Read KIMERU BIBLE PROTESTANT EDITION Kûr 19 Bible Online

Kûr 19 - KIMERU BIBLE PROTESTANT EDITION bible

Kûr 19

¹ Musa nî eerîre antû ba Israeli atîrî, “Rîrîa MWATHANI Mûrungu weenu akathiria antû ba mîgongo îrîa akûbûnenkera nthîgûrû yaao, naabuî bwigwatîre yo amwe na ntûûra ciaao na nja ciaao ciee cieenu,

²rîu bakathuura ntûûra ithatû nthîgûrûûne îîu MWATHANI Mûrungu weenu akabûnenkera yaa yeenu.

³Bwînje barabara ku, na bûgaanie nthîgûrû îrîa MWATHANI Mûrungu weenu akaabwaa ichunchî bithatû, nîkenda muntû ûrîa ûkooraga ûngî, akamatûkaga gwiciitha ku.

⁴Muntû akëeja kûûragana atîkwenda na akamatûka ntûûreene îmwe ya iu, akanooka. Muntû akëeja kûûragana na muntû ûrîa ooraga atîraarî na ûthû nawe mbereene îîu,

⁵kwa ngerekano, rîrîa muntû eetanagia na ûngî mwitûûne gûtema mîtî, nawe agokîîria ntûûru nayo îgakûûka îkaringa muntû ûrîa bagûkarî nawe îkaamûûraga. Muntû ûu ûgûtemaga mîtî omba kûmatûka gwiciitha ntûûreene îmwe ya irîa ithatû na akoonoka atîkooragwe.

⁶Îndî gûkeethîrwa ntûûra nî îmwe, nayo îkëethîrwa îrî kûraaja mono ûrîa muntû ûrîa ûûraganîre atîûmba kûmatûka na mpwîî, nabo antû ba muntû ûu ûkuîre nîûntû bwa marûrû bakeengana nawe, bakamûgwatîra njîreene atîrakinya, na bakamûûraga kinya këethîra batîraarî na ûthû nawe mbereene. Muntû ta ûu atîbuîri kûûragwa.

⁷Tontû bûû, ndîbwatha, bwathûre ntûûra ithatû.

⁸Ningî rîrîa MWATHANI Mûrungu weenu akaaraamia mîanka ya nthîgûrû yeenu, o ta ûrîa aciîtîîrie biûjûjû bieenu, na abûnenkere nthîgûrû yonthe îrîa aciîtîrie akanenkera biûjûjû bieenu,

⁹rîu bûkathuura ntûûra ingî ithatû cia kûmatûkaga gwiciitha, bunka këethîra bûkaathîkîra Maathana jonthe jarîa nkûbwatha ntukû îîjî ya naarua, na bwende MWATHANI Mûrungu weenu na bûthithagie mantû jarîa abuîrîte.

¹⁰Thithieni ûu, nîkenda antû batî na maatia batîkeeje kûûragîrwa nthîgûrû îrîa MWATHANI Mûrungu weenu akûbûnenkera yaa kiigai kîeenu, na bwîja kûgîa îgi rîa kûûragana.

¹¹Îndî rîrîa muntû akeethîrwa athûûri nî muntû ûngî, na amwiciithîre na amûûrage, na nyumeene amatûke ntûûreene îmwe ya îîu ithatû nîkenda atîûragwa,

¹²rîu atongeeria ba ntûûra îrîa aumîte bagatûmana agwatwe kuuma ntûûreene îîu, na bamûnenkanîre kîrî muntû ûrîa ûkwenda kwirîîria. Nawe muntû ûu wooraganîte ooragwe.

¹³Buî bûkáaigîrua mûûragani ûu kîaao, îndî bûthirie îgi rîu rîa kûûragana kuuma Israeli, nîkenda mantû jeenu jabua.

¹⁴ “Bûgákûûrakûûra mîanka ya mûtûûri waaku îrîa yekîrwe o mbere kûu nthîgûrûûne îrîa bûkaigwaatîra yee kiigai kuuma kîrî MWATHANI Mûrungu weenu.

¹⁵ “Ûkûûjî bwa muntû ûmwe bûtîûmba gûtûma muntû ûngî atuîrwa nî athûûkîtie. Îndî ûkûûjî bwa antû baîrî kana bathatû nîbu bûmba gûtûma muntû atuîrwa nî athûûkîtie.

¹⁶Muntû akëeja gûtuîrîîra ûngî mantû jatîo,

¹⁷bobaîrî bageeta kîrî athînjîri-Mûrungu na agambi barîa bakûrita ngûgî îgiita rîu au mbere ya MWATHANI.

¹⁸Nabo agambi bau bakagambithia antû bau bwega. Nawe mûkûûjî ûu akëeja kwoneka nîka agûtujagîîra muntû ûngî mantû jatîo,

¹⁹bûmûkanûkie na îkanûkia rîrîa akwendaga muntû ûu ûngî akanûkua narîo. Ûu nîu bûkaathiria ûthûûku ta bûu buume kîrî buî.

²⁰Tontû antû bau bangî bakaigua ûrîa kûrakarîkîre, na bakîre, na gûtî we ûkomîîria kaîrî kûthithia ûntû bûbûthûûku ta bûu.

²¹ Naabuî bakáiganagîîrua kîaao mantûûne ta jaja. Îndî muntû ûûraganîte no mwanka ooragwe. Muntû ûtûrîte ûngî riitho no mwanka atûrwe rîaawe; muntû ûkûûrîte ûûngî îîgo no mwanka akûûrwe rîaawe. Ningî muntû ûrîa ûgiitîte muntû ûngî njara no mwanka agiitwe yaawe, na ûrîa ûkagiita muntû ûngî kûgûrû no mwanka kwaawe kûgiitwe.”