Read KIMERU BIBLE PROTESTANT EDITION Kûr 12 Bible Online

Kûr 12 - KIMERU BIBLE PROTESTANT EDITION bible

Kûr 12

¹Musa areera antû ba Israeli atîrî, “Jaja nîjo Maathana na Mawaatho jarîa bûkaathîkagîra burî nthîgûrû îrîa MWATHANI Mûrungu wa biûjûjû bieenu abûnenkerete bwigwatîra yo yee yeenu magiita jonthe.

²Bûmomorange buru gûntû kunthe kûrîa antû ba mîgongo îîu bathaathagîria mîrungu yaao, kwëethîrwa nî irîmeene bibiraaja kana itûmbîîne, kana rungu rwa mîtî.

³ Bûkoborange buru iritîro bia igongwana biaao, na bunange itugî bia mîrungu yaao ya mîng'uanano. Ningî bûîthîrie mûng'uanano jwa mûrungu mûka jûrîa jwîtagwa Ashera. Bûtemange mîrungu yaao na bûmîthirie buru ûrîa îtîkaarorikanwa kaîrî.

⁴“Bûkáathaathayia MWATHANI Mûrungu weenu ta ûrîa antû bau bathaathagia mîrungu yaao.

⁵Îndî buî bûkaathuura antû arîa MWATHANI Mûrungu weenu augîîte kuuma kîrî nthîgûrû cia mîîrîga yeenu yonthe nîkenda MWATHANI athaathagîrua o. Au nîo bûgeetaga.

⁶Ningî kûu nîku bûkareetaga igongwana bieenu bia gwakîîria na ichunchî bieenu bia îkûmi, na biewa birîa bweejanîte na gûciendera na igongwana bia mîciîtio. Ningî nîku bûkaritagîra iranga bia ndîîthia cieenu birî igongwana.

⁷Naabuî bûkarîîjaga igongwana biu bûrî na antû ba mîciî yeenu bûgwîrîtue. Bûkaabirîîjagîra au mbere ya kîritîro kîa igongwana. Into biu nîbio MWATHANI akeethîrwa abûtharimîte nabio.

⁸Îgiita rîu rîaakinya bûtîthaathagia Mûrungu ûrîa tûkûthithia îgiita rîrî. Tontû nandî, muntû arîthaathayia Mûrungu o ûrîa akwenda,

⁹nîûntû bûtîrakinya nthîgûrû îrîa MWATHANI Mûrungu weenu akûbwaa, kûrîa bûgaakaraga bûrî kindaajî.

¹⁰Rîrîa bûkauna mûuro jwa Jorodani, MWATHANI Mûrungu weenu akabwaa nthîgûrû ya gûtûûra yee kiigai kîeenu. Nawe akabwonokia kuuma kîrî anthû beenu barîa bakeethîrwa babûthiûrûkîrîte, bûtûûrage bûrî kindaajî.

¹¹Ningî MWATHANI Mûrungu weenu akaithuurîra antû arîa bûkamûthaathagîria. Antû au nîo bûkareetaga bionthe birîa mbwathîte bûreetage, nabio nî igongwana bieenu bia gwakîîria na igongwana bingî bieenu, na ichunchî bieenu bia îkûmi, na biewa birîa bweejanîte na gûciendera, o na biewa birîa bionthe bûciîtîrîtie MWATHANI.

¹²Ningî nîûntû bwa MWATHANI Mûrungu weenu bûkagwîrua bûrî amwe na aana beenu, na nthûûmba cieenu cia arûme na cia aka. Ningî bûkaagwîragua amwe na Mûlawi ûrîa ûrî ntûûreene yeenu nîûntû we atî na gachunchî ga kîthaka kana kiigai taabuî.

¹³Menyeereeni bûtîkeeje kûritîra igongwana bieenu bia gwakîîria o naarîa bûkwenda.

¹⁴Îndî bûritagîre igongwana bieenu bia gwakîîria antû arîa MWATHANI Mûrungu weenu akaathuura kuuma mwîrîgeene jûmwe jweenu. Antû au nîo bûkaaritagîra igongwana bieenu o ta ûrîa ndaabwîra.

¹⁵“Amwe na jau bwoomba kûthînjagîra nyomoo cieenu na bûkarîîra nyama ciaacio o kûu ntûûreene cieenu, kûringana na wendo bweenu na ûrîa bweei itharimo nî MWATHANI Mûrungu weenu. Barîa barî na mûgiro na barîa batî naju boomba kûrîa nyama iu o ta ûrîa bûrîîjaga nyama cia nthia kana cia nkûrûngû.

