Read KIMERU BIBLE PROTESTANT EDITION Kûr 31 Bible Online

Kûr 31 - KIMERU BIBLE PROTESTANT EDITION bible

Kûr 31

¹Musa nî eetîre na mbere kwarîria antû bonthe,

² na arabeera atîrî, “Naarua ndî na ûkûrû bwa mîaka îgana rîmwe rîa mîrongo îîrî. Ntî na inya ya kûbûtongeeria. MWATHANI nî ambîîrîte atîrî: ‘Ûûgwe ûtiuna Jorodani îîjî.’

³MWATHANI Mûrungu weenu nîwe ûkabûtongeeria buune Jorodani. Ningî akaathiria antû ba mîgongo îrîa îrî mbere yeenu, nîkenda bwigwaatîra nthîgûrû yaao. Joshua nîwe ûkabûtongeeria, o ta ûrîa MWATHANI aaugîre.

⁴ MWATHANI akaathiria antû bau ta ûrîa aathirîrie mûnene Sihoni na mûnene Ogi, amwe na nthîgûrû irîa baathaga.

⁵MWATHANI nîwe ûkabûûmbanîîra, naabuî bûbathithîrie ûrîa ndaabwîrîre.

⁶Ciûmieni na bûgîe ûchamba. Bûkaigua ûguaa kana bûbakîra. Tontû nî MWATHANI Mûrungu weenu wengwa ûkabûtongeeria. Atîbwîrûkîra kana areka bûûmbwa.”

⁷Rîu Musa nî eetîre Joshua mbere ya antû bonthe ba Israeli na aramwîra atîrî, “Gîaa inya na ûchamba. Tontû nîgwe ûgatongeeria antû baba bûtonye nthîgûrû îrîa MWATHANI aaciîtîrie kwaa biûjûjû bieenu, na bwigwatîre yo.

⁸ Nî MWATHANI ûkabûtongeeria. Bûgákîra kana bûguaa tontû arî amwe naabuî. Atîbwîrûkîra kana areka bûcindwa.”

⁹Musa nî aandîkîre Waatho bûbû aranenkera athînjîri-Mûrungu ba mwîrîga jwa Alawi bu, barîa bamenyagîîra Îthandûkû rîa kîrîkanîro kîa MWATHANI, na atongeeria ba antû ba Israeli.

¹⁰ Musa arabeera atîrî, “Thomageeni Waatho bûu o mûthia jwa mwaka jwa mûgwanja, rîrîa marandû jarekagîrwa, tarîo îgiita rîa Mambura ja tûgaanda.

¹¹Thomagîreeni antû ba Israeli bu rîrîa boothûreene nîkenda bathaathayia Mûrungu MWATHANI waao.

¹²Ûthûranagieeni antû bonthe: Arûme na aka, na twaana na mpinga irîa irî ntûûreene cieenu, nîkenda baigua na bairitana kwathîkîra MWATHANI Mûrungu weenu, na bamenyagîîra kûthithagia nteto cia Waatho buru.

¹³Nîkenda na njîra îîu, kinya nchiarwa cieenu, irîa itaigua Waatho bûu ikaigua. Nabo bakairitana kwathîkîra MWATHANI Mûrungu weenu, matukû jonthe ja ûtûûro bwaao barî nthîgûrûûne îrîa bwîtîte kwigwatîra rwongo rûrîa rûngî rwa Jorodani.”

¹⁴MWATHANI nî eerîre Musa atîrî, “Ûtî na îgiita rîrîraaja rîa gûtûûra. Îta Joshua bwîjanie nawe ndeene ya îema rîa gûtirimanîra, nîkenda mwaa ngûgî ya kûrita.” Musa na Joshua bareeta barakûrûka ndeene ya îema rîa gûtirimanîra.

¹⁵MWATHANI aracionithania kîrî bo arî matuune jakari ta gîtugî au mwariine jwa îema.

¹⁶MWATHANI areera Musa atîrî, “Gwe ûrî akuî gûkua, na wakua antû baba batîmbathîkîra na batîûjûria kîrîkanîro kîrîa twarîkanîîre nabo. Bakambîrûkîra na beete batumîkîre mîrungu mîgeni ya nthîgûrû ingî.

¹⁷Nabo bathithia ûu, nkathûûra nîbo mono îgiita rîu, na mbeerûkîre, nabo bakathirua. Mîthangîko îmingî îkabejîîra mwanka bamenye atî barîthangîka ûu nîûntû ni, Mûrungu waao ntî amwe nabo.

¹⁸Naani ntîbateethia nîûntû bwa mantû jamathûûku jarîa bathiîthîtie ja kûthaathayia mîrungu îngî.

¹⁹“Tontû bûû, nandî aandîka rwîmbo rûrû na ûbaritane ru, nîkenda barwinaga rûrî ûkûûjî kîrî bo.

²⁰Ngaikia antû baba nthîgûrû îrîa nthongi na îrî mûthetu jûmûnoru na ûtonga bûbwingî, o ta ûrîa ndaacitîîrie biûjûjû bieenu. Kûu bakaarîjaga na banyunyage na bang'anîrwe. Îndî bo bakambutatîra na bathingate mîrungu îngî na bamîtumîkagîre, na baregage kûthingata kîrîkanîro gîaakwa nabo.

²¹Mîthangîko îmingî îkabagwata. Îgiita rîu, nîrîo rwîmbo rûrû rûkainwa rûrî ûkûûjî, nîûntû nchiarwa cieenu itîûrîrua nîru. Nî ni menyaga mathûgaanio jaao kinya mbere ya mbaikia nthîgûrû îrîa ndaaciîtîrie atî nkabaa.”

²²Tontû bûû, Musa nî aandîkîre rwîmbo rûu ntukû o îîu, na araritana antû ba Israeli kûrwiina.

²³ Ningî MWATHANI nî aarîîrie Joshua mûtaana wa Nuni, aramwîra atîrî, “Gîta inya na ûgîe ûchamba, tontû ndî amwe naagwe. Nîgwe ûgaikia antû ba Israeli nthîgûrû îrîa ndaaciîtîrie atî nkabaa.”

²⁴Musa nî aathirîrie kwaandîka nteto cia Waatho bûbû yukuune o ûrîa ciaarî.

²⁵Nyuma areera Alawi barîa baamenyagîîra Îthandûkû rîa kîrîkanîro kîa MWATHANI atîrî,

²⁶“Jûkieni Yuku rîrî rîa Waatho, na bûrîîke rûteere rwa Îthandûkû rîa kîrîkanîro kîa MWATHANI Mûrungu weenu. Nî rîkarage au ta ûkûûjî kîrî buî.

²⁷Nî mbijî bûrî ndemi na antû boomagia mîtwe. Tontû-rî, këethîra nî bûkûrega kwathîkîra MWATHANI rîrîa ndî amwe naabuî rî, ndaakua bûkarema bûng'ana!

²⁸“Ûthûranieni atongeeria ba mîîrîga yeenu yonthe na atongeeria bangî mbere yaakwa nîkenda mbeera mantû jaja. Ni ngeeta îgûrû na nthî biee akûûjî kîrî bo.

²⁹Ni nî nkûmenya na mma atî ndaakua buî bûkaathûûka mono na bûregane na mantû jarîa mbûritanîte. Bûkathangîka ntukû ikwîîja nîûntû bwa kûrega kwathîkîra MWATHANI. Bûgaatûma athûûre nîûntû bwa îrema rîeenu.”

³⁰Rîu Musa ni aainîre rwîmbo runthe antû ba Israeli bonthe bathikîîrîte.