Read KIMERU BIBLE PROTESTANT EDITION Kûr 1 Bible Online

Kûr 1 - KIMERU BIBLE PROTESTANT EDITION bible

Kûr 1

¹Iji nîcio nteto irîa Musa aarîîrie Aisraeli bonthe kûu rwanda bwa gaiti ya Jorodani, mûgwanthî jwa Araba jûrîa jwerekeene na Sufi, gatîgatî ka Parani na Tofeli, na Labani na Hazerothi na Dizahabu.

²Rûgendo rwa kuuma kîrîmeene gîa Sinai gwîtîîra kîrîmeene kîa Edomu mwanka mûgwanthîîne jwa Kadeshi-barinea rûjûkagia ntukû îkûmi na îmwe.

³Ntukû ya mbere ya mweri jwa îkûmi na jûmwe, mwakeene jwa mîrongo îna kuuma Aisraeli bakuuma Misri, nîrîo Musa aarîîrie antû ba Israeli akîbeeraga mantû jonthe jarîa MWATHANI aamwîrîte abeere.

⁴ Îgiita rîu nîrîo MWATHANI aarî akûûmba Sihoni mûnene wa Aamori ndweene. Mûnene ûu aatûûraga ntûûreene ya Heshiboni. Ningî omba mûnene Ogi wa Bashani, ûrîa watûûraga ntûûreene ya Ashitarothi na ya Adirei.

⁵Aisraeli barî kûu nthîgûrûûne ya Moabu, bwa gaiti ya Mûuro jwa Jorodani, Musa nî aabaeere nkuagaya ciegiî Waatho, arabeera atîrî,

⁶“Rîrîa twarî kîrîmeene gîa Sinai MWATHANI Mûrungu weetû nî aatwîrîre atîrî, ‘Nî bûthirîtie gûkara aja kîrîmeene gîkî îgiita rîrîraaja mma.

⁷Tontû bûû, ûkîîreeni bwîte nthîgûrûûne ya irîma ya Aamori, na nthîgûrû irîa baankeene nacio kûu Araba na nthîgûrû ya irîma, na bwîte mûgwanthî kunthe. Ningî bwîte rwanda rwa bwa ûmotho, na nteere cia îria rîa Mediterania na nthîgûrû ya Akanaani na ya Lebanoni, mwanka bûkinye mûuroone jûrîa mûnene jwîtagwa Eufurate.

⁸Atîrî, ni MWATHANI ndîkûbûnenkera nthîgûrû iu cionthe ciee cieenu. Îteeni ku bwigwatîre nthîgûrû irîa ni ndaaciîtîîrie biûjûjû bieenu, tabio Abrahamu na Isaaka na Jakubu atî nkabaa na mpe nchiarwa ciaao.’”

⁹Musa areera antû atîrî, “Rîrîa twaarî kîrîmeene gîa Sinai nî ndaabwîrîre atî ntîûmba kûbûtongeeria ndî ninka.

¹⁰MWATHANI Mûrungu weenu nî abûthegeetie na nî bûkwona ûrîa bwingîîte ta njota.

¹¹MWATHANI Mûrungu wa biûjûjû bieenu arotûma bûkathegea mainda ngiri nkûrûki ya ûrîa bûrî nandî, na arobutharima, o ta ûrîa aabwîrîre!

¹²Îndî nîatîa nkoombaga ninka kûbûthiragîria mathîîna jeenu na magamba jarîa bûkûndeetera?

¹³Thuureeni antû baboome na baciuki barîa baijî gûciûra mantû bwega kuuma mîîrîgeene yeenu, naani nkabaethia atongeeria beenu.

¹⁴Naabuî bûrancokeria atîrî, ‘Ûntû bûrîa watwîra nî bûbwega tûkabûthithia.’

