Read KIMERU BIBLE PROTESTANT EDITION Luk 9 Bible Online

Luk 9 - KIMERU BIBLE PROTESTANT EDITION bible

Luk 9

¹Jesû nî eetîre aritwa barîa îkûmi na baîrî amwe, na arabaa inya na waatho bwa kwînga roho inthûûku cionthe na kworia barîa baajîtue.

²Rîu arabatûma beeta gûtûmîîria mantû jegiî Ûnene bwa Mûrungu, na kwooria barîa baajîtue.

³ Aabatûmîre akiugaga, “Bûkájûkia gantû kinya karîkû gagûtumîra rûgendoone rweenu: Bûkájûkia rûturo, kana kîondo, kana biakûrîa, kana mbeecha. Ningî bûgákamata nguû ijîîrî.

⁴Mûciî jûrîa bûkagwatwa ûgeni, kareeni ku mwanka rîrîa bûkauma ntûûreene îîu.

⁵Bûkiuma ntûûra îrîa îkarega kûbûgwata ûgeni, ringaringeni tîîri îrîa îkeethîrwa îrî magûrûûne jeenu nîkenda yaa ûkûûjî bwa kûmîgambithia.”

⁶Tontû bûû, aritwa baraumagara na bareeta bagîtumîîragia Nteto Injega na bakîoragia antû barîa baajîtue ntûûreene cionthe.

⁷ Rîrîa Herode ûrîa waarî mûnene wa nthîgûrû ya Galili, aigîrue mantû jarîa Jesû aarî akûthithia, nî aathangîkîre nkoroone mono nîûntû kûrî bo baugaga atî, “Nî Johana Mûbatithania ûriûkîte kuuma kîrî akuû.”

⁸Kûrî bangî baugaga, “Nî Elija ûracokere na bangî bakauga, ‘Nî ûmwe wa iroria birîa biatûûraga teene ûriûkîte.’”

⁹Herode arauga, “Ûu nkwigua antû bakîaria mantû jamwegiî nûû? Anga ntagitîre Johana Mûbatithania nkîngo?” Tontû bûû, Herode nî eendaga kwona muntû ûu.

¹⁰Atûmwa bagûcoka, nî beerîre Jesû jonthe jarîa baarî bakûthithia. Nawe arabatongeeria barî bonka bareeta ntûûreene yeetagwa Bethisaida.

¹¹Rîrîa kîrîndî kîamenyere kûrîa aarî agwîta, kîramûthingata mwanka ku. Jesû arabagwata ûgeni na arambîrîria kûbaritana mantû jegiî Ûnene bwa Mûrungu. Ningî arooria barîa baajîtue.

¹²Gwatua gûtûka aritwa barîa îkûmi na baîrî bareeta kîrî Jesû na baramwîra, “Rîîkania na kîrîndî gîîte ntûûreene na miuundeene îrîa îrî akuî gîgaicûîre biakûrîa na gûntû gwa kûrara nîûntû aja tûrî gûtîtwîrwe nî antû.”

¹³Îndî Jesû arabeera, “Bacwîreni gîntû gîa kûrîa.” Baramûcokeria, “Gûtî biakûrîa tûrî nabio tiga mîgaate îtaano na makûyû jaîrî akî; nonga twîîta kûgûrîra kîrîndî gîkî kîonthe biakûrîa.”

¹⁴Kîrîndî kîu kîaarî na arûme ta ngiri ithaano. Jesû areera aritwa baawe atîrî, “Beereni bakare nthî ikundi bia antû mîrongo îtaano îtaano.”

¹⁵Aritwa barathithia ûu beerîrwe, na barakarithia antû bonthe nthî.

¹⁶Rîu Jesû arajûkia mîgaate îîu îtaano, na makûyû jaîrî, na araraithîîria bwa îgûrû, na arabitharima na arabing'enyûranga. Aranenkera aritwa nîkenda bagaîra antû.

¹⁷Bonthe bararîa na baranyira; aritwa baroothûrania birîa biatigeere baroojûria ikabû îkûmi na biîrî.

¹⁸Ntukû îmwe Jesû nî aarî na aritwa baawe gûntû gûtaarî na antû akîrombaga. Arabooria atîrî, “Antû baugaga ndî ûû?”

