Read KIMERU BIBLE PROTESTANT EDITION Luk 8 Bible Online

Luk 8 - KIMERU BIBLE PROTESTANT EDITION bible

Luk 8

¹Jesû akuuma kûu areeta ntûûreene na tûtûûreene, agîtûmagîîria Nteto Injega ciegiî Ûnene bwa Mûrungu. Aritwa baawe, barîa îkûmi na baîrî nî beetanîtie nawe.

² Kinya eekûrû bang'anona barîa Jesû ooretie mîrimo na akeenga roho inthûûku kuuma kîrî bo, nî beetanîtie nawe. Eekûrû bau baarî Maria Magidalina, ûrîa waaritîtwe roho mûgwanja inthûûku;

³na Joanina mwekûrû wa Kuza. Kuza aarî mûrûngamîîri wa antû barîa baakaraga gîkaroone kîa Herode. Ningî nî kwaarî na Susana na eekûrû bangî babaingî barîa baatumagîra into biaao kûmenyeera Jesû na aritwa baawe.

⁴Rîrîa antû babaingî boothûranîre kuuma ntûûreene mwanya mwanya na bareeta kîrî Jesû, nî aabaeere ngerekano îîjî:

⁵“Kûrî muntû weetîre kwaanda mbeeû. Rîrîa aaminyaga, mbeeû imwe iragwa njîreene na irakinyangwa na ingî irarîwa nî nyoni.

⁶Mbeeû ingî iragwa iigeene na ikuuma irooma nîûntû mûthetu jûtaarî na rûûjî rwa kûng'ana.

⁷Ingî iragwa antû kwaarî na matî jarî na miigua, na ikuuma, irakûranîria na matî jau iraiinyanua na irarema kûbua.

⁸Ingî iragwa mûthetuune jûmûnoru, irakûra, na o mpîndî îraciara mpîndî îgana.” Athiria kuuga ûu, arauga na kajû gakanene, “Ûrîa ûrî na matû ja kwigua, nî aigue.”

⁹Rîrîa aritwa baawe baamûûrîrie gîtûmi kîa ngerekano îîu,

¹⁰ arabeera atîrî, “Buî nî bweei ûmenyo bwa gûciûra witho bwa Ûnene bwa Mûrungu, îndî mbaragîria bangî ngîtumagîra ngerekano nîkenda baatega batîone na baathikîîra bareemwe gûciûra.”

¹¹Jesû arabeera, “Ûritani bwa ngerekano îîjî nî bûbû: mbeeû nî rûteto rwa Mûrungu.

¹²Mbeeû irîa ciagwîre njîreene nî barîa baigagua rûteto, rîu Nkoma akarita rûteto rûu kuuma nkoroone ciaao, nîkenda batîîtîkia beeja kwonoka.

¹³Mbeeû irîa ciagwîre iigeene nî barîa baigagua rûteto na bakarûgwata bagwîrîtue, îndî batîrûrikie nkoroone. Beetîkagia kagiita gagakai îndî magerio jabeejîîra, bagatigana na wîtîkio.

¹⁴Mbeeû irîa ciagwîre antû arîa aarî na matî jarî na miigua, nî antû barîa baigagua rûteto, îndî bagaatîkwa nî mîruuru na mootonga na kûgwîrîrua mîago ya ûtûûro bûbû, mwanka rûteto rûkaremwa gûkûra ndeene yaao.

¹⁵Ningî irîa ciagwîre mûthetuune jûmûnoru, nî antû barîa baigagua rûteto barî na nkoro injega itî na waayia, na bakoomîîria mwanka rûteto rûkarika rûkaagîria mîîtîre yaao.”

¹⁶ “Gûtî muntû ûgwatagia taawa na amîkunîkîra kana amîîka rungu rwa gîtanda. Îndî amîîkaga arîa îkoomba kûmûrîkîra barîa bagûtonya nyomba.

¹⁷ Nîkwîthîrwa gûtî ûntû bûrî withoone bûtîmenyekana na gûtî ûntû kinya bûrîkû bûthithagîrua muunduune bûtîmenyekana.

¹⁸ Tontû bûû, îmenyagîîreni mantû jarîa bûkûthikîîra nîkwîthîrwa ûrîa ûrî nabio akoongerwa bibingî, na ûrîa ûtî nabio, kinya birîa akûthûgaania arî nabio agatunywa.”

