Read KIMERU BIBLE PROTESTANT EDITION Kûr 29 Bible Online

Kûr 29 - KIMERU BIBLE PROTESTANT EDITION bible

Kûr 29

¹Iji nî nteto cia kîrîkanîro kîrîa MWATHANI aathîre Musa ekanîîre na antû ba Israeli barî nthîgûrûûne ya Moabu, kûnarî nî kwaarî na kîngî eekanîîrîte nabo kûu kîrîmeene gîa Sinai.

²Musa nî eetîre antû ba Israeli amwe bonthe na arabeera atîrî, “Nî bwaacioneere bwingwa ûrîa MWATHANI aathithîîrie mûnene wa Misri, na nthûûmba ciaawe ona nthîgûrû yaawe yonthe.

³Nî bwoonere mîrimo îmingî na biama na magegania jamanene jarîa MWATHANI aabathithîîrie.

⁴Îndî mwanka naarua tûrî MWATHANI atareka bûciûra mantû jarîa bwoonere na jarîa bwaigîrue.

⁵Nî ni ndaabûtongeererie mîaka mîrongo îna kûu rwanda. Nguû cieenu itatambûka kana iraatû bieenu bithira.

⁶Bûtarûma mûgaate kana bûkunda ndibei kana ncoobi nîkenda bûmenya atî nî ni MWATHANI Mûrungu weenu.

⁷ Naabuî rîrîa bwakinyîre gûntû gûkû, Sihoni, mûnene wa Heshiboni, na Ogi, mûnene wa Bashani, nî baatwithûkîîre barwaa naatuî, îndî nî twaaboombîre ndweene.

⁸ Nî twaigwatîîre nthîgûrû ciaao, na tûraigaîra irî kiigai kîrî mwîrîga jwa Rubeni na jwa Gadi na nusu ya mwîrîga jwa Manase.

⁹Tontû bûû, menyeereni, bwaathîkagîre buru nteto cia kîrîkanîro gîkî nîkenda bûthinyaara.

¹⁰“Bûrûngamîte bwinthe mbere ya MWATHANI Mûrungu weenu ntukû ya naarua. Bûrî atongeeria ba mîîrîga yeenu, na akûrû, na athani, na arûme bonthe ba Israeli,

¹¹na twaana tweenu, na eekûrû beenu na mpinga irîa irî kambîîne yeenu. Kûrî na barîa babuunagîra nkû na barîa babûtaagîra rûûjî.

¹²Buî bwinthe bûrûngami aja naarua nîkenda bûthithia kîrîkanîro na MWATHANI Mûrungu weenu, we ûrîa ûkûrîîkanîra naabuî.

¹³MWATHANI agûtua naarua atî buî bûrî antû baawe wengwa, nawe ae Mûrungu weenu, o ta ûrîa aabwîrîre na araciîtîria biûjûjû bieenu, tabio Abrahamu na Isaaka na Jakubu.

¹⁴Tî baabuî bwinka nkûthithia kîrîkanîro naabuî.

¹⁵MWATHANI Mûrungu weetû arîîka kîo na barîa barî aja naarua na barîa batî o.

¹⁶“Nî bûkûmenya ûrîa twatûûraga Misri na ûrîa tuî twakûrûkagîîra nthîgûrû ingî.

¹⁷Naabuî nî bwoonere mantû jamathûûku, jarîa baarî najo. Nî baathaathayia mîrungu ya mîng'uanano îthithîtue na mîtî, na maiga, na fetha na thaabu.

¹⁸ Imenyeereeni mono gûtîkeeje kwîthîrwa kûrî ntomûrume kana mûka, kana mûciî kana mwîrîga jûgarûkîte naarua jwauma kîrî MWATHANI Mûrungu weetû, jweeta kûthaathayia mîrungu ya mîng'uanano ya nthîgûrû iu. Bûkäthithia ûu, bwîthîrwa bûkari ta mûri jûrîa jûtheukaga, jûgakûra, jûgaciara matuunda jarî na ng'ana na thumu.

¹⁹Menyeereeni gûtîkeeje kwîthîrwa kûrî ûmwe weenu ûkaigua kîrîkanîro gîkî naarua na aciîra wengwa atîrî, ‘Ngaakara bwega kinya këethîrwa ntîkîathîkîra.’ Ûntû bûu bwoomba kûthiria antû babeega o amwe na babaaî.

²⁰MWATHANI atîrekera muntû ta ûu. Îndî mûthûûro jwaawe jûkamûthiria, na irumi birîa biaandîki yukuune rîrî bimûgwate. Ningî MWATHANI akaathiria nchiarwa ciaawe nthîgûrûûne buru.

²¹MWATHANI akaathûra muntû ûu kuuma mîîrîgeene yonthe ya Israeli nîkenda amûreteera mîthangîko kûringana na irumi bionthe bia kîrîkanîro kîrîa kîaandîki yukuune rîrî rîa Waatho.

²²“Nayo nthukî îrîa îkeeja ya nchiarwa cieenu ona kinya mpinga iria ikauma nthîgûrûûne cia kûraaja, bakoona mîthangîko na mîrimo îrîa MWATHANI atûmîte îgwata antû ba nthîgûrû yeenu.

²³ Bakoona nthîgûrû yeenu îrîa îkeethîrwa îkunîki nî maiga jagwakana mwanki jwa ûbiriti na chumbî. Gûtî kîo gîkoroandwa ku, na gûtî kinya nyaki îkorouma ku. Nthîgûrû îîu îkari ta Sodomu na Gomora na Adima na Zeboiimu irîa MWATHANI aathirîrie nîûntû bwa mûthûûro jwaawe jûmûnene.

²⁴Rîu, mîgongo yonthe îkooria atîrî, ‘Nîkî gîtûmîte MWATHANI athithîria nthîgûrû îîjî ûjû? Nîmbi gîtûmi kîa mûthûûro jwaawe jûmûnene ûû?’

²⁵Rîu antû bagacokia bauge atîrî, ‘Nî tontû antû ba MWATHANI nî baatiganîre na kîrîkanîro kîa MWATHANI, Mûrungu wa biûjûjû biaao. Kîrîkanîro kîrîa aathithîrie nabo rîrîa aabaritaga nthîgûrûûne ya Misri.

²⁶Nabo nî beetîre gûtumîkîra na kûthaathayia mîrungu îngî îrîa bataijî bwaayo na îrîa aabakaanîtie kûthaathayia.

²⁷Tontû bûû, mûthûûro jwa MWATHANI jûraingîa mono nîûntû bwa nthîgûrû îîjî jûratûma îgwatwa nî irumi bionthe birîa biaandîki yukuune rîrî.

²⁸MWATHANI nîûntû bwa mûthûûro jwaawe jûmûnene, nî aatûmîre baritwa nthîgûrûûne yaao na banyaganua nthîgûrûûne ingî naarîa barî kinya naarua tûrî.’

²⁹“Kûrî mantû MWATHANI Mûrungu eekîte jarî witho. Îndî mantû jarîa atûguûrîrîte nî jeetû na ja nchiarwa cieetû kenya na kenya. Athithîtie ûu nîkenda tûûjûragia nteto cionthe cia Waatho bûu.”