Read KIMERU BIBLE PROTESTANT EDITION Kûr 15 Bible Online

Kûr 15 - KIMERU BIBLE PROTESTANT EDITION bible

Kûr 15

¹Musa areera antû ba Israeli atîrî, “O mûthia jwa mwaka jwa mûgwanja junthe, bûrekagîre antû barîa barî na marandû jeenu.

²Nayo njîra ya kûrekanîra nî îîjî: O muntû ûrîa weejanîte îrandû kîrî mûtûûri waawe kana mûtaana wa ng'ina atîîtia rîo kaîrî nîûntû MWATHANI nî augîîte jarekagîrwe.

³Bwoomba kûrîyia mpinga îrandû îndî bûtîbuîrîte kûrîyia antû beenu bongwa.

⁴“Ningî gûtîîthîrwa kûrî na nkîa nthîgûrûûne yeenu îrîa MWATHANI Mûrungu weenu akabwaa bwigwatîra yaa yeenu,

⁵bunka akî këethîra bûkaathîkîra ûrîa MWATHANI Mûrungu weenu abwîraga na bwathîkîre Maathana jaawe, jarîa nkûbûritana ntukû ya naarua.

⁶MWATHANI Mûrungu weenu akabûtharimaga o ta ûrîa aabwîrîre. Naabuî bûgakobithagia antû ba mîgongo îmingî marandû, îndî buî bûtîîthîrwa bûrî na ûbatu bwa gûkooba. Ningî bûkaathaga mîgongo îmingî, îndî gûtîju jûkabwathaga.

⁷ “Gûkëethîrwa kûrî na nkîa no îmwe kîrî buî kûu ntûûreene îrîa irî nthîgûrû îrîa MWATHANI Mûrungu weenu akabwaa, bûkágîa ngoga bûrega kûmîteethia.

⁸Mûkoobithieni kîrîa kîonthe akeenda.

⁹Bwimenyeere bûtîkeeje kûgîa mathûgaanio jamathûûku nkoroone cieenu na bûciîra atî; ‘Mwaka jwa mûgwanja, mwaka jwa ûrekeri bwa marandû jûrî akuî,’ naabuî bûmena nkîa îîu yeenu, na bûrega kûmînenkera gantû no karîkû. Nawe akaîra MWATHANI nîûntû bweenu, MWATHANI akabûtara bûrî eeyia.

¹⁰Nenkagîreeni nkîa bûciendereete bwingwa, na nkoro cieenu itî na ngoga. Naabuî bwathithia ûu MWATHANI akaabûtharima ngûgîîne cieenu cionthe irîa bûrîtaga.

¹¹ Gûtî rîo nkîa ikaûra nthîgûrûûne. Tontû bûû, ndîbwatha atî bûteethagie antû beenu, na barîa barî na ûbatu na nkîa nthîgûrûûne.

¹² “Ûkëeja kûgûra nkombo ya ntûmûrûme kana mûka, Mûhibirania, îgagûtumîkîra mîaka îtantatû. Naagwe ûmîrekagîîrie aciîtîre mwaka jwa mûgwanja.

¹³Ûkáreka auma gwaaku eeta njara intheri.

¹⁴Kuuma kîrî birîa MWATHANI akûtharimîte nabio, ûmînenkagîre ûgwîrîtue bimwe biaabio. Ûmînenkagîre ng'ondu, na irio bia kûruga na ndibei.

¹⁵Ririkanageeni bwaarî nkombo nthîgûrûûne ya Misri na MWATHANI Mûrungu weenu abwonokia. Kîu nîkîo gîtûmi nkûbwatha ntukû ya naarua.

¹⁶“Îndî nkombo iu ikëeja gûkwîra itîkwenda kuuma gwaaku nîûntû nî akwendeete na eenda mûciî jwaaku na nîûntû nî bûtûûranagia nawe bwega,

¹⁷rîu ûkajûkia mûtumi ûmûtûre gûtû bûrî au mwariine jwa nyomba yaaku. Nawe akaa nkombo yaaku ûtûûroone bwaawe bunthe. O ûu nîu ûkathithia na nkombo yaaku ya mûka.

¹⁸Ûkáairira, ûkîrekeeria nkombo yaaku îciîtîra, nîûntû nî îkûritîrîte ngûgî mîaka îtantatû ûkîmûrîaaga nusu ya mûchaara jwa nthûûmba yaaku yaandîki. Wathithia ûu, MWATHANI Mûrungu waaku agakûtharima mantûûne jonthe jarîa ûkathithagia.

¹⁹ “Nenkagîreeni MWATHANI Mûrungu weenu iranga bionthe bia ng'ombe, kana bia ng'ondu cieenu. Bûkáaritithia ndeegwa ya kîranga ngûgî noo îrîkû, kana bweenja guee ya ng'ondu ya kîranga.

²⁰Buî na antû ba mûciî jweenu bûkarîîjagîra iranga biu mbere MWATHANI Mûrungu weenu o mwaka o mwaka. Bûkaabirîîjagîra antû arîa MWATHANI Mûrungu weenu athuurîte athaathagîrua.

²¹Kîranga kîu gîkëethîrwa kîrî na antû athûûku kana gîtîkwona kana kîonji gîkáritagîrwa MWATHANI Mûrungu weenu kîrî kîgongwana.

²²Rîîjagîreeni iranga ta biu ntûûreene cieenu. Antû barîa batî na mûgiro kana barîa barî naju boomba kûrîa nyama cia iranga biu o ta ûrîa bûrîjaga cia nthia kana cia nkûrûngû.

²³ Îndî bûkéeja kûnyua tharike yaabio. Îndî mîtûûrageeni nthî o ta ûrîa bwîtûûraga rûûjî.”