Read KIMERU BIBLE PROTESTANT EDITION Kûr 26 Bible Online

Kûr 26 - KIMERU BIBLE PROTESTANT EDITION bible

Kûr 26

¹Musa nî eerîre antû ba Israeli atîrî, “Rîrîa bûgakinya nthîgûrû îrîa MWATHANI Mûrungu weenu akabwaa îrî kiigai, na bwigwatîre yo, na bûtûûre ku,

² bûjûkie maciara ja mbere ja imera bionthe bia miuunda yeenu jarîa bûgaaketha kuuma nthîgûrû îrîa MWATHANI Mûrungu weenu akabwaa. Ningî bûjeekagîre ikabûûne na bûjaikagie antû arîa MWATHANI Mûrungu weenu akaithurîra athaathagîrua.

³Bûcoke bwîte kîrî mûthînjîri-Mûrungu ûrîa ûkûrita ngûgî îgiita rîu bûmwîre atîrî, ‘Nî tûgûtûmîîria ntukû ya naarua atî tûgûkinya nthîgûrûûne îrîa MWATHANI aaciîtîîrie biûjûjû bieetû atî agatwaa yo.’

⁴Rîu mûthînjîri-Mûrungu akaajûkia ikabû biu na abiîke nthî au mbere ya kîritîro kîa igongwana kîa MWATHANI.

⁵Naabuî bûrî au mbere ya MWATHANI Mûrungu weenu buuge atîrî, ‘Kîûjûjû gîeetû kîaarî gîa kuuma nthîgûrûûne ya Aramu. Nî kîeereeraga kuuma gûntû mwanka gûntû kungî. Nî gîetîre gûtûûra Misri kîrî mpinga. Rîrîa gîetîre ku, kîaarî na nchiarwa inkai îndî nî ciathegeere na iraa mûgongo jûmûnene jûrî na inya.

⁶Amisri nabo baratûthangîkia mono na baratûritithia ngûgî indito tûrî nkoombo.

⁷Rîu naatuî tûrakaîra MWATHANI Mûrungu wa biûjûjû bieetû. MWATHANI aratwigua na aroona mîthangîko yeetû, na ûrîa twainyîîrîîtue tûkîritithagua ngûgî indito.

⁸MWATHANI nî aatûritîre Misri na inya na kîaao kîaawe, nyuma ya kûthithia mantû ja kûmakania na kûringa biama bia kûrigarania.

⁹Nî aatûretere gûkû na aratwaa nthîgûrû îîjî îrîa nthongi na îrî mûthetu jûmûnoru na ûtonga bûbwingî.

¹⁰Nandî-rî, tûkûreeta maketha ja mbere ja nthîgûrû îrîa gwe MWATHANI ûtûnenkerete.’ Rîu ûbiîke nthî au mbere ya MWATHANI Mûrungu weenu na bûmûthaathayie bûrî au.

¹¹Naabuî bûkagwîrîrua into bionthe bibiega birîa MWATHANI Mûrungu weenu abweete. Bûgwîrague bûrî na antû ba mîciî yeenu, na Mûlawi na kinya mpinga irîa igaatûûranagia amwe naabuî.

¹² “Rîrîa bûkaathiria kûnenkanîra gîchunchî kîmwe kuuma kîrî ichunchî îkûmi kîa maketha jeenu mwakeene jwa îthatû, nîûntû mwaka jûu nîju ichunchî biu bikaaritagwa; bûbinenkanagîre kîrî Alawi na mpinga na aana barîa batî na aciari na ntigwa nîkenda kinya bo, barîe na banyire barî ntûûreene cieenu.

¹³Rîu bûkauga bûrî mbere ya MWATHANI weenu atîrî, ‘Tûkûrita gîchunchî kîrîa kîtheru kuuma mîciî yeetû. Naatuî tûkûnenkanîra kîo kîrî Alawi na mpinga na aana barîa batî na aciari na ntigwa kûringana na ûrîa uugîîte kûthithague. Gûtî rîathana rîaaku noo rîmwe tûtîathîkîrîte kana tûûrîrua nîrîo.

¹⁴Gûtî bio bia ichunchî biu bia îkûmi twaarîa rîrîa twaithikîrîte kana twaarita rîrîa twaarî na mûgiro kana tûrita kîrî kîewa kîrî akuû. Nî twaakwathikîîre na twathithia ûrîa waatwîrîte gwe MWATHANI Mûrungu weetû.

¹⁵Raithîîria ûrî gîkaroone gîaaku kîrîa kîtheru kûu îgûrû. Tharima antû baaku ba Israeli na nthîgûrû îrîa gwe ûtweete, îrîa nthongi na îrî mûthetu jûmûnoru na ûtonga bûbwingî o ta ûrîa waaciîtîîrie biûjûjû bieetû.’

¹⁶“Naarua MWATHANI Mûrungu weenu nî akûbwatha atî bwaathîkîre Maathana na Mawaatho jaawe. Tontû bûû, menyeereeni bûjaathikîîre buru na nkoro na moyo jweenu junthe.

¹⁷Buî bûgûtua naarua atî MWATHANI nîwe Mûrungu weenu, na bwauga bûkamwathîkagîra na bûûjûragie Maathana na Mawaatho jaawe jonthe na bwathîkagîre ûrîa akaabwîraga.

¹⁸ MWATHANI agûtua naarua atî buî bûrî kîrîndî kîaawe o ta ûrîa aciîtîrie. Naabuî athîkagîreeni Maathana jaawe jonthe.

¹⁹Bwathithia ûu agaatûma bûgîe inya nkûrûki ya mîgongo îngî yonthe îrîa oombîte. Ningî bûkaagîa nkuma na îgweta na bwîkagîîrwe nî antû bangî. Bwee kîrîndî gîkîtheru kîrî MWATHANI Mûrungu weenu, o ta ûrîa augîîte.”