania eejîre atîkûrîa biakûrîa kana anyua ndibei; naabuî bûrauga atî, ‘Arî na roho înthûûku.’

³⁴Mûtaana wa Muntû akwîja akîrajaga na akînyunyaga, buugaga, ‘Nî muntû wa kîu na mwogiti. Ningî nî mûcoore wa aritithia ûgoti na eeyia!’

³⁵Îndî rî, ûûme bwa Mûrungu bûonekanaga nî bwa mma kuumania na antû bonthe barîa babûthingataga.”

³⁶Mûfarisayo ûmwe nî eetîre Jesû kiatho kwaawe. Jesû agwîta kwaawe, arakara nthî kûrîa irio.

³⁷ Ntûûreene îîu nî kwaarî na mûka waarî mwîyia. Mûka ûu akûmenya atî Jesû nî arî nyomba ya Mûfarisayo ûu, nî aakamatîre chuuba yûjûri maguta jakweera bwega,

³⁸na areeta ararûngama nyuma ya Jesû, akuî na magûrû jaawe, akîrîraga. Meethori jaawe jarambîrîria gwîtîka magûrûûne ja Jesû na arajaangûra na mûtuundu jwaawe. Aracoka arajacûnca na arajaaka maguta.

³⁹Rîrîa Mûfarisayo ûu, oonere mantû jau, araciîra nkoroone atîrî, “Muntû ûûjû arîngîîthîrwa arî kîroria, arîngîmenya mûka ûûjû ûkûmûringithia nî mwîyia.”

⁴⁰Jesû areera Mûfarisayo ûu, “Simioni, ndî na ûntû bwa gûkwîra.” Nawe aramûûria, “Nî bûrîkû bûu Mûritani?”

⁴¹Jesû aramwîra, “Muntû ûmwe nî aakobithîtie antû baîrî mbeecha. Ûmwe aarî na îrandû rîa denari magana jataano, na ûngî aarî na îrandû rîa denari[1] mîrongo îtaano.

⁴²Rîrîa bobaîrî baaremerwe kûrîaa, arabarekera. Nî ûrîkû kîrî bo ûkeenda muntû ûu nkûrûki?”

⁴³Simioni aramûcokeria, “Ndîthûûgania nî ûrîa waarekeerwe îrandû rîrînene.” Jesû aramwîra, “Ûkuuga bûrîo.”

⁴⁴Rîu araraithîria mûka ûu na areera Simioni atîrî, “Nî ûkwona mûka ûûjû? Ndîgûkûrûka nyomba yaaku ûtîndeeteere rûûjî rwa kûthamba magûrû. Îndî mûka ûûjû akûthambia magûrû na meethori jaawe na ajangûra na mûtuundu jwaawe.

⁴⁵Gwe ûtîncuncîre, îndî mûka ûûjû kuuma rîrîa atonyere nyomba îîjî atîratiga gûncûnca magûrû.

⁴⁶Ûtîmbakîre mûtwe maguta, îndî mûka ûûjû akûmbaka magûrû maguta.

⁴⁷Tontû bûû, ndîkwîra atî, akûrekerwa meeyia jaawe jarîa jagûkarî jamaingî, nîûntû akwonania wendo bûbûnene. Îndî ûrîa ûrekagîrwa meeyia jamakai, nîu wendo bwaawe bwîthagîrwa bûrî bûbûkai.”

⁴⁸Rîu areera mûka ûu, “Meeyia jaaku jakûrekerwa.”

⁴⁹Barîa baarîjaga biakûrîa baraambîrîria kûûrania, “Nûû ûjû ûkûrekera bangî meeyia?”

⁵⁰Jesû areera mûka ûu, “Wîîtîkio bwaaku bûgûkwonokia; îta na thîîrî.”