Read KIMERU BIBLE PROTESTANT EDITION Kûr 11 Bible Online

Kûr 11 - KIMERU BIBLE PROTESTANT EDITION bible

Kûr 11

¹“Musa areera antû ba Israeli atîrî, Endageni MWATHANI Mûrungu weenu na bwathîkagîre Maathana na Mawaatho na nkuagaya ciaawe.

²Ririkaneeni naarua mantû jarîa bwiritanîte kuuma kîrî MWATHANI, nîkwîthîrwa nî buî bwoonere mantû jau îndî tî aana beenu baajoonere. Buî nî bwoonere atî MWATHANI nî nchamba na arî inya înene.

³ Nî aaringîre biama na arathithia mantû ja kûrigarania kûu nthîgûrûûne ya Misri na kîrî mûnene Farao ategeete.

⁴ Ririkaneeni ûrîa MWATHANI aathirîrie njûûrî yonthe ya Misri, arathiria mbarathi na ngaarî ciaao cia ndwaa. Naabuî nî bwoonere ûrîa MWATHANI aatûmîre rûûjî rwa Îria Îtuune rûbakondoria rîrîa beenganîte naabuî, na ûrîa abathirîtie kinya naarua tûrî.

⁵Ririkaneeni ûrîa MWATHANI aabûthithîîrie rwanda mwanka bwakinya gûntû gûkû.

⁶ Ririkaneeni ûrîa aathithîrie Dathani na Abiramu barîa baarî ataana ba Eliabu. Eliabu aarî mûtaana wa Rubeni. Nî bûkûririkana ûrîa nthîgûrû yaatûkîre îrabameria amwe na antû ba mîciî yaao, na maema jaao na nkoombo ciaao na kinya nyomoo ciaao cia ndîîthia. Gwaakarîkîre ûu antû bonthe ba Israeli bakîonaga.

⁷Buî nî bwoneete mantû jonthe jamanene jarîa MWATHANI aathithîrie.

⁸“Rîu buî athîkagîreeni Maathana jonthe jarîa nkûbwatha ntukû ya naarua, nîkenda bûgwata inya ya gûkûrûka bwigwatîra nthîgûrû îîu yaa yeenu.

⁹Naabuî bûgatûûra kagiita gakaraaja nthîgûrû îîu îrîa nthongi na îrî mûthetu jûmûnoru na ûtonga bûbwingî îrîa MWATHANI aaciîtîîrie atî akaa biûjûjû bieenu na nchiarwa ciaao.

¹⁰Nthîgûrû îrîa bwîtîte kwigwatîra yaa yeenu îtîkari ta nthîgûrû ya Misri îrîa buumîte, nthîgûrû îrîa bwaandaga mbeeû na bûkaminyîria rûûjî ja ûrîa bûminyagîria muunda jwa mboga.

¹¹Îndî nthîgûrû îrîa bwîtîte kwigwatîra nî nthîgûrû ya irîma na mîgwanthî. Nî nthîgûrû yuragîrwa nî ngai bwega, ya kûng'ana.

¹²Nî nthîgûrû îrîa MWATHANI Mûrungu weenu amenyagîîra, na akamîkaria mwaka junthe.

¹³ “Rîu nandî athîkagîreeni Maathana jonthe jarîa nkûbwatha ntukû îîjî ya naarua. Bweendage MWATHANI Mûrungu weenu na bûmûtumîkagîre na inya yeenu yonthe.

¹⁴Nawe akaurithagîria nthîgûrû yeenu ngai îgiita rîaayo rîakinya, îgiita rîa ngai ya mûratho na ya ûthima, nîkenda bûûmba gûketha maketha ja irio na ja zabibû na mîzeituni.

¹⁵Nawe akaumithia nyaki bieniine bieenu nîûntû bwa ndîîthia cieenu. Naabuî bûkeethîrwa bûrî na biakûrîa bia kûbûng'ana.

¹⁶Imenyeereeni bûtîkeeje kwangaratanua, bwathîkîra na bûthaathayia mîrungu îngî.

