Read KIMERU BIBLE PROTESTANT EDITION Kûr 22 Bible Online

Kûr 22 - KIMERU BIBLE PROTESTANT EDITION bible

Kûr 22

¹ Musa nî eerîre antû ba Israeli atîrî, “Ûkëeja kwona ng'ombe kana ng'ondu ya muntû îthaûkîte ûkámîtiganîria o ûu, mîcokie kîrî mwene.

²Îndî mwene akëethîrwa atûûraga kûraaja kana ûtîmwijî, mîjûkie ûmikie gwaaku, na ûmîîke mwanka rîrîa mwene akeeja, kûmîcwaa rîu ûmûnenkere.

³O ûu nou ûkathithia na ntigiri ya muntû ûngî, ningî kinya na nguû kana gîntû o kîrîkû kîûrîte naagwe ûgakîona.

⁴“Woona ntigiri kana ng'ombe ya muntû ûngî îgwîte, ûkaamîtiga o. Ûmûgwaatie kûûmîûkîîria.

⁵“Mûka agékagîra nguû irîa ciîkagîrwa nî arûme kana ntomûrûme eekîra nguû irîa ciîkagîrwa nî aka. Tontû MWATHANI Mûrungu weenu nî ameneete muntû ûrîa ûkaathithagia ûu.

⁶“Ûkëeja kwona gîtara kîa nyoni, mûtîîne kana nthîgûrû, kîrî na twanaana kana nkome, na ng'ina îguîkîrîte, ûkájûkia ng'ina.

⁷Ûbuîri kûrekeeria ng'ina îgeeta, îndî woomba kûjûkia twanana twaayo. Wathithia ûu ûgatûûra bwega na ûtûûre îgiita rîrîraaja.

⁸“Rîrîa ûgwaka nyomba yaaku înjerû, waakage rûthingo mûng'eng'eene jwa îgûrûgûrû nîkenda muntû atîkeeje kûgwa aumîte ku akua, nyomba yaaku îgwaatwa nî mûgiro.

⁹ “Ûkáandanîria imera bingî na mîzabibû. Wathithia ûu biu bionthe bikaa bia kwaathûrîrwa MWATHANI.

¹⁰“Ûkárîma na ng'ombe ithekanîrîîtue na ntigiri.

¹¹“Ûgékîra nguû îtumi na guee yungenue na bamba.

¹² “Bûtumagîîre nyanje nteere cio-inya cia nguû cieenu irîa bwîkagîra.

¹³“Ntûmûrûme akëeja kûgûra mwarî aa mwekûrû waawe, na nyumeene akëeja kwigua atîkwenda mûka ûu,

¹⁴na akamwandîîra mantû ja nthoni na ja ûrongo akiugaga atîrî, ‘Ndîragûrîre mûka ûûjû, na ndîkûmûthengeera ndaigua tî karaiti.’

¹⁵Îgiita rîu, aciari ba mûchiere ûu bagaikîria atongeeria ba ntûûra îîu mpingîroone into bia kwonania atî, mwarî waao aarî karaiti akîgûrwa.

¹⁶Îthe wa mûchiere ûu akeera atongeeria bau atîrî, ‘Ndaaeejanîre mwarî waakwa aa mwekûrû wa muntû ûûjû. Îndî muntû ûûjû atîkûmwenda nandî.

¹⁷Nî amwandîîrîte mantû ja nthoni akiugaga atî ataarî karaiti akîmûgûra.’ Rîu aciari batambûrûkie chuka ya mûranû jwa mûchiere ûu bakîîraga atongeeria atîrî, ‘Bibi nî into bia kwonania atî mwarî weetû aarî karaiti mbere ya amûgûra.’

¹⁸Atongeeria boona ûu, bajûkie ntûmûrûme ûu bamûûre ibooko

¹⁹na bamûtuîre baini ya fetha îgana nîûntû nî eekîrîte mwarî wa Mûisraeli îgi. Fetha iu inenkerwe îthe wa mûchiere ûû. Nawe mûchiere ûu agatûûra arî mûka wa ntûmûrûme ûu magiita jonthe.

²⁰“Îndî gûkëeja kwîthîrwa mathitango jau nî ja mma, atî mwarî ûu ataarî karaiti akîgûrwa,

²¹bûmuumagarie mpingîroone ya mûciî jwa îthe arîa atongeeria boothûranaga. Rîu bûmûûrage na maiga. Nîkwîthîrwa nî athithîtie ûthûûku bûbûnene Israeli, bwa ûmaramari mbere ya agûrwa. Ûu nîu bûkathiragia ûthûûku ta bûu kuuma kîrî buî.

²²“Muntû akëeja kwoneewa akîthûngîîra na mwekûrû wa muntû ûngî, bobaîrî no kûragwa bakooragwa. Ûu nîu bûkaathiragia ûthûûku kuuma kîrî buî.

²³“Ntomûrûme akëeja gûtirimana na mwarî ûgambagua nî ntûmûrûme ûngî kûu ntûûreene na akamûthengeera,

²⁴bûbaûmagarie bobaîrî mpingîroone ya ntûûra yaao, na bûboorage na maiga. Mwarî akooragwa tontû atiugîre mbu eeja gûtuunyûkua anarî ntûûreene ndeene; na ntomûrûme nawe agaakua nîûntû bwa kûthûûkia mwekûrû wa muntû ûngî. Ûu nîu bûkathiragia ûthûûku ta bûu kuuma kîrî buî.

²⁵“Îndî ntomûrûme akëeja kûgwatîra mwarî ûkûgûrwa nî ntomûrûme ûngî, ithakeene kûrîa gûtî na antû akuî, na akamûkiinda na akamûthengera kwa inya, ntomûrûme ûu nîwe wenka ûkooragwa.

²⁶Îndî mwarî atîringithua, tontû atîthithîtie ûthûûku bwa gûtûma ooragwa. Ûntû bûu athithîtie no ûmwe na ûrîa muntû aithûkagîra ûngî, akamûûraga.

²⁷Nîkwîthîrwa ntomûrûme aamwîthîîre kîthakeene kûrîa gûtaarî na antû na kinya mwarî arîngîuga mbu, gûtîngîonora muntû wa kûmûtunyûkia.

²⁸ “Ntomûrûme akëeja gûtirimwa agwatîte mwarî ûtîgambagua, na akamama nawe kwa inya,

²⁹ntomûrûme ûu no mwanka anenkere îthe wa mwarî ichunchî mîrongo îtaano bia fetha birî rûracio nîûntû bwa kûthengeera mwarî waawe. Ntomûrûme ûu nawe agûre mwarî ûu ae mwekûrû waawe nîûntû nî aamûthûûkîrie na atîbuîrîte kûmwînga noo rî.

³⁰ “Gûtî mûtaana ûbuîri kûgûra mwekûrû wa îthe kana amama na mwekûrû noo ûrîkû wa îthe.”