Read KIMERU BIBLE PROTESTANT EDITION Kûr 32 Bible Online

Kûr 32 - KIMERU BIBLE PROTESTANT EDITION bible

Kûr 32

¹“Îgûrû nî rîthikîîre ûrîa nkuuga, naagwe nthîgûrû wigue rwaria rwaakwa.

²Ûritani bwaakwa nî bûgûûjage nthî ta ntaanta cia ngai, na bûgwate nthî ta îmee. Nî bûgwe nthî kaoora ta rûnyunyuû rûkîgwîra nyaki îriibîte, kana ta ngai înene îkiurîra mîtî.

³Ngakumagia riîtwa rîa MWATHANI, nkaathage Mûrungu nîûntû bwa ûnene bwaawe.

⁴We nî ta Iiga rîrînene, mathithio jaawe nî ja îota; ngûgî ciaawe nî injega mma. We nîwe Mûrungu ûûjûragia jarîa augîîte na wa mma. Athithagia ûrîa kwagîrîte na wa îota.

⁵Bo nî baregeete kûmwathîkîra, na nîûntû bwa ûthûûku bwaao, tî antû baawe kaîrî. Nî nthukî irî îrema na îrî mantû jamaaî.

⁶Buî antû babariitu na biaa, ûu nîu babuîrîte kûthithîria MWATHANI? We nî îthe weenu ûrîa wabûûmbîre, na abweethia mûgongo jûmûnene.

⁷Rikanageeni ûrîa gwakarîre karaaja bûthûgaanie nî nthukî ing'ana ikûrûkîte, bûûrie baabaagu na akûrû, nabo bakabwîra ûrîa gwaakarîkîre.

⁸ Rîrîa Ûrîa Ûrî Îgûrû buru agaagîra mîgongo kiigai kîaao, na araathûrana nchiarwa cia antû, nî aabeekîîre mîanka yaao kûringana na wingî bwaao.

⁹Tontû Israeli nî kiigai kîaawe, na nchiarwa cia Jakubu nî îringa rîaawe.

¹⁰Aabeethîîre nthîgûrû ya rwanda, gûntû kûrîa ruuo rwaurutanaga; nî abamenyerere bwega, o ta ûrîa muntû amenyagîîra kaana ka riitho.

¹¹MWATHANI aakari ta ndiiû, îrîa îritanaga bianaana biaayo kûbuurûûka. Îbiîkagîra mathaguune jaayo, îkabikamata.

¹²Rîu MWATHANI aatongeererie antû baawe, na gûtarî na mûrungu jûngî jwaamûteethagîîria.

¹³Nî aatûmîre baatha nthîgûrû injega cia irîma, na bararîa maciara ja miuunda îîu, na bararora nainchû kuuma maigeene, na bararita maguta nkomangoone.

¹⁴Ng'ombe na mbûri ciaao nî ciaarî na îria rîriingî, nî baarî na ndîîthia cia ng'ondu na ntûrûme na mbûri inoru ta cia Bashani, na mûtu jûmwinyu jwa nkano, na baranyua ndibei îrîa ndûru buru.

¹⁵Antû ba MWATHANI nî baathinyarîre baraa itonga, na bararîa biakûrîa baraneenea mono. Îndî bo nî baaere ndemi bareerûkîra Mûrungu waao na ningî baramena Iiga rîa wonokio bwaao.

¹⁶Nî baathaathaîrie mîrungu ya mîng'uanano, na baramûthûûria mono, baratûma athûûra mono nî mantû jarîa baathithagia jamathûûku.

¹⁷ Nî baaritîîre mîrungu ya mîng'uanano igongwana îrîa biûjûjû biaao bitaijî, mîrungu îrîa yaarî mîgeni Israeli.

¹⁸Nî boorîîrue nî Mûrungu waao, mwonokia waao ûrîa mûnene mma, we ûrîa waabaeere ûtûûro.

¹⁹MWATHANI akwona ûu arathûûra nîbo mono, arathûûrua nî antû baawe.

²⁰Arauga atîrî, ‘Ntîbateethia kaîrî mbone ûrîa bagaakara, tontû nî nchiarwa cia nthukî iremeete, na antû batîathîkaga.

²¹ Nî batûmîte ndathûûra nî mîrungu yaao ya mîng’uanano, ngatûma mûgongo jûtî na inya, jûûmbane ndweene. Boombwe nî antû babariitu ba mûgongo jûngî.

²²Mûthûûro jwaakwa jûgaakana ta mwanki, na jûîîthie bionthe birîa birî nthîgûrû, na birîa birî narîa kworokeru, na mpîîthie kinya mîsingi ya irîma.

²³Naani ngatûma bagwatwe nî ûthûûku na mîgiro, na mbarathange na mîgwî yaakwa.

²⁴Bagatuumbûka nî mpara, booragwe nî mîrimo îtî na ndawa. Batambûrangwe nî nyomoo cia kîthaka; barumangwe nî njoka irî thumu.

²⁵Ndwaa îkabwîjîîra ntûûreene cieenu na ûguaa bûbûnene bûtaambe kunthe, nacio nthaka na aarî beenu bakathira, na kinya nkeenke na ntindiri ikaathirua.

²⁶Ndîngîuga atî nkabûnyagania nthîgûrûûne kunthe, ntûme bûrege kûririkanwa kaîrî.

