Read KIMERU BIBLE PROTESTANT EDITION Kûr 28 Bible Online

Kûr 28 - KIMERU BIBLE PROTESTANT EDITION bible

Kûr 28

¹ Musa nî eerîre antû ba Israeli atîrî, “Bwäthîkîra ûrîa MWATHANI Mûrungu weenu akûbwîra, na bûmenyeere kwiingia Maathana jarîa nkûbwatha naarua, MWATHANI Mûrungu weenu agaatûma bûgîe inya nkûrûki ya mîgongo yonthe nthîgûrûûne.

²Nabio itharimo bibi bikaa bieenu buru bunka akî bwathîkîra ûrîa MWATHANI Mûrungu weenu akûbwîra.

³“MWATHANI akaatharima ntûûra cieenu na miuunda yeenu.

⁴“MWATHANI akaatharima aana beenu, na maciara ja miuunda yeenu, na maciara ja nyomoo cia ndîîthia.

⁵“MWATHANI akaatharima maketha jeenu na irio birîa bûkarugaga kuumania kîrî jo.

⁶“MWATHANI akaatharima ngûgî cieenu irîa bûritaga.

⁷“MWATHANI agatûma anthû beenu barîa bakabwithûkîra boombwe ndweene. Bakeeja kûbwithûkîra barî amwe, îndî gûtî asikarî waao ûkaana njîra îmwe na ûngî.

⁸“MWATHANI akaatharima into birîa bûgeekaga nchukuune cieenu na atharime ngûgî cionthe irîa bûkaaritaga nthîgûrûûne îrîa akabwaa.

⁹“MWATHANI akabweethia kîrîndî kîaawe gîkîtheru, o ûrîa abûciîtîîrie, këethîra bûkaathîkagîra Maathana jaawe na bûthithagie ûrîa eendeete.

¹⁰Nabo antû bonthe ba nthîgûrû bakaamenya atî bûrî ba MWATHANI na bakaabûkîraga.

¹¹MWATHANI agaatûma bûtonge na akathegeiya nchiarwa cieenu, na ng'ombe cieenu na îrîo bia miuunda yeenu îrîa îrî nthîgûrûûne îrîa MWATHANI eerîre biûjûjû bieenu atî akabwaa.

¹²MWATHANI akarugûra mûthithû jwaawe îgûrû, nîkenda abuurithîria ngai nthîgûrû yeenu îgiita rîaayo rîakinya, na atharime ngûgî cionthe cia njara cieenu. Naabuî bûgakobithagia mîgongo îmingî îndî buî bûtîkobaga.

¹³MWATHANI akabweethia atongeeria îndî tî atongeerua. Ningî bûkathinyaara mono na gûtî rîo bûkaaga gîntû. Bunka këethîra bûkathîkagîra Maathana ja MWATHANI Mûrungu weenu, jarîa nkûbûritana naarua.

¹⁴Bûririkanage bwathîkagîre Maathana jau na bûkáthaathayia kana bûtumîkîra mîrungu ya mîng'uanano.

¹⁵“Îndî buî bwärega kwathîkîra MWATHANI Mûrungu weenu, na kwiingia Maathana jaawe jonthe na Mawaatho jaawe jarîa nkûbwatha naarua, rîu bûkagwatwa nî irumi bibi:

¹⁶“Ntûûra cieenu na miuunda yeenu îrogwatwa nî kîrumi.

¹⁷“Maketha jeenu na birîa bûkaarugaga kuumania nabio birogwatwa nî kîrumi.

¹⁸“Kîrumi kîroogwata aana beenu, na maciara ja miuunda yeenu, na ja ng'ombe, na ja ng'ondu na ja mbûri cieenu.

¹⁹“Kîrumi kîrobûgwata bûkîrita ngûgî cieenu cionthe.

