Read KIMERU BIBLE PROTESTANT EDITION Kûr 3 Bible Online

Kûr 3 - KIMERU BIBLE PROTESTANT EDITION bible

Kûr 3

¹Musa areeta na mbere kuuga atîrî, “Rîu tûragarûka tûreeta bwa ûrîo na njîra îrîa yeetaga bwa nthîgûrû ya Bashani. Mûnene wa Bashani tawe Ogi nî aaumagarîre arî na njûûrî yaawe yonthe areeja gûtuithûkîra kûu ntûûreene ya Edirei.

²Îndî MWATHANI nî aambîrîre atîrî, ‘Bûkaamûkîreeni. Nîkwîthîrwa nî mûnenkanîrîte amwe na antû baawe bonthe na nthîgûrû yaawe kîrî buî. Naabuî bûmûthithîrie o ta ûrîa bwathithîîrie Sihoni mûnene wa Aamori ûrîa waatûûraga ntûûreene ya Heshiboni.’

³Tontû bûû, MWATHANI Mûrungu weetû nî atûnenkîîre mûnene Ogi tûramûûraga ningî tûrooraga antû ba ntûûra yaawe bonthe mwanka kûreethîrwa gûtî we watigara.

⁴Nî twaataîre ntûûra ciaao cionthe îgiita o rîu, na gûtî kinya ntûûra îmwe twatiga tûtîtaîte. Nacio ciaarî ntûûra mîrongo îtantaatû (60) irîa ciaarî nthîgûrûûne ya Arigobi îrîa mûnene Ogi aathaga arî kûu Bashani.

⁵Ntûûra iu cionthe ciairigîri na nthingo indaaja, na cieekîrwa mpingîro na mîbacho. Ningî kwaarî na kinya ntûûra ingî inyingî itairigîri na nthingo.

⁶Naatuî nî twaabathirîrie buru o ta ûrîa twathithîîrie mûnene Sihoni wa Heshiboni. Tontû bûû, tûrakoboranga ntûûra ciaao cionthe, na tûrooraga arûme na aka na twaana.

⁷Ningî nî twaataîre into bionthe birîa biaarî ntûûreene iu o amwe na nyamû cia ndîîthia.

⁸Îgiita rîu nî twaataîre nthîgûrû iu kuuma kîrî anene barîa baathaga nthîgûrû ya bwa gaiti ka mûuro jwa Jorodani. Ûu nî kuuga kuuma kîguuruune kîa Arinoni mwanka kîrîmeene kîa Herimoni.

⁹Asidonia beetaga kîrîma kîa Herimoni Sirioni, nabo Aamori bagagîîta Seniri.

¹⁰Nî twaataîre ntûûra cionthe irîa ciaarî mûgwanthîîne jwa karîma ka Gileadi na Bashani kunthe mwanka Saleka na Edirei. Ntûûra iu nîcio ciaathagwa nî mûnene Ogi ûrîa waakaraga Bashani.”

¹¹Mûnene Ogi nîwe waarî wa mûthia wa nchiarwa cia Refaimu. Gîtanda kîaawe kîaarî gîa chuuma na kîaarî kîa ûraaja bwa mita inya na nusu (4.5m) na wariî bwa mita ijîîrî (2m). Gîtanda kîu kîrî ntûûreene ya Raba kûu nthîgûrûûne ya Amoni.

¹²Rîrîa twaataîre nthîgûrû îîu, nî ndaaere antû ba mwîrîga jwa Rubeni na jwa Gadi nthîgûrû îrîa yaaumîte ntûûreene ya Aroeri îrîa îrî mûthia jwa mûgwanthî jwa Arinoni na ndîrabaa nusu ya nthîgûrû ya irîma ya Gileadi o amwe na ntûûra ciaayo.

¹³Nusu îrîa îngî ya nthîgûrû ya Gileadi na ya nthîgûrû ya Bashani yonthe, îrîa yaathagwa nî mûnene Ogi, na nîyo nthîgûrû ya Arigobi nî ndaamînenkanîîre kîrî nusu ya mwîrîga jwa Manase. Nthîgûrû îîu ya Bashani yonthe îtagwa nthîgûrû ya Refaimu.

