Read KIMERU BIBLE PROTESTANT EDITION Kûr 21 Bible Online

Kûr 21 - KIMERU BIBLE PROTESTANT EDITION bible

Kûr 21

¹“Bûkëeja kwîthîra muntû oragi atigwa nau kîeniine nthîgûrûûne îrîa MWATHANI Mûrungu weenu akabwaa yaa yeenu na bûtîkûmenya nûû ûmûûragîte,

²atongeeria beenu na agambi bageeta bathime kuuma au muntû ooragîri mwanka ntûûra îrîa îrî akuî.

³Nabo atongeeria ba ntûûra îrîa îrî akuî na muntû ûu ûûragi, bajûkie mwari îrîa îtaritithua ngûgî kana îkuuchia mûraû îkîrîma.

⁴Beete nayo mûgwanthîîne jwa mûuro jûrî na rûûjî rûkwînama. Mûgwanthî jûu jwîthîrwe jûtarîmwa kana jwaandwa. Rîu booragîre mwari îîu ku.

⁵Nabo athînjîri-Mûrungu, tabo nchiarwa cia Lawi, beethîrwe barî o, nîkwîthîrwa MWATHANI Mûrungu weenu nî abathuurîte bamûtumîkagîra na batharimanaga bagîtumagîra riîtwa rîaawe. Rîu ûrîa bakaagiita kûthithue u.

⁶Nabo atongeeria bonthe ba ntûûra îîu îrî akuî na antû arîa muntû ooragîri, bakathambîria njara ciaao au îgûrû rîa kiimba kîa mwari îîu au mûgwanthîîne,

⁷bakiugaga atîrî, ‘Tuî, tîtuî tûragîte muntû ûûjû, na tûtoona akîûragwa.

⁸Itû MWATHANI, tûrekere tuî antû baaku ba Israeli, barîa gwe wonokerie na ûgáatûma ûthûûku bwa kûûraga muntû ûûjû bûtûgwata.’

⁹Bwathithia ûrîa MWATHANI akwenda, bûkaathiria ûthûûku bûu bwa kûûragwa kwa muntû ûtî na maatia.

¹⁰“Rîrîa bûkaithûkîra anthû beenu na MWATHANI Mûrungu weenu atûme bûbombe na bûbatae,

¹¹na woone mûka ûmûthongi ûrîa gwe ûkwenda kuuma kîrî atae bau aa mwekûrû waaku,

¹²mûjûkie ûmwikie nja yaaku. Bwakinya eenje nchiûri cia mûtwe na agiite nkunyû cia biara bia njara.

¹³Nyuma arite nguû irîa agwîkîrîte agîtawa, eekîre ingî. Acoke arîrîre aciari baawe arî nyomba yaaku mweri junthe. Nyuma ya ûu ûkamûgûra ae mwekûrû waaku.

¹⁴Îndî ûkëeja kwona atîgûkûgwîria, ûmûrekeerie eete o kûrîa akeenda, îndî ûkáamwendia kana ûmweethia nkombo yaaku nîûntû nî ûmûtheengerete.

¹⁵“Kwombîka mûkûrû akeethîrwa arî na eekûrû baîrî, ûmwe ûrîa endete, na ûngî ûrîa atîendeete mono. Nabo bakamûciarîra ataana. Îndî mûtaana wa mbere akeethîrwa nî wa mwekûrû ûrîa ûtîendi.

¹⁶Rîrîa agakara kwigaa kîrî ataana baawe, atîbuîri kûgaîra mûtaana wa mwekûrû ûrîa eendeete kiigai kîa mûtaana wa kîranga wa mwekûrû ûrîa atîendeete.

¹⁷Îndî abuîrîte kûgaira mûtaana wa mwekûrû ûrîa atîendeete ichunchî biîrî bia rûgai rwaawe nîûntû nîwe mûtaana waawe wa kîranga.

¹⁸“Muntû akëeja kwîthîrwa arî na mûtaana ntîrîka na ndemi, ûrîa ûtigagua kana athîkîra îthe kana ng'ina kinya këethîra nî bakûmûkanûkia,

¹⁹aciari baawe bamûjûkie bamwikie kîrî atongeeria ba ntûûra yaao au mpingîroone ya kûrîa atûûraga.

²⁰Nabo aciari babeere atîrî, ‘Mûtaana ûûjû weetû nî ndemi na nî ntîîrîka. Atîtwathîkagîra na nî atumagîra mbeecha bûbûthûûku na nî mûnyui wa nchoobi.’

²¹Rîu arûme bonthe ba ntûûra îîu bakamûraga na maiga mwanka akue. Ûu nîu bûkaathiria ûthûûku na Aisraeli bonthe barîa bakaigua nteto iu bagaakîra.

²²“Muntû akëeja kûthithia ûthûûku bûrîa bûgatûma öragwa, na akooragwa naju mwîrî jwaawe jûgacuurua mûtîîne îgûrû,

²³ bûkáreka mwîrî jwaawe jûrara au mûtîîne ûtukû bunthe. Îndî no mwanka bûmûthike ntukû o îîu yongwa nîûntû muntû ûcuurîtue nî ûmûrume nî Mûrungu, na bûtîbuîrîte gwîkîra îgi nthîgûrû îrîa MWATHANI Mûrungu weenu akabwaa ja kiigai kîeenu.”