²⁰“MWATHANI agatûma bûgwatwe nî irumi na bwangaratane, na bûkue nkoro ngûgîîne cieenu cionthe irîa bûkûrita, mwanka bûûragwe na bûthirue buru. Tontû bwa ûthûûku bûrîa bûkeethîrwa bûthithîtie bwa kwîrûkîra MWATHANI.

²¹MWATHANI agatûma bûgwatwe nî mîrimo mwanka rîrîa akaabûthiria nthîgûrûûne îrîa bûgaatonya bwigwatîra yaa yeenu.

²²“MWATHANI agatûma bûgwatwe nî mîrimo ya mpûûna, na mîrimo ya kûgwatithania, na kwimba mwîrî na kîruutîra gîkiingî na kwaara gûkûnene gûtî na ngai. Ningî gûkethagîrwa kûrî na ruuo rûrî na mwanki rwa kûnyaaria imera bieenu. Bûkaagwatwa nî mîrimo îîu mwanka bûthire buru.

²³Gûtî ngai îkauraga, nayo nthîgûrû îkoomagara îkare ta chuuma.

²⁴Antû a MWATHANI abuurithagîria ngai, agaatûma rûkûûnkû na mûthanga bibûgwîre kuuma îgûrû naabuî bûthire.

²⁵“MWATHANI agatûma bûûmbwe nî anthû beenu. Bûkabaithûkîra bûgwatanîrîte, îndî bakabwînga ûrîa muntû atîîta njîra îmwe na ûngî. Nabo antû ba mîgongo îngî bakarigara mono.

²⁶Nabio biimba bieenu bikaa biakûrîa bia nyoni na nyomoo cia kîthaka. Gûtî we ûkonora wa gûciînga.

²⁷MWATHANI agatûma bûgwatwe nî maûûtî ta jarîa aatûmîre antû ba Misri bagwatwa nîjo, na ironda bia kîu na weere na mûng'arû.

²⁸MWATHANI agatûma buume nthû na bûee atumuumu na bwangaratane mathûgaanio.

²⁹Naabuî bûgatua gwîtaga bûgîatataga mûthenya o ta ûrîa mûtumuumu athithagia. Bûtîtonga kuumania na ngûgî cieenu. No kwinyîîrua bûkaiinyagîîrua akî na bûtuunyagwe into bieenu magiita jonthe. Ningî gûtî we ûkoonora wa kûbûteethia.

³⁰“Bûgaatumaga ûcoore na mwarî ûmûgûra, îndî muntû ûngî akamûgûra. Ûgaakaga nyomba îndî ûtîmîtonya ûtûûra ku. Ningî ûkaandaga muunda jwa mîzabibû, îndî ûtîrûma maciara jaayo.

³¹Ndegwa yaaku îkoragîrwa arîa ûrî, îndî ûtîmîrûma. Ûgatunywa ntigiri yaaku na inya na ûtîcokerua yo kaîrî. Anthû baaku bakanenkerwa ng'ondu ciaaku na gûtî we ûkonora wa gûgûteethia.

³²Ataana na aarî baaku bakanenkanîrwa kîrî antû bangî ûtegeete. Naagwe ûgatindaga ntukû cionthe wirîrîrîîtie bo bacoka. Îndî gûtî u ûkoomba kûrigîîria bûkarîka.

³³Mûgongo jûrîa bûtiijî bwaaju jûkarîa maciara ja miuunda yeenu îrîa bûrîmîte bwainya. Naabuî bûkainyagîîrua na bûtheetheragwe rîonthe.

³⁴Naabuî nîûntû bwa mantû jarîa bûkoonaga bûkaumaga nthû.

³⁵MWATHANI agatûma bwimbe mwîrî junthe na mwîrî juume ironda bia nkûûjî kuuma magûrû mwanka mûtwe.

³⁶“MWATHANI akabwikia, buî na mûnene ûrîa bwithuurîrîte, mûgongoone jûrîa buî kana biûjûjû bieenu bitiijî bwaaju. Ningî bûrî kûu bûgatumîkagîra mîrungu îngî ya mîtî na maiga.