¹⁹Ng'ina wa Jesû na ataana ba ng'ina ba Jesû nî beetîre kîrî Jesû, îndî bararemwa kûmûkinyîra nîûntû bwa ûrîa antû baingîi.

²⁰Jesû nî aamenyithîrue atî ng'ina na ataana ba ng'ina nî baarî oome bakîendaga kûmwona.

²¹Îndî areera antû atîrî, “Chiaa na ataana ba chiaa nî barîa baigagua rûteto rwa Mûrungu na bakathithia ûrîa rûkuuga.”

²²Ntukû îmwe Jesû na aritwa baawe nî baitîrie gîtarûûne na arabeera, “Tuuneni twîte rwongo rûrîa rûngî rwa îria.” Tontû bûû, baraambîrîria kuuna îria.

²³Barî îrieene, Jesû aragwatwa nî toro na aramama. Kîbûbanî kîraambîrîria kuurutana na rûûjî rûratonya gîtarûûne. Tontû bûû, bonthe nî baarî ûgwatiine bwa kûûragwa nî rûûjî.

²⁴Aritwa bareeta kîrî Jesû na baramwîra, “Mwathi weetû, Mwathi weetû tûrî akuî gûkua!” Nawe arookîîra na arakiria ruuo na mîgombe ya rûûjî îratiga kûringa gîtarû.

²⁵Rîu aroorîa aritwa baawe atîrî, “Bûrîkû wîtîkio bweenu?” Nabo baramaka na bararigara mono bakîîranaga, “Muntû ûû ka arî ûû we ûkwarîria ruuo na rûûjî na bikamwathîkîra?”

²⁶Jesû na aritwa baawe bakuuna îria, barakinya nthîgûrû ya Gerasane, îrîa yeerekene na Galili.

²⁷Jesû akuuma gîtarûûne, aratirimana na muntû waarî na roho inthûûku aumîte ntûûreene. Muntû ûu aatwîre îgiita rîrîraaja atîîkagîra nguû na atatûûraga mûciî îndî aatûûraga gûntû kûrîa antû baathikagwa.

²⁸Rîrîa muntû ûu oonere Jesû arakaya na araigwîthia nthî akuî na magûrû ja Jesû na arauga na kajû gakanene, “Nîatîa ûkwenda kûnthithîria gwe Jesû Mûtaana wa Mûrungu Ûrîa Ûrî Îgûrû buru? Itû ndakwerenca ûkanthangîkia!”

²⁹Augîre ûu nîûntû Jesû nî aarî akwîra roho înthûûku îrîa yaarî ndeene yaawe yuume. Roho îîu nthûûku nî yaamûthangîkagia magiita jamaingî. Ningî kinya këethîra nî aakaragua atheeki na nyororo na mpengû magiita jonthe, nî aagitaga nyororo iu na roho îîu îkamwikia rwanda.

³⁰Jesû aramûûria, “Wîtagwa atîa?” Nawe arauga, “Ni ndî njûûrî.” Augîre ûu nîûntû roho inthûûku inyingî nî ciaarî ndeene yaawe.

³¹Roho iu ireerenca Jesû atîgaciînge ciîta kûûrîra îrinyeene rîrîa rîorokeru mono.

³²Antû au nî kwaarî na ngûrwe ciarîthîtue rûteere rwa kîrîma. Roho iu ireerenca Jesû aciîtîkîîrie îtonye ndeene ya ngûrwe iu. Nawe araciaa rûûtha.

³³Rîu roho iu îrauma kîrî muntû ûu, na iratonya kîrî ngûrwe. Ngûrwe iroogîa iraboorokeera rwareene na iragwa îrieene iraûrîra ku.

³⁴Rîrîa arîîthi boonere ûrîa gwakara, baramatûka na bareeta bakîîraga antû barîa baarî ntûûreene na miuundeene.

³⁵Antû baraumagara na bareeta kwona ûrîa kwaarî gûgûkarîka. Bagûkinya arîa Jesû aarî, bareethîra muntû ûrîa waathangîkagua nî roho inthûûku akari nthî akuî na magûrû ja Jesû. Bakwona muntû ûu arî na nguû na atî na nthû baraigua ûguaa mono.