¹⁶ Îndî bûkáanyua kana bûrîa tharike ya nyomoo îîu. Mîîtûrageeni nthîgûrû o ta ûrîa bwîtûûraga rûûjî.

¹⁷Bûkáarîîra ichunchî bieenu bia îkûmi kûu ntûûreene cieenu, biëethîrwa birî bia irio kana bia ndibei kana bia maguta. Ningî bûkáarîjagîra kûu igongwana bia iranga bia ndîîthia cieenu kana igongwana bia mîciîtio kana igongwana birîa bûritîte na gûciendera kana igongwana bingî kinya birîkû.

¹⁸Îndî buî na aana beenu na nthûûmba cieenu cia arûme na cia aka na Mûlawi ûrîa ûrî ntûûreene cieenu, bûkarîîra igongwana biu mbere ya MWATHANI Mûrungu weenu antû arîa athuurîte. Naabuî bûkaagwîrîrua mantû jarîa MWATHANI Mûrungu weenu abûthithîrîtie.

¹⁹Menyeereeni bûtîkeeje gûtîîjîra Alawi rîrîa rîonthe bûgatûûra nthîgûrû yeenu.

²⁰“Rîrîa MWATHANI Mûrungu weenu akeethîrwa aaramîtie mîanka ya nthûgûrû yeenu, o ta ûrîa aabwîrîre, naabuî buuge atî ‘Nî nkwenda kûrîa nyama,’ nîûntû bûrî guuru yaacio, rîu no mwanka bûrîe cio o ûrîa bûkeenda.

²¹Gûkëethîrwa antû arîa MWATHANI Mûrungu weenu athuurîte a kûthaathagîrua nî araaja naabuî, rîu bwoomba kûûragîra nyomoo imwe cia ndîîthia irîa MWATHANI abweete kûu ntûûreene cieenu. Ningî bûrîîre nyama ciaacio o kûu o ta ûrîa mbwathîte, bûrîe o ûrîa bûkeenda.

²²O ta ûrîa nyama cia nthia na cia nkûrûngû irîîjagwa nî antû batî na mûgiro na barî naju, nîu bûkarîîjaga nyama iu cia nyomoo cia ndîîthia.

²³ Bûmenyeere bunka bûtîkeeje kûrîa nyama irî na tharike. Tontû nîyo mwoyo jwa nyomoo îîu.

²⁴Bûkáanyunyaga tharike. Îtûûrageeni yo nthîgûrû o ta ûrîa bwîtûûraga rûûjî.

²⁵Këethîra nî bûkwenda mantû jeenu na ja nchiarwa cieenu jeetaga bwega, athîkagîreeni mantû jau ja MWATHANI ndaabwîra. Bûkányua tharike.

²⁶Îndî bwikagie into bibitheru bieenu na biewa bia mîciîtio yeenu gûntû kûrîa MWATHANI athuurîte.

²⁷Au kîritîroone kîa igongwana kîa MWATHANI Mûrungu weenu nîo bûkaritagîra igongwana bieenu bia gwakîîria, tabio nyama na tharike. Tharike ya nyomoo cia igongwana îbuîrîte gwîtûûragîrua au kîrîtiroone kîa igongwana, îndî nyama iu cia igongwana no bûrîe cio.

²⁸Menyeereeni bwega na bwathîkîre mantû jarîa jonthe mbwathîte nîkenda mantû jeenu jonthe na ja nchiarwa cieenu irîa ikeeja nyuma yeenu jakarage bwega rîrîa bûkûthithia mantû jameega na jaagîrîte kîrî MWATHANI Mûrungu weenu.

²⁹“Rîrîa MWATHANI Mûrungu weenu agaatûma bûûmbe antû ba mîgongo îrîa bwîtîte kwigwaatîra nthîgûrû yaao, na bwathiria kwigwaatîra yo na bwatûûra ku,

³⁰bwimenyeere bûtîkeeje gwaatithua, bûthingata mantû jarîa baathithagia na bûgáatuîîria ûrîa bathaathagia mîrungu yaao bûkîenda kûthithia tabo.

³¹Bûkáthaathayia MWATHANI Mûrungu weenu ûrîa bathaathagia mîrungu yaao, nîkwîthîrwa bo bathithagia mantû jarîa MWATHANI athwîre. Baakagîîria kinya aana baao barî igongwana kîrî mîrungu yaao.

³² “Athîkagîreeni Maathana jonthe jarîa mbwathîte. Bûkáajongeera kana bûjataûra.”