Read KIMERU BIBLE PROTESTANT EDITION Kûr 16 Bible Online

Kûr 16 - KIMERU BIBLE PROTESTANT EDITION bible

Kûr 16

¹ Musa areera antû ba Israeli atîrî, “Kûngwagîreeni MWATHANI Mûrungu weenu mweriine jwa Abibu. Nîkwîthîrwa ûgoro bûmwe bwa mweri jûu nîbu Pasaka, rîrîa MWATHANI Mûrungu weenu aabûritîre Misri.

²Naabuî bûritagîre MWATHANI Mûrungu weenu kîgongwana gîa Pasaka kuuma kîrî nyomoo cia ndîîthia cieenu cia ng'ombe na ng'ondu kana mbûri. Bûritagîre kîgongwana kîu arîa MWATHANI Mûrungu weenu aithuurîrîte athaathagîrua.

³Bûkarîîjanagîria nyama cia kîgongwana kîu na mîgaate îtîkîri mûtheega jwa kwimbithia. Îndî bûrîîjage mîgaate îtîîkîri mûtheega jwa kwimbithia ntukû mûgwanja, o ta ûrîa bwaathithîrie rîrîa bwaaumaga nthîgûrûûne ya Misri na mpwîî. Mîgaate îîu nayo îgeetagwa Mîgaate ya mîthangîko, nîûntû îkabûririkanagia îgiita rîonthe ntukû îrîa bwaaumîre kûrîa bwaathangîkagua.

⁴Nthîgûrûûne yeenu gûkéethîrwa kûrî na muntû ûrî na mûtheega jwa kwimbithia mîgaate îgiita rîa ntukû mûgwanja. Nacio nyama cia kîgongwana kîu ibuîrîte kûrîîjagwa ûgoro o bûu ikathira na igáakinyia rûkîîrî.

⁵“Bûkéeja kûthînjîra nyomoo ya kîgongwana kîa Pasaka ntûûreene no îmwe cia irîa MWATHANI Mûrungu weenu abweete.

⁶Îndî ritagîreeni igongwana biu gûntû kûrîa MWATHANI Mûrungu weenu athuurîte a kûthaathagîrua. Bûritage bio ûgoro, îgiita ta rîrîa bwaaumîre Misri.

⁷Naabuî bûtherûkie nyama iu na bûrîîre cio antû arîa MWATHANI Mûrungu weenu athuurîte. Rûkîîrî bûgwate njîra bwaane nja cieenu.

⁸Rîîjageni mîgaate îtîkîri mûtheega jwa kwimbithia ntukû ithanthatû na ntukû ya mûgwanja bûûthûranage amwe nîkenda bûthaathayia MWATHANI Mûrungu weenu. Bûkarita ngûgî noo îrîkû ntukû îîu ya mûgwanja.

⁹ “Tarageeni biumia mûgwanja kuuma rîrîa bûkambagîîria gûketha irio miuundeene.

¹⁰Biumia biu biathira, bûthithie mambura ja Maketha nîkenda bûkumia MWATHANI Mûrungu weenu bûkîmûreetagîra biewa bieenu bia gûciendera o kûringana na ûrîa MWATHANI Mûrungu abûtharimîte nabio.

¹¹Ningî buî amwe na aana beenu na nthûûmba cieenu na Alawi barîa batûûraga ntûûreene cieenu, na mpinga na nkîa na ntigwa irîa itûûranagîra naabuî, bûgwîrîrue bûrî au mbere ya MWATHANI Mûrungu weenu, antû arîa athuurîte nîkenda athaathagîrua o.

¹²Iingagieeni Maathana jaja bûkîririkanaga atî buî bwaarî nkombo nthîgûrûûne ya Misri.

¹³ “Rîrîa bûkaathiria kûûra birîa bûketheete, na bûthirie gwootora ndibei imiiriine, rîu bûkûngwîre mambura ja tûgaanda ntukû mûgwanja.

¹⁴Bûkûngwîre mambura jau bûrî amwe na aana beenu, na nthûûmba cieenu na Alawi na mpinga na nkîa na ntigwa irîa itûûranagia naabuî.

¹⁵Bûkûngwîre mambura jau ntukû mûgwanja bûgîkaathaga MWATHANI Mûrungu weenu bûrî antû arîa athuurîte a kûthaathagîrua. Tontû MWATHANI Mûrungu weenu akatharima maketha jeenu na atharime ngûgî cieenu. Naabuî bûgakaraga bûgwîrîtue magiita jonthe.

¹⁶“Arûme beenu bonthe bakeejaga mbere ya MWATHANI Mûrungu weenu antû arîa akaathuuraga a kûthaathagîrua. Nabo bakathithagia ûu maita jathatû o mwaka. Îgiita rîa mambura ja Pasaka na îgiita rîa mambura ja Maketha na îgiita rîa mambura ja tûgaanda. Nabo gûkágîta wîja njara intheri mbere ya MWATHANI.

¹⁷O muntû aikagie into kûringana na ûrîa MWATHANI Mûrungu weenu akethagîrwa amûtharimîte.

¹⁸“Thuurageni agambi na atongeeria ntûûreene cieenu cionthe irîa MWATHANI Mûrungu weenu akabwaa, kûringana na mîîrîga yeenu. Nabo bagambaîre antû ûrîa kwagîrîte.

¹⁹ Bûkéeja gûkombokia ûûma, na bûthuuria bûgîtua magamba. Bûgetîkîîria gûkukumwa, nîûntû nkukumo nîka îthûûkagia muntû, na îgatûma îota rîrega kûthingatwa.

²⁰Îgiita rîonthe thingatageeni ûûma akî, nîkenda bûgatûûra nthîgûrû îrîa MWATHANI Mûrungu weenu akûbwaa yee kiigai kîeenu.

²¹ “Bwatua gwaka kîritîro kîa igongwana kia MWATHANI Mûrungu weenu bûkágiakaga akuî na itugî bia mûrungu jwa mûng'uanano jwa Ashera.

²² Ningî bûkéeja gwaka itugî bia maiga bia kûthaathagîria mîrungu ya mîng'uanano nîûntû MWATHANI Mûrungu weenu nî amîthûûrîte mono.”