³⁷Antû ba kûrîa MWATHANI akabwikia bakabûthûûraga na babûmenage mono. Ningî bakabûmaragia na babûthekagîre.

³⁸“Bûkaandaga mbeeû inyingî miuundeene yeenu îndî gûtîkîo bûgaakethaga, nîkwîthîrwa ngigî ikaarîa kîmera kîeenu buru.

³⁹Bûkaandaga mîzabibû miuundeene yeenu na bûkamîmenyeera; îndî bûtîkunda ndibei yaayo kana bûketha nzabibû ciaayo nîûntû mang'inyo jakamîria buru.

⁴⁰Bûkeethîrwa bûrî na mîzeituni nthîgûrû yeenu yonthe îndî bûtîciaka maguta jaayo, nîûntû nciara ciaayo igeetîka.

⁴¹Bûkagîa na ataana na aarî îndî bagatawa bae nkombo.

⁴²Ngigî ikarîjaga mîtî yonthe na îmera bia miuunda yeenu.

⁴³“Mpinga irîa igaatûuranagîra naabuî ikaagîa îgweta nkûrûki yeenu, naabuî bwaage îgweta buru.

⁴⁴Bakethagîrwa barî na mbeecha cia kûbûkobithia îndî buî bûtîîthagîrwa bûrî noo na mbi ya kûbakobithia. Bakaa anene beenu babwathage.

⁴⁵“Irumi bibi bionthe bikabûgwata mwanka bûthirue tontû nî bûregeete kwathîkîra MWATHANI Mûrungu weenu, na kûthingata Maathana na Mawaatho jaawe jarîa aabwathîte.

⁴⁶Nabio bigakara birî kîonanîîria kîa MWATHANI kîrî nchiarwa cieenu magiita jonthe.

⁴⁷“MWATHANI Mûrungu weenu nî aabwere ûtonga bwa into bibingî kinya këethîra bûtamûtumîkîîre bûgwîrîtue na bûrî na nkerû.

⁴⁸Tontû bûû, buî bûgatumîkîra anthû beenu barîa MWATHANI akabûtûmîra nabo bakabwinyîîria. Bûkeethîrwa bûrî na mpara na nyoonta, na bûtî na nguû cia gwîkîra na bûrî na ûbatu bwa into bionthe. MWATHANI agaatûma bwiinyîîrue na ngûgî indito mono mwanka bûthire buru.

⁴⁹MWATHANI akabûtûmîra mûgongo jûbwithûkîre kuuma ituri bia nthî, jûbwîjîîre na mpwîî ta ûrîa ndiiû îînamaga kuuma bwa îgûrû. Bûtîîthîrwa bûkîmenya rûthiomi rwa mûgongo jûu.

⁵⁰Nî mûgongo jûmûng'entu mono. Jûtigîîrua muntû kinya ûrîkû kîaao, ëethîrwa arî ntindiri kana mwana.

⁵¹Mûgongo jûu jûkarîa nyomoo cia ndîîthia cieenu na maketha ja miuunda yeenu na nkano na ndibei na maguta, mwanka bûthire buru.

⁵²Bakathiûrûkîra ntûûra cieenu cionthe irîa ikeethîrwa irî nthîgûrû irîa MWATHANI Mûrungu weenu akabwaa. Nthingo cia ntûûra iu ikeethîrwa irî indaaja na ciaaki ciarika. Kinya këethîra nî nthingo iu bûkeethîrwa bwîrîgîrîte ibûteethia, ikaamomokanga ithire buru.

⁵³“Anthû beenu babûcîgîîria ntûûreene cieenu naabuî bûkathîîna mono nî mpara. Îgiita rîu bûkaarîîjaga aana beenu barîa MWATHANI Mûrungu weenu abweete.

