Read KIMERU BIBLE PROTESTANT EDITION Kûr 20 Bible Online

Kûr 20 - KIMERU BIBLE PROTESTANT EDITION bible

Kûr 20

¹Musa nî eerîre antû ba Israeli atîrî, “Rîrîa bûgeetaga kwithûkîra anthû beenu barîa bakethagîrwa barî na mbarathi inyingî na ngaarî cia ndwaa inyingî, o amwe na njûûrî înene nkûrûki ya yeenu, bûkaabakîrageni. Nîkwîthîrwa MWATHANI Mûrungu weenu ûrîa waabûritîre nthîgûrûûne ya Misri akethagîrwa arî amwe naabuî.

²Rîrîa bûkethagîrwa bûrî akuî kwithûka, mûthînjîri-Mûrungu akaumîra au mbere, akaarîria njûûrî.”

³Nawe akamîîra atîrî, “Thikîîreeni buî njûûrî ya Israeli. Naarua bwîtîte ndweene kûrwaa na anthû beenu. Bûkáguaa kinya anini. Bûgaákîra kana bwinaina kana bûmaka nîûntû bwaao.

⁴Nîkwîthîrwa MWATHANI Mûrungu weenu arî amwe naabuî. Nîwe ûkaabûrwîrîîra, na ombe anthû beenu.

⁵“Mûthînjîri-Mûrungu aathiria kwaria, atongeeria ba njûûrî bakooria njûûrî îîu atîrî, ‘Nî ûrîkû kîrî buî wakîte nyomba înjerû na atîramîrugûra? Muntû ta ûu nî acoke nja yaawe, atîkeeje kûûragîrwa ndweene, muntû ûngî eeja kûrugûra nyomba îîu.

⁶Nî muntû ûrîkû aja waandîte muunda jwa mîzabibû na atîrarûma nzabibû cia yo? Kinya we nî acoke nja yaawe, atîkeeje kûûragîrwa ndweene, muntû ûngî eeja kûgwîrîrua maketha ja nzabibû iu.

⁷Ningî nî muntû ûrîkû ûragambagia mwarî îndî atîramûjûkia aa mwekûrû waawe? Kinya we nî acoke nja yaawe, atîkeeje kûûragîrwa ndweene, mwarî ûu ajûkua nî muntû ûngî.’

⁸“Atongeeria bageeta na mbere kûûria asikarî ba njûûrî atîrî, ‘Kûrî muntû ûrî aja ûgûkîra na akwigua atîûmba kûrwaa? Kinya we nî acoke nja yaawe atîkeeje gûtûma asikarî bangî bagîa ûguaa tawe.’

⁹Nabo atongeeria bathiria kwarîria njûûrî, atongeeria ba antû bathuurwe.

¹⁰“Rîrîa bûgakinya akuî na ntûûra îrîa bwîtîte kwithûkîra, eejageni antû ba ntûûra iu kaanya ga kwinenkanîra kîrî buî.

¹¹Nabo bakëeja gûcokia atî nî thîîrî bakwenda ningî bakabûrugûrîra mpingîro cia ntûûra ciaao, rîu antû ba ntûûra iu bakaa nkombo cieenu na babûritagîre ngûgî.

¹²Îndî antû ba ntûûra îîu bakarega gûcwaa thîîrî naabuî, bakenda ndwaa, cîgîîrieni ntûûra îîu.

¹³Rîrîa MWATHANI Mûrungu weenu akabûnenkera ntûûra îîu bûmîûmbe ndweene, bûûrage arûme bonthe ba ntûûra îîu.

¹⁴Îndî bwitaîre aka na twaana twaao, na nyomoo cia ndîîthia na bingî bionthe birîa birî ntûûreene îîu yaao. Naabuî bûgwîrîrue into bia gûtaa birîa MWATHANI Mûrungu weenu akeethîrwa abûnenkerete.

¹⁵Ûu nîu bûkathithagîria ntûûra cionthe irîa ikethagîrwa iirî kûraaja naabuî, irîa itî cia nthîgûrû irîa bwîtîte gûtûûra.

¹⁶“Îndî bûgátigaria no mbi ntûûreene cia mîgongo îrîa MWATHANI Mûrungu weenu akabwaa irî kiigai kîeenu.

¹⁷MWATHANI aabwîrîre bûthirie antû bonthe ba Hiti, na ba Amori, na ba Kanaani, na ba Perizi, na ba Hivi na ba Jebusi.

¹⁸Bûkathithia ûu, nîkenda batîkeeje kûbûritana mantû jamathûûku jarîa bathithagia, bakîthaathayia mîrungu yaao. Bûkëeja kûbaathîkîra, nîka bwîîria MWATHANI Mûrungu weenu.

¹⁹“Rîrîa bûkaithûkagîra ntûûra na bûkamîcîgîîria îgiita rîrîraaja, bûkárîîkaga mîtî îrîa îciaraga matuunda nîûntû kinya buî bwoomba kûrîa matuunda jaayo. Bûkárîîka mituunda îîu nîûntû tîyo anthû beenu.

²⁰Rîkageeni akî mîtî îrîa matuunda jaayo jatîrîîjagwa nîkenda bûrûûndanîîra mîtî îîu kûthiûrûkîra ntûûra îîu nîkenda bûmîtaa.”