²⁷Îndî ntîngî reka anthû beenu bauga atî nîbo boombanîte ndweene, kana bauga atî nî MWATHANI ûbathithîrîtie ûu.

²⁸Jûu nî mûgongo jwa antû batî kîrîra, na antû bau batî ûmenyo.

²⁹Këethîra nî baboome, barîngî ciûra mantû jaja, barîngî menya mantû jarîa jakabeejîîra nyumeene.

³⁰Nîatîa muntû ûmwe oomba kwînga antû ngiri, kana antû baîrî beengana na antû ngiri îkûmi? Tiga MWATHANI, we ûrîa ûkari ta iiga rîaao rîa giiciitho, abarekeeretie na abaeejana kîrî bo.

³¹Anthû baao nî baijî bwega atî, mîrungu yaao îtî na inya, ta Mûrungu wa Israeli.

³²Anthû baao nî baathûûku ta Sodomu na Gomora. Bo bakari ta mîzabibû îrîa îciaraga nzabibû irî na ng'ana na irî na thumu.

³³Ndibei yaao nî ta thumu ya njoka, na îrî na ûrûrû bûbûûî ta mûgwî jwa kîguu.

³⁴MWATHANI nî atwîre aririkanîte mantû jaja, eteerere îgiita rîkinya abakanûkia.

³⁵ We nîwe wengwa ûkaarîyia, nîwe ûgakanûkia anthû beenu, na îgiita rîa kûthirua kwaao kûrî akuî nabo bakagiitara na ûthûûku bûbeejîîre na mpwîî.

³⁶ MWATHANI akoonokia antû baawe, na aigîîrue nthûûmba ciaawe kîaao. Rîrîa akoona batî na inya kaîrî, na gûtî we ûtigeere atîtaîtwe kana arî na ûciathi.”

³⁷Ningî MWATHANI akabooria atîrî, “Mîrungu yeenu îrîa bûreetîkîtie nî giiciitho kîeenu îrîkû?

³⁸Nîyo bûraaritagîra maguta jarî kîgongwana na ndibei îrî kîgongwana kîa gwîtûûrîria. Mîrungu îîu nandî nî ithuranîre îbûteethie, na îbwonokie bûtîkathirue.

³⁹Menyeni atî ni, nî ni Mûrungu, na gûtî ûngî wa mma ja ni; Ni ntûmaga muntû akua kana atûûra. Nî mbîkaîra rûgûma na nkooria, na gûtî we ûûmba gwitunyûkia kuuma kîrî ni.

⁴⁰Naani o ta ûrîa ndî Mûrungu ûtûûraga mwoyo, nî ngûciîtia na mma atî,

⁴¹nkaanoora rûchiû rwaakwa rweenie; na ncirîîrie kuuma kîrî anthû baakwa na bonthe barîa banthûûraga.

⁴²Ngatûma tharike yaao înyûrûûke mîgwîîne yaakwa, na rûchiû rwaakwa rûthirie barîa bonthe banthwîre. Ntîtigithia kinya ûmwe wa barîa barwaaga naani, mbûrage barîa beekîri ngûma na barîa atae.

⁴³ Buî mîgongo, kumagieni kîrîndî kîa MWATHANI MWATHANI nî arîagîria nthûûmba ciaawe, antû baao barîa booragi, na agakanûkia anthû baao ningî akarekera meeyia ja antû baawe.”

⁴⁴Musa na Joshua, mûtaana wa Nuni, nî beetîre barainîra antû rwîmbo rûu.

⁴⁵Musa akûthiria kûeejana nteto iu kîrî antû ba Israeli bonthe,

⁴⁶arabeera atîrî, “Menyagîîreeni, bwathîkagîîre Maathana jonthe jarîa ndabûritana naarua. Bûritanage nchiarwa cieenu jo nîkenda kinya cio ijaathîkagîra.

⁴⁷Mooritani jaja tî ja ûtheri, îndî nî ûtûûro kîrî buî. Jo jagatûma bûtûûre ûtûûro bûbûraaja nthîgûrûûne îrîa bûkaigwaatîra bwauna Jorodani.”

⁴⁸ “O ntukû îîu yongwa MWATHANI nî eerîre Musa atîrî,

⁴⁹Îta wiitie kîrîmeene kîa Abarimu kîrîa kîrî nthîgûrû ya Amoabu, kîrîa kîerekeene na ntûûra ya Jeriko. Wiitie kathûmbîîne ka Nebo. Rîu ûkoona nthîgûrû ya Kanaani, îrîa nkaa kîrîndî kîa Israeli, yee yaao.

⁵⁰Naagwe ûgakuîra ku, o ta ûrîa mûtaana wa nyakwe Aaroni aakuîrîîre kîrîmeene kîa Hori.

⁵¹Nîkwîthîrwa bu-baîrî nî bwaaregere kûmbathîkîra mbere ya Aisraeli bûrî mûuroone jwa Meribathi-kadeshi kûu rwanda rwa Zini. Buî nî bwaaregere gûnkumithia kîrî bo.

⁵²Gwe ûkoona nthîgûrû îîu îrî gataaria; îndî ûtîkinya ku kana ûtonya nthîgûrûûne îrîa nkaa antû ba Israeli.”