¹⁵Tontû bûû, nî ndeetîre atongeeria ba mîîrîga yeenu, antû barîa boome na barîa baijî gûciûra mantû bwega, na ndîrabaeethia atongeeria beenu. Ndîraeethia bamwe atongeeria ba gûtongagîîria antû ngiri ngiri, na bangî ba gûtongagîîria antû îgana îgana, na bangî ba gûtongagîîria antû mîrongo îtaano îtaano, na bangî ba gûtongagîîria antû îkûmi îkûmi. Nî ndathuurîre atongeeria bangî kuuma mîîrîgeene yeenu yonthe.

¹⁶“Îgiita rîu ndîreera agambi beenu atîrî, thikagîreeni magamba ja antû beenu na bûjagiitage bwega na îota, kinya rîëethîrwa nî îgamba rîa Mûisraeli na Mûisraeli ûngî kana rîa Mûisraeli na muntû ûngî ûtî Mûisraeli.

¹⁷Bûkéendagîîreeni muntû no ûrîkû îgambeene. Bûgambagîre nkîa na itonga ûmwe nîûntû MWATHANI akabweejaga ûûme bwa kûgiitaga magamba. Îgamba rîabûrema bûndetagîre rîo nkarîgiita!

¹⁸Îgiita o rîu nî ndaabûmenyithîrie mantû jangî jarîa bûbuîri kûthithagia.

¹⁹“Nî twaumîre au kîrîmeene kîa Horebu, na tûrakûrûkîîra rwanda runthe rûrîa rûneene na rwa kûmakania rûrîa bwonere, tûrakinya nthîgûrû ya irîma ya Aamori, o ta ûrîa MWATHANI Mûrungu weetû atwîrîte. Tûreeta tûrakinya Kadeshi-barinea.

²⁰Ningî nî ndaabwîrîre atîrî, ‘Buî bûgûkinya nthîgûrû ya irîma ya Aamori, îrîa MWATHANI Mûrungu weetû agûtûnenkera.

²¹Oneeni, MWATHANI Mûrungu weenu akûbwaa nthîgûrû îîjî îrî mbere yeenu, Kûrûkeeni ku na bwigwaatîre yo ja ûrîa MWATHANI Mûrungu wa biûjûjû bieenu aabwîrîte. Bûgaakîreeni kana bûkua nkoro.’

²²Naabuî bwinthe nî bweejîre kîrî ni bûrambîîra atîrî, ‘Ga tûtûme antû mbere yeetû, nîkenda batûcûnkûûnîra nthîgûrû îîu, na batûcokerie rûteto batwîre njîra îrîa tûbuîri kûthingata na ntûûra irîa tûkeethîra.’

²³Ûntû bûu nî ndoonere bûrî bûbwega. Tontû bûû, nî ndaathuurîre antû îkûmi na baîrî beenu, o mwîrîga muntû ûmwe.

²⁴Nabo nî baumagarîre bareeta barakinya nthîgûrû ya irîma, na bareeta mwanka kîguuruune gîa Eshikoli na baragîcûnkûûna.

²⁵Bagîcoka nî beejîre bakamatîte matuunda kuuma nthîgûrûûne iu baratûretera jo, baratwîra atî, ‘Nthîgûrû îîu MWATHANI Mûrungu weetû agûtwaa nî înjega.’

²⁶ “Îndî buî nî bwaaregere waatho bwa MWATHANI Mûrungu weetû, bwarega gûtonya nthîgûrû îîu.

²⁷Nî bwaanung'unîre burî maemeene jeenu bwauga atîrî, ‘MWATHANI nî athûûri nî tuî, na kîu nîkîo gîtûmi aatûritîre nthîgûrûûne ya Misri nîkenda atûnenkanîra kîrî Aamori batûthiria.

²⁸Tûgeeta kû rîu? Antû beetû barîa tûraatûmîte bagûtûûraga nkoro na gûtwîra atîrî, Antû ba kûu barî na inya na nî babaraaja nkûrûki ya baatuî. Ntûûra cia gûntû kûu nî inene na nî imbirigîre na nthingo citîtie îgûrû mono. Ningî kinya nî twonete imuntû bibinene ja irimarimû ku.’

