Read KIMERU BIBLE PROTESTANT EDITION Kûr 14 Bible Online

Kûr 14 - KIMERU BIBLE PROTESTANT EDITION bible

Kûr 14

¹ Musa areera antû ba Israeli atîrî, “Buî bûrî antû ba Mûrungu MWATHANI weenu. Tontû bûû, rîrîa bûkûrîrîra akuû bûgaciananga mîîrî kana bwenjwa mîtwe yeenu kwoonania atî nî bwithikîrîte.

² Nîkwîthîrwa buî bûrî antû babatheru kîrî MWATHANI Mûrungu weenu. Nawe nîwe ûbûthuurîte kuuma kîrî mîgongo yonthe ya antû barîa barî nthîgûrûûne bwaa antû baawe.

³“Bûkárîîjageeni gîntû noo kîrîkû kîrî na mûgiro.

⁴Îndî bûrîîjage nyama cia ng'ombe na ng'ondu na cia mbûri,

⁵na cia nthia, na cia nkunû na cia mbûri cia kîthaka, na ng'ondu cia kîthaka na cia nkûrûngû na cia nthimba na cia nthuni.

⁶Bwoomba kûrîa kinya nyama cia nyomoo irîa ithagumagia, na irî na nchaaû ciathûkeene,

⁷îndî kîrî irîa ithagumagia kana ciathûkeene nchaaû, bûkeeja kûrîa nyama cia nyomoo iji: Nkamîîra na ngitûûjû, na nkari. Nyomoo iji irî mûgiro kinya këethîra nî ithagumagia îndî nchaaû ciaacio itîathûkeene.

⁸Bûtîbuîrîte kûrîa nyama cia ngûrwe kinya këethîra irî nchaaû ciathûkeene nîûntû itîthagumagia. Ningî bûkaaringithia biimba bia ngûrwe.

⁹Nyomoo irîa itûûraga rûûjîîne irîa bûûmba kûrîa nyama ciaacio nî irîa irî mathagu na mathendû.

¹⁰Nyomoo irîa itî na mathagu kana mathendû irî na mûgiro na bûtîbuîrîte kwirîa.

¹¹“Bûrîîjage nyoni cionthe irîa itî na mûgiro.

¹²Îndî bûkárîa nyoni iji: Rwîgî na nderi na ndiiû,

¹³kaîgîgî na mpûngû na irîa ingî ikari ja cio.

¹⁴Ningî bûkárîa irîa ikari ta nkûngûrû

¹⁵ona thirai na kiumbara, na mûkunî na nkoru na irîa ingî ikari tacio.

¹⁶Ona na ntuntuguru na nyange, na nyoni ingî cia mwîrîga jwa ntuntuguru.

¹⁷Ningî bûkárîa nkoru na namîûkî na kînyerethi;

¹⁸Ona namîtoori na nkuru na irîa ikari tacio. Ona kîtheegere na kîreere.

¹⁹Ningî bûkárîa tûnyomoo tûrîa tûrî mathagu tontû tûrî na mûgiro.

²⁰Îndî bwoomba kûrîa tûnyomoo ta tûu twethîrwa tûtî na mûgiro.

²¹ “Bûkárîa nyomoo îkuîte na bwaayo. Îndî nyama cia nyomoo ta iu ciomba kûrîîwa nî antû ageni barîa bûrî nabo ntûûreene cieenu. Kana bûkabeenderia nyama iu nîûntû buî bûrî antû babatheru kîrî MWATHANI Mûrungu weenu. “Bûkáruga kang'ondu kana kabûri na îria rîa ng'ina.

²² “Ritageeni gîchunchî kîmwe kuuma kîrî ichunchî îkûmi bia maketha jonthe ja irio birîa bûgaakethaga miuundeene yeenu o mwaka o mwaka.

²³Nabio ichunchî biu bieenu bia îkûmi bia irio, na ndibei na bia maguta na bia iranga bia ng'ombe, na bia mbûri na bia ng'ondu cieenu, bûbirîîjagîre mbere ya MWATHANI Mûrungu weenu, antû arîa we athuurîte nîkenda athaathagîrua o. Bwathithia ûu bûkeethîrwa bûgîkîra MWATHANI Mûrungu weenu ûrîa kwagîrîte magiita jonthe.

²⁴Ningî gûkëethîrwa arîa bûtûûraga nî antû araaja mono ûrîa bûtîûmba gwikia ichunchî bieenu bia îkûmi birîa MWATHANI Mûrungu weenu abûtharimîte nabio,

²⁵rîu bûbiendie biume mbeecha. Bûcoke bûkamate mbeecha iu bûciikie gûntû kûrîa MWATHANI Mûrungu weenu athuurîte a kûthaathagîrua.

²⁶Bûrî kûu, bûgûre na mbeecha iu gîntû kîonthe kîrîa bûkenda, ta ng'ombe kana ng'ondu, kana ndibei kana nchoobi. Naabuî bûnyue na bûrîe na bûgwîrue bûrî au mbere ya MWATHANI Mûrungu weenu, bûrî na antû ba mûciî jweenu.

²⁷Ningî bûkóragîrua nî Alawi barîa batûûraga ntûûreene cieenu nîûntû batî na gîchunchî kîa nthîgûrû kana kiigai kîrî buî.

²⁸“Mûthia jwa mwaka jwa îthatû, bûreetage ichunchî bieenu bia îkûmi bionthe bia maketha jeenu, bûbiîke nchukuune irîa irî ntûûreene cieenu.

²⁹Nabo Alawi na mpinga na barîa bakuîri nî beethe na ntigwa irîa itûûraga ntûûreene cieenu bageetaga nchukuune iu bakarûma biakûrîa bia kûng'ana. MWATHANI Mûrungu weenu nawe akaabûtharimaga ngûgîîne cieenu cionthe irîa bûritaga.”