Read KIMERU BIBLE PROTESTANT EDITION Kûr 23 Bible Online

Kûr 23 - KIMERU BIBLE PROTESTANT EDITION bible

Kûr 23

¹Musa nî eerîre antû ba Israeli atîrî, “Gûtî ntomûrûme waakûrî kana ûgiti ûrûme ûbuîri kwîthîrwa arî kîûthûranoone gîa antû ba MWATHANI.

²“Muntû ûrîa ûchiari nî antû batîgûreene, na kinya nchiarwa cia muntû ta ûu mwanka nthukîîne ya îkûmi, batîbuîri kwîthagîrwa barî kîûthûranoone kîa antû ba MWATHANI.

³ “Gûtî Mûamoni kana muntû wa kuuma nthîgûrûûne ya Moabu, kana nchiarwa ciaao mwanka nthukîîne ya îkûmi ûbuîrîte kwîthagîrwa arî kîûthûranoone kîa antû ba MWATHANI.

⁴ Tontû nî baaregere kûbûrûmia biakûrîa kana babûkundia rûûjî rîrîa bwaarî njîreene buumîte Misri. Ningî nî baakomborete Balaamu, mûtaana wa Beori kuuma ntûûreene ya Pethori nthîgûrûûne ya Mesopotamia nîkenda abûruma.

⁵ Îndî MWATHANI Mûrungu weenu atáathikîîra bwa Balaamu, îndî nîka aagarûrîre irumi biaawe biraa itharimo kîrî buî, tontû MWATHANI Mûrungu weenu nî abweendeete.

⁶Bûgátuma thîîrî nabo kana bwirîrîîria ûthinyaari bwaao ûtûûroone bweenu bunthe.

⁷“Bûkámena muntû wa kuuma nthîgûrû ya Edomu, nîûntû nî wa ndûgû cieenu. Ningî bûkámena muntû wa kuuma Misri nîûntû nî bwaarî ageni nthîgûrû yaao.

⁸Nchiarwa ciaao cia kuuma nthukîîne ya ithatû gwîta na mbere; boomba gwîtîkîîrua beethîrwa barî kîûthûranoone kîa antû ba MWATHANI.

⁹“Bûkëeja kuumagara kambîîne bwîtîte kwithûkîra anthû beenu, bûmenyagîîre bûtîkaathithie ûntû noo bûrîkû bûbûthûûku bûrîa bûûmba gûtûma bûgwaatwa nî mûgiro.

¹⁰Muntû akëeja kûgwatwa nî mûgiro nîûntû bwa kwiratha ûtukû arî kîrootoone amami, nî aumagarage oome ya kambî, akarage nao.

¹¹Narîo riûa rîrî akuî kûthwaa, nî eete athambe. Rîu ûgoro bwaakinya, noo acoke kambîîne.

¹²“Bwîthagîrwe bûrî na antû amwe oome ya kambî, arîa bûgeetaga gwiteethia.

¹³Ûgakamatanagîria mûrwa na mathaga jaaku ja ndwaa. Rîrîa ûkeenda gwiteethia, wambe wînje kariinya na mûrwa jûu, na wathiria gwiteethia, ûkunîkîre kîoro gîaaku.

¹⁴Nîkwîthîrwa MWATHANI Mûrungu weenu ariûngariûngaga kambîîne yeenu nîkenda abwonokia na atûma bûûmba anthû beenu ndweene. Tontû bûû, kambî yeenu no mwanka îthagîrwe îrî întheru, nîkenda atîkeeje kwona rûko rîu abwîrûkîra.

¹⁵“Nkombo îkëeja kûmatûka kuuma kîrî mwene waayo îkeeja kîrî buî, bûkámîcokagia kîrî mwene.

¹⁶Nî îtûûranagie naabuî gûntû kûrîa îkaithûrîra yongwa ntûûreene cieenu. Bûkámîthithagîria mantû jamathûûku.

¹⁷ “Gûkágîta muntû wa Israeli, ethîrwa arî mûka kana ntomûrûme, waa mûmaraya eeta gûtumîkîra kîromberoone kîa mîrungu ya mîng'uanano.

¹⁸Rîrîa bûkarîaga mûciîtio o junthe kîrî MWATHANI, bûkárîaga na mbeecha ciumeenie na ûmaraya, bwethîrwa bûrî bwa mûka kana ntomûrûme. Nîkwîthîrwa MWATHANI Mûrungu weenu nî amenete ûntû bûû mono.

¹⁹ Mûisraeli akëeja gûkooba mbeecha, kana irio kana gîntû kîngî kîrîa kîîthagîrwa kîrî na maciara, atîbuîrîte kûrîaga maciara.

²⁰Îndî mpinga woomba kûmîkoobithia na ûkajûkia maciara ja birîa ûmîkobithîtie. Îndî bûgákobithia Mûisraeli bwîrîgîrîte kwona maciara, nîkenda MWATHANI Mûrungu weenu abûtharima mantûûne jeenu jonthe jarîa bûkethagîrwa bûrî najo nthîgûrûûne îrîa bwîtîte kwiigwatîra yaa yeenu.

²¹ “Ûkëeja gwîka mûciîtio kîrî Mûrungu MWATHANI waaku ûntû o bûrîkû, ûkáthaa kûûjûria ûntû bûu. Tontû MWATHANI Mûrungu waaku akeenda ûûjûria mûciîtio jwaaku, na kûrega kûjûûjûria nî meeyia.

²²“Îndî ûkärega gûciîtia tî meeyia.

²³Ûmenyagîîre kûûjûragia mantû jarîa jonthe uugîîte, nîûntû ûciîtîrîtie MWATHANI Mûrungu weenu wendeete gwengwa.

²⁴“Rîrîa weeta muundeene jwa mîzabibû jwa muntû ûngî, woomba kûrîa nzabibû o ûrîa ûkwenda. Îndî ûgákamata wîîta nacio.

²⁵Rîrîa ûgakûrûkagîîra muundeene jwa nkano jwa muntû ûngî noo ûtuujage nkano ûkarîa îndî ûgaakethaga na gachiû.”