Read KIMERU BIBLE PROTESTANT EDITION Kûr 27 Bible Online

Kûr 27 - KIMERU BIBLE PROTESTANT EDITION bible

Kûr 27

¹Îgiita rîu Musa na atongeeria ba Israeli nî beerîre antû atîrî, “Athîkîreeni Maathana jonthe jarîa tûkûbwatha naarua.

² Naabuî ntukû îrîa bûkauna Jorodani bûkinye nthîgûrû îrîa MWATHANI Mûrungu weenu akabwaa, bûjûkie maiga jamanene bûjeeke amwe, rîu bûjeereerie na îrundu.

³Naabuî bwaandîke îgûrû rîajo Maathana jonthe. Bûthithie ûu rîrîa bûgaakinya nthîgûrû îrîa nthongi na îrî mûthetu jûmûnoru na ûtonga bûbwingî o îrîa MWATHANI Mûrungu wa biûjûjû bieenu aabûciîtîrîtie.

⁴Naabuî rîrîa bûkauna Jorodani, bwîîke maiga jau ndabwîra bwaajo jeereretue na îrundu kîrîmeene kîa Ebali.

⁵ Bûcoke bwakîre MWATHANI Mûrungu weenu kîritîro kîa igongwana. Bûgîake na maiga jatîaji.

⁶Nîkwîthîrwa rîrîa bûgwakîra MWATHANI Mûrungu weenu kîritîro kîa igongwana no mwanka bûgîake na maiga jatîaji. Au nîo bûkaritagîra igongwana bieenu bia gwakîîria.

⁷Ningî bûritagîre igongwana bia gûcwaa thîîrî o na bûbirîîjagîre o, na bûgwîrîtue au mbere ya MWATHANI Mûrungu.

⁸Naabuî bwaandîke bwega îgûrû rîa maiga jau jathingi na îrundu Maathana jonthe.”

⁹Musa na athînjîri-Mûrungu ba mwîrîga jwa Alawi bareera antû bonthe ba Israeli atîrî, “Kireeni ki na bûthikîîre, buî antû ba Israeli. Naarua bûkwaa kîrîndî kîa MWATHANI Mûrungu weenu.

¹⁰Tontû bûû, bwathîkagîre ûrîa akabwîraga na bûûjûragie Maathana jaawe na Mawaatho jaawe jarîa nkûbûnenkera naarua.”

¹¹Ntukû o îîu Musa areera antû atîrî,

¹² “Rîrîa bûkauna Jorodani, antû ba mîîrîga îîjî nîbo bakarûngama kîrîmeene gîa Gerizimu nîkenda batharima antû. Nabo nî ba mwîrîga jwa Simioni, na jwa Lawi na jwa Juda na jwa Isakari na jwa Josefu na jwa Benjamini.

¹³Antû ba mîîrîga îîjî nabo bakarûngama kîrîmeene kîa Ebali nîkenda barumana. Nabo nî ba kuuma mwîrîgeene jwa Rubeni, na jwa Gadi, na jwa Asheri, na jwa Zebuloni na jwa Dani na jwa Nafutali.

¹⁴Nabo Alawi bagaatûmîîria kîrî Israeli bakiugaga atîrî,

¹⁵ “‘Kîrumi kîrogwata muntû ûrîa ûkaithithîria mîrungu ya mîng'uanano ya kwaja kana ya gûkerûra, mîrungu îîu îthithagua nî atea, na îthaathagîrua withoone. MWATHANI nî ameneete mîng'uanano îîu mono.’ Nabo antû bonthe bacokie bauge, ‘Amen.’

¹⁶ “‘Kîrumi kîrogwata muntû ûrîa ûtîeejaga aciari baawe gîtîîo.’ Antû bonthe bauge, ‘Amen.’

¹⁷ “‘Kîrumi kîrogwata muntû ûrîa ûkûrakûraga mwanka jwa muunda jwa ûrîa baankeene nawe.’ Antû bonthe bakauga, ‘Amen.’

¹⁸ “‘Kîrumi kîrogwata muntû ûrîa ûtejithagia mûtumuumu njîra.’ Antû bonthe nabo bagetîkîîria bakiugaga, ‘Amen.’

¹⁹ “‘Kîrumi kîrogwata muntû ûrîa ûtûmaga mpinga na aana barîa batî na aciari na ntigwa barega gûtuîrwa îgamba na îota.’ Antû bonthe nabo bagetîkîîria bakiugaga, ‘Amen.’

²⁰ “‘Kîrumi kîrogwata muntû ûrîa ûkathengeera ng'ina, nîûntû nî aagîrîte îthe nthoni.’ Antû bonthe nabo betîkîîrie bakiugaga, ‘Amen.’

²¹ “‘Kîrumi kîrogwata muntû ûrîa ûkathengeera nyomoo ya mûthemba noo jûrîkû.’ Antû bonthe nabo betîkîîrie bakiugaga, ‘Amen.’

²² “‘Kîrumi kîrogwata muntû ûrîa ûkathengeera mwarî wa ng'ina, kinya eethîrwa tî ba îthe ûmwe kana ng'ina ûmwe.’ Antû bonthe nabo betîkîîrie na bauge, ‘Amen.’

²³ “‘Kîrumi kîrogwata muntû ûrîa ûkathengeera mwekûrû wa mûthoni waawe.’ Antû bonthe nabo betîkîîrie bakiugaga, ‘Amen.’

²⁴“‘Kîrumi kîrogwata mûtûûri ûrîa ûkooraga muntû ûngî na witho.’ Antû nabo betîkîîrie bakiugaga, ‘Amen.’

²⁵“‘Kîrumi kîrogwata muntû ûrîa ûgakukumwa ooraga muntû ûtî na maatia.’ Antû bonthe nabo betîkîîrie bakiugaga, ‘Amen.’

²⁶ “‘Kîrumi kîrogwata muntû ûrîa ûtîîtîkania na Mawaatho jau na kûjaathîkîra.’ Nabo antû bonthe betîkîîrie bakiugaga, ‘Amen.’”