⁵⁴Kinya muntû ûrîa ûtaamenya mpara nîmbi kuuma gûciarwa kwaawe, atîrûmia mwekûrû waawe kana mûtaana wa ng'ina kana aana baawe gantû nîûntû bwa gûcîgîîrua kûu.

⁵⁵Akathithia ûu na arege kûrûmia muntû noo ûrîkû nyama cia aana baawe barîa akûrîa nîûntû gûtî gîntû kîngî akeethîrwa atigarîîtie gîa kûrîa kagiiteene kau karîa bûkeethîrwa bûcîgîîrîîtue na bûkînyamaaragua nî anthû beenu kûu ntûûreene cieenu cionthe.

⁵⁶Mwekûrû ûrîa ûciarîri ûtongeene na ûtaumagara gûcwaa gantû oome, agaataga mûkûrû waawe na twaana twaawe,

⁵⁷ thigiri na kaana karîa akeethîrwa akîrîîra withoone, nîûntû bwa kwaga gantû kangî ga kûrûma rîrîa bûkeethîrwa bûcîgîîrîîtue na bûkîthîînagua nî anthû beenu ntûûreene cieenu.

⁵⁸“Këethîra bûtîathîkîra rûteto rûrû rwa Waatho bûrîa bwaandîki yukuune rîrî na bûrege gûkîra riîtwa rîa ûkumio na rîa gûkîrwa, rîa MWATHANI Mûrungu weenu,

⁵⁹rîu MWATHANI akabûreetera buî na nchiarwa cieenu, mîthangîko îmingî na mîrimo îmîthûûku ya wonje.

⁶⁰Ningî agatûma bûgwatwe kaîrî nî mîrimo îrîa yaarî nthîgûrûûne ya Misri îrîa bwaakîraga. Îkabûgwata na bûtîora.

⁶¹MWATHANI akabûreetera mîrimo îîjî na mîthangîko îrîa îngî îtîaandîki yukuune rîrî rîa Waatho bûu mwanka bûthire buru.

⁶²Kinya këethîra bûkeethîrwa bûrî babaingî ja njota, bûgatigara bûrî babakai nîûntû nî bwaaregere kwathîkîra MWATHANI Mûrungu weenu.

⁶³Ningî o ta ûrîa MWATHANI aagwîragua akîbûthithîria mantû jameega na agatûma bûkathegea no ûu akaigua akîbûthethera na akîbûthiria. Nawe agaatûma bûthaamue kuuma nthîgûrûûne îrîa akabwaa yaa yeenu.

⁶⁴“MWATHANI akabûnyagania kîrî antû ba mîgongo yonthe ya nthî. Kûu nîku bûgaatumîkagîra mîrungu îngî, îthithîtue na mîtî na maiga, îrîa buî kana biûjûjû bieenu bûtaamenya bwaayo.

⁶⁵Bûtîona kiurûko, bûgaatua gûtomagia bûrî kûu. Ningî MWATHANI agatûma bûgwatwe nî ûguaa, na bwage wîrîgîîro, na bûkue nkoro.

⁶⁶Ûtûûro bweenu bûkeethîrwa bûrî ûgwatiine îgiita rîonthe. Bûgakaraga bûgîkîraga kûûragwa ûtukû na mûthenya.

⁶⁷Ningî nîûntû bwa ûguaa bûrîa bûkeethîrwa bûrî nabu, na nîûntû bwa mantû jarîa bûkeethagîra bûkîonaga, bûkairîragîîria rûkîîrî rwîthagîrwa nî ûtukû, na ûtukû bwîthîrwa bûrî mûthenya nîûntû bwa thîîna îrîa bûkethagîrwa bûkîona.

⁶⁸MWATHANI akabûcokia bûrî meriine kûu Misri kinya këethîra nî aabwîrîte bûtîcoka nao kaîrî. Naabuî bûrî kûu bûkageria gûûciendia ta nkombo kîrî anthû beenu, îndî gûtî muntû ûkeenda kûbûgûra.”