³⁶Barîa baarî bakwona ûntû bûu bûgîkarîka nî beerîre antû bau ûrîa muntû ûu waarî na roho inthûûku oorerue.

³⁷Rîu antû bonthe ba nthî iu bareera Jesû aume kwaao, nîûntû bwa ûrîa baigîtue ûguaa bûbûnene. Tontû bûû, Jesû araitia gîtarûûne, na areeta.

³⁸Muntû ûu waarî akwoorua areerenca Jesû akiugaga, “Itû ga nkûthingate!” Îndî Jesû ararega na aramwîra,

³⁹“Coka kweenu ûkamenyithanie mantû jarîa Mûrungu akûthithîria.” Muntû ûu arakûrûkîîra ntûûreene akiugaga mantû jarîa Jesû aarî akûmûthithîria.

⁴⁰Rîrîa Jesû aacokere rûteere rûrîa rûngî rwa îria, nî eethîîre eeteeri nî ntundu ya antû.

⁴¹Muntû ûmwe weetagwa Jairû, ûrîa waarî mûrûngamîîri wa kîrombero nî eetîre na araigwîthia nthî akuî na Jesû na aramwerenca eete mûciî jwaawe.

⁴²Aathithîrie ûu nîûntû mwarî waawe wa mûûmwe, wa mîaka îkûmi na îîrî, nî aajîtue mono na aarî akuî gûkua. Rîrîa eetîte kîrîndî nî gîetîte kîmwatîkîte nteere cionthe.

⁴³Mûka ûmwe waarî na mûrimo jwa kuumwa nî tharike kagiita ka mîaka îkûmi na îîrî nî aarî kîrî kîrîndî kîu. Mûka ûu nî aarî agwîta kîrî ndagitarî babaingî mwanka arathiria into birîa aarî nabio îndî atabua.

⁴⁴Nî aumîre Jesû nyuma na araringithia mûthia jwa nguû ya Jesû na o ntûti tharike îratiga kuuma.

⁴⁵Nawe Jesû arooria, “Nûû ûu wandingithia?” Rîrîa antû bonthe baakanîre, Peterû arauga, “Mûritani, kîrîndî gîgwatîkîte ûû nî ûkûûria nûû wa kûringithia!”

⁴⁶Îndî Jesû arauga, “Kûrî muntû wandingithia, nîûntû nkwigua inya yauma kîrî ni.”

⁴⁷Rîrîa mûka ûu oonere atî akûmenyekana, areeta akiinainaga, na araigwîthia nthî mbere ya Jesû. Arî mbere ya antû bonthe arauga kîrîa gîatûmîre amûringithia na ûrîa aabuîre ntûti.

⁴⁸Jesû areera mûka ûû, “Mwarî, wîtîkio bwaaku bûgûtûma wabua. Ciîtîre na thîîrî.”

⁴⁹Jesû akîaragia o ûu, muntû ûmwe wa kuuma nja ya Jairû areeta kîrî Jairû na aramwîra, “Mwarî waakû agûkua, ûkathangîkia Mûritani kaîrî.”

⁵⁰Îndî Jesû akwigua ûu areera Jairû atîrî, “Ûgákîra, îtîkia akî na mwarî akabua.”

⁵¹Rîrîa Jesû akinyîre gîkaro kîa Jairû, nî aregere antû batonya nyomba îndî areetîkîîria Peterû na Johana na Jakubu amwe na îthe na ng'ina wa mwarî ûu batonya.

⁵²Antû bonthe nî baarîraga na gûkaya nîûntû bwa mwarî ûu. Îndî Jesû arabeera, “Tigeeni kûrîra; tontû mwarî atîkuîte, îndî ka amami.”

⁵³Antû bonthe baramûthekera nîûntû nî baijî mwarî nî aakuîte.

⁵⁴Îndî Jesû aragwata mwarî ûu njara na arauga na kajû, “Mwarî ûkîîra.”

⁵⁵Arariûka na arookîîra o rîmwe. Jesû arabeera barûmie mwarî biakûrîa.

⁵⁶Aciari ba mwarî ûu bararigara mono, îndî we arabakaania batîkeere muntû kinya ûmwe ûrîa gwakarîka.