¹⁷MWATHANI eeja kûthûûra nî buî, na nîûntû bûu arega kuurithîria nthîgûrû yeenu ngai, naabuî bwaga maketha, na bûthira o ntûti nthîgûrû îrîa njega MWATHANI akûbwaa.

¹⁸ “Îîkageeni Maathana jaja ndabwîra nkoroone na mathûgaanioone jeenu. Bûjaogeere njareene cieenu ja rwano rwa kîmenyithania na bûjeekîre moothiû jeenu ja rwano rwa kûririkania.

¹⁹Bûritanage aana beenu jo, na bwaragie bwa jo rîrîa bûkari nthî nja cieenu, na rîrîa bwîtaîtîte na njîra kana rîrîa bûnogokeete na rîrîa bûkûrita ngûgî.

²⁰Bûjaandîkage itugîîne bia mîari ya nyomba cieenu na mpingîroone cieenu,

²¹nîkenda ntukû cieenu na cia nchiarwa cieenu ciingîa nthîgûrû îrîa MWATHANI aaciîtîrie kwaa biûjûjû bieenu yaa yaao magiita jonthe.

²²Nîkwîthîrwa bwamenyeera kwiingia Maathana jaja jonthe nkûbwatha, na bwendaga MWATHANI Mûrungu weenu, na bwathithagia ûrîa eendaga,

²³rîu MWATHANI akenga antû ba mîgongo îîu yonthe mbere ya bwîta nthîgûrûûne îîu. Rîu bûkaigwatîra nthîgûrû ya mîgongo îîu îngî îrîa îrî na inya înene nkûrûki yeenu.

²⁴ Gûntû kûrîa bûgaakinyithia îkinya rîeenu gûkaa kweenu. Nthîgûrû yeenu îkeethîrwa îrî kuuma rwanda rwa bwa gaiti mwanka irîmeene bia Lebanoni bwa rûgûrû, na kuuma mûuro jwa Eufurate bwa ûrîo mwanka îria rîa Mediterania bwa rûgûrû.

²⁵Gûtî antû bakabûmîîria ndweene nîûntû MWATHANI Mûrungu weenu agatûma bûkîrwe nthîgûrû cionthe irîa bûgeetîîra o ta ûrîa aabwîrîre.

²⁶“Atîrî naarua nî nkûbwaa kaanya ga kwithuurîra kîtharimo kana kîrumi.

²⁷Bûkaithuurîra kîtharimo këethîra bûkaathîkîra Maathana ja MWATHANI Mûrungu weenu, jarîa nkûbwatha ntukû ya naarua.

²⁸Bûkaithuurîra kîrumi këethîra bûtîathîkîra Maathana jau ja MWATHANI Mûrungu weenu, na këethîra bûgautatîra mantû jarîa abuîrîte, na bûthingate mîrungu îngî îrîa bûtiijî bwaayo.

²⁹ Rîrîa MWATHANI Mûrungu weenu agatûma bûkûrûka nthîgûrûûne îrîa bwîtîte kwigwatîra yaa yeenu, bûgatûmîîria kîtharimo bûrî kîrîmeene gîa Gerizimu, na bûtûmagîîrie kîrumi bûrî kîrîmeene kîa Ebali.

³⁰(Irîma bio-biîrî birî rûteere rwa ûmotho bwa mûuro jwa Jorodani, kûu nthîgûrûûne ya Akanaani barîa baatûûraga kîguuruune kîa Jorodani. Nîbo batûûraga bwa rûgûrû rwa More kûrîa kwaarî na mîtî ya miuuru yaathaathagîrua mîrungu akuî na ntûûra ya Giligali.)

³¹Buî bûrî akuî kuuna mûuro jwa Jorodani, bûtonye nthîgûrû îrîa MWATHANI Mûrungu weenu akûbwaa yaa yeenu. Rîrîa bûkaigwatîra yo na bûtûûre ku,

³²bûmenyagîîre kwathîkagîra Maathana na Mawaatho jonthe jarîa ndabûritana naarua.”