¹⁴Jairi wa kuuma mwîrîgeene jwa Manase nî aagaîîrwe nthîgûrû ya Arigobi yonthe. Nayo nî kuuma Bashani mwanka mwankeene jwa nthîgûrû ya Geshuri na Maka. Ningî nî aaere tûtûûra twa nthîgûrû îîu riîtwa rîaawe. Araciîta Havothi-jairi, riîtwa rîrîa ciîtagwa kinya naarua tûrî.

¹⁵Nî ndaagaîîre nchiarwa cia Makiri wa mwîrîga jwa Manase nthîgûrû ya Gileadi.

¹⁶Ningî nî ndaagaîîre nchiarwa cia Rubeni na cia Gadi nthîgûrû ya Gileadi mwanka kîguuruune kîa Arinoni. Nthîgûrû îîu yankeene na nthîgûrû ya Amoni kîguuruune kîa mûuro jwa Jaboki.

¹⁷Ningî nî ndaabagaîîre kinya Araba îrîa yankeene na mûuro jwa Jorodani, kuuma Kinerethi mwanka îrieene rîa Araba, ta rîo îria rîa Chumbî. Ningî nthîgûrû îîu yankîte rwareene rwa Pisiga bwa gaiti.

¹⁸ “Rîu nîrîo ndabwîkîîre Waatho ndîrabwîra atîrî, ‘MWATHANI Mûrungu weenu nîwe wabûnenkera nthîgûrû îîjî yee kiigai kîeenu. Nchamba cieenu cia ndwaa nî ciambe itonye ku baikundîkîte mathaga ja ndwaa nîkenda babûtongeeria buî antû ba Israeli.

¹⁹Îndî aka beenu na twaana tweenu, amwe na nyomoo cia ndîîthia cieenu igatigîîrwa nyuma ntûûreene irîa ndîrabunenkeere. Nî nkûmenya bûrî na nyomoo inyingî cia ndîîthia.’

²⁰Bûkaathithia ûu mwanka rîrîa MWATHANI akaa Aisraeli bangî antû a gûtûûra, o ta ûrîa buî bûgaîri. Tontû bûû, bo bakaigwatîra nthîgûrû îrîa MWATHANI Mûrungu weenu akûbaa rwongo rwa mûuro jwa Jorodani. Rîu nîrîo bûgacoka o muntû kiigaine kîaawe kîrîa agaîri.

²¹“Ningî îgiita rîu nî ndeerîre Joshua atîrî, ‘Gwe nî woonete mantû jonthe jarîa MWATHANI Mûrungu waaku aathithîrie anene barîa baîrî. O ûu nou akaathithîria anene ba nthîgûrû irîa bûkaithûkîra.

²²Bûkabakîreeni tontû MWATHANI Mûrungu weenu nîwe ûkabûrûîrîîra.’

²³ “Naani ndîraromba MWATHANI îgiiteene rîu ndîrauga atîrî,

²⁴‘Îgwe MWATHANI Mûrungu, gwe wambîrîtie kûmbonia ni nthûûmba yaaku ûnene bwaaku na mathithio jaaku ja kûrigarania. Nî mûrungu jûngî jûrî kû jwa mûng'uanano jûrî kûu îgûrû kana jûrî kûû nthîgûrû jûûmba kûthithia ngûgî ta iji kana mathithio ja inya ta jaaku?

²⁵Ndakwerenca, mbîtîkîîria mbune rwongo rûrîa rûngî rwa mûuro jwa Jorodani nîkenda mbîta kwona nthîgûrû îîu njega ya irîma na mbone irîma bia Lebanoni.’

²⁶Îndî MWATHANI nî aathûûri nî ni nîûntû bweenu, ararega kûmbigua. Nawe arambîîra atîrî, ‘Ng'anîrwa, na ûkáambîîra mantû jaja kaîrî!

²⁷Itia kathûmbîîne ga kîrîma kîa Pisiga, ûtege bwa rûgûrû na bwa gaiti na bwa ûrîo na bwa ûmotho. Ntîtîkîîria uuna mûuro jwa Jorodani ûkinya nthîgûrûûne îîu.

²⁸Îndî atha Joshua na ûmwîkîre wîru na inya, tontû nîwe ûkauna rwongo atongeeretie kîrîndî gîkî; na nîwe ûkabagaîra nthîgûrû îrîa ûkwona.’

²⁹Tontû bûû, nî twaakarîre kîguuruune kîu kîerekeene na ntûûra ya Bethipeori.”