²⁹Naani ndîrabwîra atîrî, ‘Bûkamakua nîbo kana bûbakîra.

³⁰MWATHANI Mûrungu weenu, ûrîa ûbûtongeeretie, nîwe wengwa ûkabûrwîrîîra o ta ûrîa aabûrwîrîîre bûrî Misri bûkîonaga.

³¹ Nî bwonere kinya rîrîa bwaarî rwanda ûrîa MWATHANI Mûrungu weenu aabûmenyeerere njîreene îîu yonthe ta ûrîa mûciari amenyagîîra kaana kaawe, mwanka bûrakinya gûntû gûkû.’

³² Îndî amwe na bûu bûteetîkîrie MWATHANI Mûrungu weenu,

³³kinya këethîra nî abûtongeeretie rûgendoone rweenu akîbûcwagîra antû arîa bwamba maema jeenu. Aabûtongagîîria na mwanki ûtukû na îtu mûthenya, akîbwonagia njîra îrîa bûgeeta nayo.

³⁴ “MWATHANI nî aaigîrue nteto cieenu nawe arathûûra, araciîtia arauga atîrî,

³⁵‘Gûtî muntû no ûmwe wa antû baba ba nthûkî îîjî nthûûku ûkaigwatîra nthîgûrû înoru îrîa ndaciîtîrie nkanenkera biûjûjû bieenu.

³⁶Nonga Kalebu akî mûtaana wa Jefune, ûkaigwatîra. Naani nkaa Kalebu na nchiarwa ciaawe nthîgûrû îrîa eetîre gûcûnkûûna nîûntû nî ambathîkîîre.’

³⁷“MWATHANI nî aanthûûrîre nîûntû bweenu arambîîra atîrî, ‘Kinya gwe, Musa, ûtîkûrûka nthîgûrû îîu.

³⁸Îndî Joshua ûrîa ûgûteethagia, mûtaana wa Nuni nîwe ûgatonya ku. Mûûmîrîîrie tontû nîwe ûgatûma Aisraeli baigwatîra yo ja kiigai kîaao.’

³⁹Ningî twaana tweenu, tûrîa bwaugîre tûgatawa, ‘na aana beenu, barîa naarua batiijî kwathûrana wega kana ûûî, nîbo bagatonya ku na mbanenkere yo yee yaao.

⁴⁰Îndî buî nandî, cokeeni bûgwate njîra ya rwanda îrîa îriganîrîtie na Îria Îtuune.’

⁴¹“Naabuî nî bwancokerie bûrambîîra atîrî, ‘Tuî nî twîîrîtie MWATHANI. Tûgatonya ku na tûkarwaa o ta ûrîa MWATHANI Mûrungu weetû atwathîte.’ O muntû wonthe araikundîka mathaga ja ndwaa bûkîthûgaanagia nî bûbûûthû gûtonya nthîgûrû ya irîma.

⁴²MWATHANI arambîîra bwîîre atîrî, ‘Bûgáatonya ku kana bwîta bûrwaa, bûtîkëeje kûûrwa nî anthû beenu tontû ni ntîîthîrwa ndî amwe naabuî.’

⁴³Ûu nîu ndaabwarîîrie îndî buî bûtathikîîra. Nî ka bwaregere waatho bwa MWATHANI. Îndî bûraikumia bûratonya nthîgûrû ya irîma.

⁴⁴Nabo Aamori barîa batûûraga nthîgûrû îîu ya irîma baraumagara, barabûkuûkîra ta njûkî, barabwînga, bakîbûragaga kuuma Seiri mwanka Horima.

⁴⁵Naabuî nî bwaacokere bûrakaîra MWATHANI, îndî atabûthikîîra kana anogania naabuî.

⁴⁶Tontû bûû, nî twakarîre Kadeshi îgiita rîrîraaja.”