Read KIMERU BIBLE PROTESTANT EDITION Kûr 10 Bible Online

Kûr 10 - KIMERU BIBLE PROTESTANT EDITION bible

Kûr 10

¹MWATHANI nî eerîre Musa atîrî, “Aja mbechua ijîîrî cia maiga ikari ta irîa cia mbere, na wîje kîrî ni kûu kîrîmeene îgûrû. Ûcoke ûthithie Îthandûkû rîa mbaaû.

²Naani nkaandîka mbechueene iu nteto irîa ndaandîkîte mbechueene cia mbere irîa waunangîre. Naagwe wîkîre mbechua iu îthandûkûûne rîu.”

³Tontû bûû, nî ndaatumîre Îthandûkû rîa mbaaû cia mîgaa. Ndîracoka ndîraaja mbechua ijîîrî cia maiga ikari ta irîa cia mbere na ndîraitia nacio kîrîmeene îgûrû.

⁴MWATHANI araandîka mbechueene iu o ta ûrîa aandîkîte irîa cia mbere. Araandîka Maathana îkûmi jarîa aabwîrîre arî gatîgatî ka mwanki kûu kîrîmeene rîrîa bwoothûranîte. MWATHANI araanenkera jo.

⁵Rîu ndîragarûka, ndîreenama kuuma kîrîmeene. Ndîreekîra mbechua iu Îthandûkûûne rîrîa ndaatumîte o ta ûrîa MWATHANI ambathîte. Nacio mbechua iu irî ku mwanka nandî.

⁶ (Antû ba Israeli barauma au Beerothi-bene-jaakani arîa kwaarî na ithima bia nchiarwa cia Jaakani, bareeta Mosera. Bagûkinya Mosera, Aaroni arakua na arathikwa o kûu. Mûtaana waawe Eleazari araa mûthînjîri-Mûrungu.

⁷Kuuma au bareeta Gudigoda, na kuuma Gudigoda bareeta barakinya Jotibatha, nthîgûrû yaarî na tûmîuro tûtwingî twa rûûjî.

⁸ Kagiita kau MWATHANI nî aathuurîre mwîrîga jwa Lawi nîkenda bakamataga Îthandûkû rîa kîrîkanîro. Nîbo baamûtumîkagîra bakîtharimaga antû bagîtumagîra riîtwa rîaawe o ta ûrîa bathithagia kinya naarua tûrî.

⁹Tontû bûû, mwîrîga jwa Lawi jûtaagaîrwa gachunchî ka nthîgûrû ta ûrîa mîîrîga îîu îngî yaagaîîrwe. MWATHANI nîwe rûgai rwaao o ta ûrîa aabeerîte.)

¹⁰ “Naani, nî ndaakarîre kîrîmeene ntukû mîrongo îna, mûthenya na ûtukû o ta ûrîa ndaakarîte îgiita rîa mbere. MWATHANI araigua îromba rîakwa ararega kûbûthiria.

¹¹MWATHANI arambîîra atîrî, ‘Nandî ithuranîre wîîte ûgatongeerie antû baba, nîkenda beeta na baigwatîra nthîgûrû îrîa ndaaciîtîîrie biûjûjû bieenu atî nkabaa.’

¹²“Nandî nîmbi MWATHANI Mûrungu weenu eendaga kuuma kîrî buî Israeli? Tî kîngî tiga bûkîrage MWATHANI Mûrungu weenu na bûthithagie bunthe bûrîa abwîraga. Ningî bûmwendage na bûmûtumîkagîre na nkoro cieenu cionthe na mîoyo yeenu yonthe.

¹³Ningî bwathîkagîre Maathana na Mawaatho ja MWATHANI jarîa nkûbûritana naarua nîkenda bûtûûra bwega.

¹⁴Atîrî, îgûrû na kinya îgûrû rîriirû na nthîgûrû, na birîa bionthe birî ku nî bia MWATHANI Mûrungu weenu.

¹⁵MWATHANI eendeete biûjûjû bieenu na eenda nchiarwa iu nkûrûki ya antû ba mîgongo îrîa îngî yonthe, o ta ûrîa kûrî naarua tûrî.

¹⁶Athîkagîreeni MWATHANI na bûkáa ndemi kaîrî.

¹⁷ Tontû MWATHANI Mûrungu weenu nî Mûrungu ûkûrûkîte mîrungu ya mîng'uanano yonthe na nî MWATHANI ûkûrûkîte athani bonthe. We nîwe Mûrungu ûmûnene na wa inya, na wa gûkîrwa. Nîwe Mûrungu ûrîa ûtîthuuragia kana akukumwa.

¹⁸Nî agiitaga magamba na îota kîrî aana barîa batî na aciari. Akathithia o ûu kîrî ntigwa. Ningî nî eendaga mpinga na agacia biakûrîa na nguû.

¹⁹Tontû bûû, kinya buî eendageni mpinga nîûntû nî bwaarî mpinga nthîgûrûûne ya Misri.

²⁰Kîrageeni na bwathîkagîre MWATHANI Mûrungu weenu, na bûmûthaathagie na bûciîtagie bûgîtumagîra riîtwa rîaawe.

²¹We nîwe Mûrungu weenu ûrîa bûgatua gûkumagia, tontû nî aathithîrie mantû jamanene na ja kûrigarania bûkîonaga.

²² Ningî kinya këethîra biûjûjû bieenu biaarî antû mîrongo mûgwanja bagîîta Misri, MWATHANI Mûrungu weenu nî atûmîte baingîa ta njota.