¹⁹ Nabo baramûcokeria atîrî, “Bamwe baugaga ûrî Johana Mûbatithania na bangî bakauga ûrî Elija na kinya bangî bakauga ûrî kîroria kîmwe kîa birîa bia teene kîriûkîte.”

²⁰ Rîu arabooria, “A buî buugaga ndî ûû?” Peterû aramûcokeria atîrî, “Ûrî Mesia, kuuma kîrî Mûrungu.”

²¹Rîu Jesû arabakaania batîkeere muntû kinya ûrîkû ûntû bûu.

²²Ningî arabeera atîrî, “Mûtaana wa Muntû no mwanka athîînue mono na aregwe nî akûrû na athînjîri-Mûrungu barîa anene na aritani ba Waatho. Akooragwa îndî ariûke nyuma ya ntukû ya ithatû.”

²³ Rîu areera antû bonthe ûjû, “Këethîra muntû kinya ûrîkû nî akwenda kûnthingata, nî atige gûcienda akamate mûtharaba jwaawe ntukû cionthe anthingate.

²⁴ Nîkwîthîrwa muntû ûrîa ûkeenda kwonokia ûtûûro bwaawe akaûrîrwa nîbu. Îndî o muntû ûrîa ûkaaga ûtûûro bwaawe nîûntû bwaakwa, akoonokua.

²⁵Nî umithio bûrîkû muntû akoona, këethîra akaewa nthîgûrû yonthe îndî aage mwoyo na eenyange wengwa?

²⁶Nîkwîthîrwa muntû ûrîa ûkaigua nthao nîûntû bwaakwa kana aigue nthao nîûntû bwa ûritani bwaakwa, nîu rîrîa Mûtaana wa Muntû akeeja arî na mwago jwaawe na jwa Îthe na araîka barîa atheru, akaigua nthao nîûntû bwa muntû ûu.

²⁷Îndî ndîbwîra na mma atî kûrî bo barûngi aja batîkua mbere ya boona Ûnene bwa Mûrungu.”

²⁸ Kûrî ta ntukû inyanya nyuma ya Jesû akuuga mantû jau, nî eetîre na Peterû na Johana na Jakubu baraitia kîrîmeene kûromba.

²⁹Rîrîa aarombaga, ûthiû bwaawe na nguû nî biagarûkîre na bireerûa cwee.

³⁰Antû baîrî baraambîrîa kwaria nawe: nabo baarî Musa na Elija.

³¹Baarî na mwago jûmûnene na baraaria na Jesû ûrîa akooragîrwa Jerusalemu nîkenda mûbango jwa Mûrungu jûûjûra.

³²Îgiita rîu Peterû na bau bangî nî bamami toro îndito. Bagûûkîîra kuuma toroone baroona mwago jwaawe na baroona antû baîrî barûngi amwe nawe.

³³Rîrîa antû bau beendaga gwîta, Peterû areera Jesû atîrî, “Mûritani, bwabua tûgatûûra aja. Reka twake tûgaanda tûthatû: kamwe gaaku na kangî ka Musa na kangî ka Elija.” Îndî Peterû atamenyaga ûrîa augaga.

³⁴O akiugaga ûu, îtu rîrabakûnîkîra na aritwa baramaka mono.

³⁵ Baraigua kajû kuuma îtuune rîu gakiugaga, “Ûûjû nî Mûtaana waakwa ûrîa nthuurîte; mûthikagîîreni!”

³⁶Kajû gakîthiria kwaria baroona Jesû arî wenka. Aritwa bau nî baakirîre ki, na îgiita rîu rîonthe bateera muntû kinya ûrîkû, mantû jarîa baarî bakwona.

³⁷Rûûneene barenama baumîte kîrîmeene, na antû babaingî baramûthagaana.

³⁸Muntû ûmwe areetana, “Mûritani, ndakwerenca njû ûraithe mwana waakwa wa mûûmwe!

³⁹Roho înthûûku îmûinyaga na agakaya na akagirîka na akarita mîûjî. Ningî nî îmûthangîkagia îgiita rîrîraaja îtîkûmûrekia.

⁴⁰Naani ndîkwerenca aritwa baaku bamîînge îndî nî baremerwe.”

