Read KIMERU BIBLE PROTESTANT EDITION Kûr 24 Bible Online

Kûr 24 - KIMERU BIBLE PROTESTANT EDITION bible

Kûr 24

¹ Musa areera antû ba Israeli atîrî, “Kwombîka ntomûrûme akagûra mwekûrû. Nyumeene akoona mwekûrû ûu atîkûmûgwîria nîûntû bwa ûthûûku bûrîa arî nabu. Mûkûrû nî aandîkîre mwekûrû barûga ya gûtigana buru na akamûnenkera yo, rîu amwînge kwaawe. Mwekûrû nawe akauma ku eete.

²Mwekûrû ûu agëeta akagûrwa nî ntomûrûme ûngî, akaa mwekûrû waawe.

³Gûgakara atî kinya mûkûrû ûu wa baîrî nawe akëëthîrwa atîkûng'anîrwa nî mwekûrû ûu, na akamwandîkîra barûga ya gûtigana buru, na akamûnenkera yo, akamwînga nja yaawe, kana mûkûrû ûu akëeja gûkua,

⁴ntomûrûme ûrîa wagûrîte mwekûrû ûu mbere atîbuîrîte kûmûgûra kaîrî, nîûntû mwekûrû nî athûkîîtue. Tontû MWATHANI nî athwîre ûntû ta bûu. Naabuî bûkáathûkia nthîgûrû îrîa MWATHANI Mûrungu akûbwaa îrî kiigai, na mantû ta jau.

⁵“Muntû akëeja kûgûrana agéetaga ndweene kana aandîkwa ngûgîîne noo îrîkû mwaka jûmwe jûtîthiri, nîkenda agwîrîrua mûchiere waawe.

⁶“Gûkágîta muntû ûjûkia iiga kana nthie ya kûthia mûtu eeka nîkenda arîwa gîntû akoobithanîtie. Ûkäthithia ûu, ûgaatûma mûciî jwa muntû ûrîa ûkobithîtue jûrîîwa nî mpara.

⁷ “Mûisraeli akëeja kwiya Mûisraeli ûngî na akamweethia nkombo yaawe kana akamwendia, Mûisraeli ûu nî abuîri kûûragwa. Ûu nîu bûkaathiragia ûthûûku bûu buume kîrî buî.

⁸ “Rîrîa bûkägwatwa nî mûrimo jwa mûtigiri, bwimenyeere mono na bûthithie ûrîa athînjîri-Mûrungu ba mwîrîga jwa Lawi bakûbwoneeria bûthithie na bûjûrie jarîa jonthe mbwîrîte.

⁹ Rikanageeni ûrîa MWATHANI Mûrungu weenu athithîîrie Miriamu rîrîa bwaarî njîreene bumîte Misri.

¹⁰ “Wakobithia muntû gîntû, ûkamûthingata nyomba yaawe wîta kûjûkia gîntû noo kîrîkû gîa kûgwatîîra mbere ya akûrîa îrandû rîaaku.

¹¹Eteera oome mwene akûretere kîo au.

¹²Mwene akëethîrwa arî nkîa, ûkáraara na gîntû kîu akûnenkeere.

¹³Gûkëethîrwa muntû ûu akûnenkeere rwambambio ûgwatîîra, ûmûcokerie ru mbere ya riûa rîthwaa nîkenda arûtumîra kwiguîkîra na akûtharima. Rîu MWATHANI Mûrungu waaku akagwîrua nî ûntû bûu.

¹⁴ “Ûkéeja kwayia nthûûmba yaaku îrîa îrî nkîa îrîa waandîkîte, kinya yeethîrwa nî Mûisraeli kana mpinga îrîa îtûûraga ntûûreene cieenu.

¹⁵Mûrîage mbeecha ciaawe mbere ya riûa rîthwaa, nîûntû nî nkîa na nîcio erîgîrîte atîkeeje gûkaîra MWATHANI nîûntû bwaaku na MWATHANI agûkanûkia.

¹⁶ “Aciari batîbuîrîte kûûragagwa nîûntû bwa meeyia ja aana baao kana aana booragagwa nîûntû bwa meeyia ja aciari baao. O muntû akooragagwa nîûntû bwa meeyia jaawe wengwa.

¹⁷ “Ûkéeja kwogoria mma yegiî mpinga, kana kaana gatî na aciari, kana ûtuunya ntigwa nguû yaawe îrî gîntû gîa kûgwatîîra mbere ya arîaa îrandû.

¹⁸Ririkaneeni atî bwaarî nkombo nthîgûrûûne ya Misri na MWATHANI Mûrungu weenu arabûkûûra kuuma ku. Kîu nîkîo gîatûma mbwîra mantû jau.

¹⁹ “Ûkëeja kûûrîrua nî kîthûmba gîa nkano rîrîa ûgûketha nkano muundeene jwaaku, ûgágîcokera. Nî gîtigwe nîûntû bwa mpinga, na aana barîa batî na aciari na ntigwa. Wathithia ûu MWATHANI Mûrungu waaku agakûtharima ngûgîîne ciaaku cionthe.

²⁰“Wäketha mîzeituni rîa mbere, ûgacokeeria kûmîketha rîa jaîrî. Maciara jarîa jagaatigara nî ja mpinga na aana barîa batî na aciari na ntigwa.

²¹Wäketha nzabibû muundeene jwaaku, ûgacoka gûketha irîa itigeere. Nîkwîthîrwa iu itigeere nî cia mpinga na aana barîa batî na aciari, na ntigwa.

²²Ririkaneeni atî bwaarî nkombo nthîgûrûûne ya Misri. Tontû bûû, nîkîo nkûbûmenyithia mantû jau.”