Read KIMERU BIBLE PROTESTANT EDITION Kûr 30 Bible Online

Kûr 30 - KIMERU BIBLE PROTESTANT EDITION bible

Kûr 30

¹Musa nî aarîîrie antû ba Israeli arabeera atîrî, “Rîrîa kîrumi kana kîtharimo gîkabûgwata o ta ûrîa ndaabwîrîre atî mantû jau jonthe jakabwîjîîra, naabuî bûjaririkane bûrî nthîgûrû cionthe kûrîa MWATHANI Mûrungu weenu akeethîrwa abwîkîîtie.

²Naabuî na nchiarwa cieenu bûcokere MWATHANI Mûrungu weenu na bwathîkîre Maathana jaawe jonthe na nkoro na moyo jweenu junthe.

³Rîu MWATHANI Mûrungu weenu akabwigîîrua kîaao na abûcokie kuuma nthîgûrûûne irîa akeethîrwa abûnyagîîtie na abûcokerie ûthinyaari bweenu kaîrî.

⁴MWATHANI Mûrungu weenu akabûthûrania na abwîjîre bwinthe kinya bûkëethîrwa bûnyaganîîtîe kunthe nthîgûrûûne.

⁵Akabwikia nthîgûrûûne irîa biûjûjû bieenu biaigwatîîre nîkenda kinya buî bwigwatîra yo. Nawe agaatûma bûtonge na bûthegee nkûrûki ya biûjûjû bieenu.

⁶MWATHANI Mûrungu weenu akabwaa amwe na nchiarwa cieenu nkoro cia kwathîka, nîkenda bûmwendage na nkoro cieenu na moyo jweenu junthe nîkenda bûtûûre mwoyo.

⁷MWATHANI Mûrungu weenu agatûma irumi biu bionthe bigwate anthû beenu barîa bakabûthangîkagia.

⁸Naabuî bûgatua kwathîkagîra MWATHANI, na bûthingatage Maathana jaawe jonthe jarîa nkûbwatha naarua.

⁹MWATHANI Mûrungu weenu agaatûma bûtonge mono kuumania na ngûgî cionthe irîa bûkaaritaga. Agaatûma bûthegee mono na kinya ndîîthia cieenu ithegee. Najo maketha jeenu jaingîe mono. Tontû MWATHANI akaagwîrua kaîrî akîbûcokeria ûthinyaari bweenu, o ta ûrîa aagwîragua nî biûjûjû bieenu.

¹⁰Akathithia ûu këethîra bûkamwathîkîra na bûthingate Maathana jaawe na Mawaatho jarîa jaandîki yukuune rîrî rîa Waatho, na këethîra bûgacokeera MWATHANI Mûrungu weenu na nkoro cieenu cionthe na mîoyo yeenu yonthe.

¹¹“Rîathana rîrî nkûbwatha naarua tî rîrîûmo kîrî buî kana rîrî kûraaja naabuî.

¹² Rîtî îgûrû bwîja kûûrania atîrî, ‘Nûû ûgatûgîîrîra rîo îgûrû nîkenda tûriigua na tûrîathîkîra?’

¹³Rîathana rîrî rîtî rwongo rwa îria bûciûria atîrî, ‘Nûû ûkauna îria eeta gûtûgîîrîra rîo, nîkenda tûkariigua na tûrîathîkîra?’

¹⁴Îndî rûteto rûrî akuî mono naabuî. Noo bûrwarie na bûthithie ûrîa rûkwenda.

¹⁵“Naarua ndîgwîîka mbere yeenu wega na ûthûûku, na ndeeka ûtûûro na gîkuû.

¹⁶MWATHANI Mûrungu weenu agatûma bûtûûre mwoyo na bûthegee na akabûtharima bûrî nthîgûrûûne irîa bûkaigwaatîra bunka këethîra bûkaathîkîra Maathana jaawe, jarîa akûbwatha naarua. Naabuî bûmwendage na bûthithagie ûrîa akeendaga bûthithia. Ningî bûûjûragie Maathana na Mawaatho jaawe.

¹⁷Îndî bûkärega kwigua, bûkagarûka bûgeeta kûthaathayia mîrungu îngî,

¹⁸ga nkûbwîra na mma naarua atî no kûthirua bûkathirua buru. Bûtîtûûra kagiita gakaraaja nthîgûrûûne îrîa bwîtîte kwigwaatîra rûteere rûrîa rûngî rwa Jorodani.

¹⁹Nî ngwîta îgûrû na nthî bikûûjîîra atî naarua ndîgwîka mbere yeenu ûtûûro na gîkuû, na kîtharimo na kîrumi! Tontû bûû, thuureni ûtûûro nîkenda buî na nchiarwa cieenu bûûmba gûtûûra,

²⁰ bûkîendaga MWATHANI Mûrungu weenu. Ningî bûmwathîkagîre magiita jonthe. Nîkwîthîrwa MWATHANI nîwe ûgatûma bûtûûra nthîgûrûûne îrîa aaciîtîîrie biûjûjû bieenu ta bio Abrahamu, na Isaaka na Jakubu.”