Read KIMERU BIBLE PROTESTANT EDITION Kûr 13 Bible Online

Kûr 13 - KIMERU BIBLE PROTESTANT EDITION bible

Kûr 13

¹Musa areera antû ba Israeli atîrî, “Kîroria kana muntû wiijî mantû ja irooto mono oomba kwîthîrwa arî kîrî buî. Nawe akaringa biama kana akathithia mantû ja kûrigaria.

²Najo mantû jau kana biama biu bigakarîka o ûrîa akuugîîte, rîu nyumeene akabwîra atîrî, ‘Nandî twîteeni tûkathaathayie mîrungu îngî na tûmîtumîkîre,’ na mîrungu îîu bûtiijî bwaayo.

³Bûkáigua nteto cia kîroria kîu kana muntû ûu ûkabwîraga mantû ja irooto. Nîkwîthîrwa MWATHANI Mûrungu weenu nîwe ûkeethîrwa akîbûgeria nîkenda oona këethîra nî bûmwendeete na nkoro cieenu cionthe na mîoyo yeenu yonthe.

⁴Thingatageeni MWATHANI Mûrungu weenu na bûmûkîrage. Bûingagie Maathana jaawe na bwathîkagîre ûrîa augîîte. Ningî bûmûtumîkagîre na bûmûthaathagie.

⁵Îndî muntû ta ûu wa irooto kana kîroria ta kîu, abuîri kûûragwa nîûntû akeethîrwa akîbûritana ûrîa bûkárega kwathîkîra MWATHANI ûrîa waabûritîre Misri kûrîa bwaarî nkombo. Antû ta bau nîbo bagatûma bwaatie, bûrege kwathîkîra MWATHANI.

⁶“Mûtaana wa nyakwe, kana mûtaana waaku, kana mwarî waaku, kana mwekûrû waaku ûrîa wendeete mono akëeja gûkwîra na witho atîrî, ‘Twîte tûkathaathayie mîrungu îngî na tûmîtumîkîre,’ mîrungu îrîa buî kana biûjûjû bieenu bitaamenya bwaayo; bûkábathikîîra.

⁷Kinya gûkëethîrwa nî mîrungu îmwe ya antû barîa babûthiûrûkîrîte, bëethîrwa barî akûî kana barî kûraaja naabuî, kuuma mûthia jûmwe jwa nthîgûrû gwîta jûngî, bûkábathikîîra.

⁸Bûkáigua nteto ciaao kana bûbathikîîra. Ûkáamwigîîrua kîaao, ûmûtigithia kana ûmwitha.

⁹Îndî gwe îthagîrwa ûrî wa mbere kûmûgera iiga, na bangî bonthe bathingatîrie bamûûrage.

¹⁰Bûmûrage na maiga akue kubu, tontû nîwe ûreendaga kûbûteejithia njîra buuma kîrî MWATHANI Mûrungu weenu ûrîa waabûritîre Misri, kûrîa bwaarî ûkomboone.

¹¹Nabo antû ba Israeli bakaigua bwa mantû jau, na bakîre, tontû gûtî waao ûkenda kûthithia mantû jau mathûûku kaîrî gatîgatîîne keenu.

¹²“Buî bûkëeja kwigua ntûûreene imwe cieenu irîa MWATHANI Mûrungu weenu akabwaa bûtûûra atî,

¹³kûrî antû bamwe babathûûku bagûtûma antû barega kûthaathayia MWATHANI ntûûreene iu, bakîbeeraga atîrî, ‘Twîteeni, tûgatumîkîre mîrungu îngî,’ îrîa buî bûtiijî bwaayo,

¹⁴bûûrithîrie na bûcûnkûûne bwega. Ningî kwëethîrwa nî mma atî ûntû bûthûûkû ta bûu nî bûthithîtue,

¹⁵buî no mwanka bûûrage antû ba ntûûra iu, bûthirie bonthe barîa barî ku na kinya ndîîthia ciaao.

¹⁶Ningî bûûthûranie into bionthe bia antû ba ntûûra îîu oome ya ntûûra iu. Rîu bwîîthie ntûûra îîu yonthe îkare ta kîgongwana gîa gwakîîria kîrî MWATHANI Mûrungu weenu. Nayo îgakara îrî îgaanjo na rîgáakwa kaîrî.

¹⁷Gûkáagîta gantû bûtigwa nako ka birîa bibuîri kwîîthua, nîkenda MWATHANI atigana na mûthûûro jwaawe na abwigîîrue kîaao. Ningî atûme bûthegee o ta ûrîa eerîre biûjûjû bieenu

¹⁸këethîra bûkathîkîîra ûrîa MWATHANI Mûrungu weenu akûbwîra, na bwathîkîre Maathana jaawe jarîa nkûbûritana ntukû îîjî ya naarua, ningî bûthithie mantû jarîa MWATHANI Mûrungu weenu akwenda.”