⁴¹Jesû aracokia, “Îbuî antû ba nthukî îtî na wîtîkio na închebûku! Ngatûûrania naabuî na mbûgwatîrîte mwanka rî? Reete mwana waaku aja.”

⁴²Mbere ya mûtaana aakinya kîrî Jesû, roho îîu îramûgwîthia nthî na aragirîka. Îndî Jesû aragondokera roho îîu nthûûku na mwana ûu arabua. Jesû aramûcokia kîrî îthe.

⁴³Antû bonthe bararigarua mono nî inya înene ya Mûrungu. Rîrîa barigarîtue nî mantû jonthe jarîa athithîtie, Jesû areera aritwa baawe,

⁴⁴“Thikîîreeni bwega nteto irîa nkabwîra nandî: Mûtaana wa Muntû agakunyaanîrwa nîkenda ooragwa.”

⁴⁵Îndî aritwa baawe bararemwa gûciûra nteto iu nîûntû bataguûrîri kûmenya gîtûmi gîacio. Nî baaremerwe kûmûûria gîtûmi kîa nteto iu nîûntû nî baarî na ûguaa.

⁴⁶ Aritwa nî baambîrîrie gûkararania bakîuranagia ûrîa mûnene nkûrûki ya bangî kîrî bo nî ûrîkû.

⁴⁷Rîrîa Jesû aamenyere ûrîa baathûgaanagia, nî aajûkîrie kaana arageeka akuî nawe

⁴⁸ na arabeera, “Muntû wonthe ûrîa ûgwataga kaana ta gaka ûgeni riîtweene rîaakwa, nî ni agwataga ûgeni. Ningî wonthe ûrîa ûngwataga ûgeni nî Ûrîa waantûmîre agwataga ûgeni. Tontû bûû, ûrîa mûnini buru kîrî buî bwinthe, nîwe ûrîa mûnene nkûrûki ya bangî.”

⁴⁹Johana aramûcokeria atîrî, “Mûritani, nî twonere muntû akîîngaga roho inthûûku agîtumagîra riîtwa rîaaku, naatuî twamûkaania nîûntû tî ûmwe weetû.”

⁵⁰Îndî Jesû aramwîra, “Bûgákania muntû ta ûu nîûntû ûrîa ûtîkûthithia mantû giutatî kîa jarîa bûkûthithia, arî na ngwatanîro naabuî.”

⁵¹Rîrîa ntukû ciaawe cia gwitia îgûrû ciaarî akuî, nî aatuîre ageeta Jerusalemu.

⁵²Aratûma antû bamwe beetaga barî mbere nîkenda bathuranîra mantû jonthe mbere ya akinya. Bagwîta baratonya ntûûreene îmwe ya nthîgûrû ya Samaria.

⁵³Îndî antû bararega kûmwîtîkîîria nîûntû eetîte Jerusalemu.

⁵⁴ Rîrîa bamwe ba aritwa baawe tabo Johana na Jakubu, boonere ûu, barooria Jesû, “Mwathani, nî ûkwenda twîtie mwanki kuuma îgûrû jûbathirie?”

⁵⁵Îndî arabaraithîria na arabakaania.

⁵⁶Rîu Jesû amwe na aritwa baawe barakûrûka na bareeta ntûûreene îngî.

⁵⁷Barî njîreene, muntû ûmwe areera Jesû, “Ngakûthingata o kunthe kûrîa ûgeeta.”

⁵⁸Jesû arauga, “Mbîrwa irî na marinya jaacio na nyoni irî na itara; îndî Mûtaana wa Muntû atî antû a kûrara.”

⁵⁹Areera muntû ûngî, “Nthingata.” Îndî muntû ûu arauga, “Mwathani, ka mpambe mbîte nthike baaba.”

⁶⁰Jesû aramwîra, “Tiga akuû bathike akuû baao; îndî gwe îta ûgatûmîîrie mantû jegiî Ûnene bwa Mûrungu.”

⁶¹ Muntû ûngî aramwîra, “Mwathani, ngakûthingata, îndî ka mpambe mbîte nkeere antû ba mûciî jwaakwa batigwe bwega.”

⁶²Jesû aramûcokeria, “Muntû wonthe akîrîmaga na mûraû akaraithîria nyuma, muntû ta ûu atîagîrîte gûtonya Ûnene bwa Mûrungu.”