Read KIMERU BIBLE PROTESTANT EDITION Kûr 33 Bible Online

Kûr 33 - KIMERU BIBLE PROTESTANT EDITION bible

Kûr 33

¹Musa, muntû wa Mûrungu, mbere ya akua nî aatharimîre antû ba Israeli,

²arabeera atîrî, “MWATHANI nî eenamîre kuuma kîrîmeene kîa Sinai; aratwîjîîra kuuma kîrîmeene kîa Edomu, aratûtharima kuuma kîrîmeene kîa Parani. Nî eenamîre arî na araîka ngiri îkûmi, agwete kînyinga gîgwakana mwanki na njara yaawe ya ûrîo.

³Ningî, MWATHANI nî eendeete antû baawe, na agakaria bonthe barîa aithuurîrîte. Nî baamûthingataga o kûrîa eetaga, akîbatongagîîria.

⁴Musa nî atûritanîre mantû jegiî Waatho, bûrîa bûrî kigai kîa antû ba Jakubu.

⁵Ûu nîu MWATHANI aaere mûnene wa kîrîndî kîaawe kîa Israeli, rîrîa mîîrîga yonthe na atongeeria ba antû ba Israeli boothûranîte amwe.

⁶Mwîrîga jwa Rubeni jûrootûûra, na jûkáathira noo rî, kinya këethîra antû ba mwîrîga jûu bakeethîrwa barî babakai.”

⁷Musa aratharima mwîrîga jwa Juda arauga atîrî, “Itû MWATHANI thikîîra kajû ka mwîrîga jwa Juda, na ûjûcokanîîrie kîrî antû baaju. Ûjûrûîre na inya yaaku, na ûjûteethie kuuma kîrî anthû baaju.”

⁸ Akîtharima mwîrîga jwa Lawi, Musa aaugîre atîrî, “Itû MWATHANI, nenkera mwîrîga jwa Lawi Thumimu na Urimu. Nîju waagereerie Masaha, na ûroona nî jûmwagîru au rûûjîîne rwa Meriba.

⁹Antû ba Mwîrîga jûu nî baakwathîkîîre nkûrûki ya ûrîa baathîkîîre aciari baao. Nî baatiganîre na ataana ba ng'ina na aana baao, barathikîîra ûrîa waabeeraga, na bareeka kîrîkanîro gîaaku.

¹⁰Bakaritana Jakubu Mawaatho jaaku, na baritane Israeli Maathana jaaku. Bakaîîthagîîria ubaani na bakûritagîre igongwana bia gwakîîria au kîritîroone kîa igongwana.

¹¹Itû MWATHANI, tharima birîa barî na bio, na wîtîkîîrie birîa bionthe biumanagia na ngûgî ciaao. Thiria anthû baao inya buru na barîa babathûûraga, nîkenda batîbaithûkîra kaîrî.”

¹²Akîtharima Benjamini arauga atîrî, “Mwathani nî eendeete antû ba mwîrîga jwa Benjamini, batûûraga kindaajî nîûntû bwaawe, MWATHANI abakaragia îgiita rîonthe, akeethîrwa arî akuî nabo ntukû cionthe.”

¹³Musa akîtharima mwîrîga jwa Josefu nî augîre atîrî, “MWATHANI arotharima nthîgûrû ya nchiarwa cia Josefu, aromiurithîria ngai ya kûng'ana, na atûme ithima bia rûûjî biuma ku.

¹⁴Nthîgûrû yaao îrotharimwa na irio bibikûrû biûmîtue nî riûa, na bakatharimwa na maketha jamaingî ja o kingo o kingo.

¹⁵Irîma na tûrîma twa ntwîre tûrîa tûrî nthîgûrûûne yaawe tûrouma imera bibiega.

¹⁶Nthîgûrû yaawe îroojûrwa nî ûtonga bûbwingî, îtharimwe nî MWATHANI, ûrîa waarîîrie arî gîkambene kîrîa kîaîjaga. Itharimo bibi birokara na Josefu, nîûntû we aarî mûtongeeria wa ataana ba îthe.

¹⁷Arî na inya ta ya ndeegwa kana ngoji cia mbogo. Inya yaayo îng'anene na inya mîthûmba ngiri inyingî cia mwîrîga jwa Manase na mîthûmba ngiri îkûmi cia mwîrîga jwa Efuraimu. Nayo îkengagîîria antû ba mîgongo amwe, îbatindîke mwanka ituri bia nthî.”

¹⁸Musa akîtharima mwîrîga jwa Zebuloni na Isakari nî augîre atîrî, “Gwe Zebuloni gwîragua ûgîîta kûrita ngûgî ciaaku; naagwe mwîrîga jwa Isakari bûgwîragîrue ûtonga bûrî mîciî yeenu.

¹⁹Bageetaga antû ba mîgongo îngî bagaitia kîrîmeene kîaao, baritagîre igongwana birîa biagîrîte ku, nîkwîthîrwa ûtonga bwaao buumaga îrieene, na kuuma mûthangeene jûrîa jûrî mpwîroone ciaarîo.”

²⁰Musa akîtharima mwîrîga jwa Gadi nî aaugîre atîrî, “MWATHANI arokumua we ûrîa waatûmîre nthîgûrû ya Gadi înenea. Nchiarwa cia mwîrîga jwa Gadi ikari ta ngatûnyi, îrîa yunangaga marûitû na îgakabakaba kîongo.

²¹Nî jwathuurîîrwe nthîgûrû îrîa nthongi mono; îrîa yeeki îrî ya mûtongeeria. Naju nî jweetîre kîrî atongeeria bangî, na kîrî Israeli barathikîîra Mawaatho, na matua ja îota ja MWATHANI.”

²²Musa akîtharima mwîrîga jwa Dani nî augîre atîrî, “Nchiarwa cia Dani nî ta kîanaana kîa ngatûnyi, kîrîa gîtûatûûaga kiumîte Bashani.”

²³Ningî Musa akîtharima mwîrîga jwa Nafutali nî augîre atîrî, “Îgwe Nafutali, gwe ûtharimi na into bibiega nî MWATHANI, igwatîre nthîgûrû kuuma îrieene rîa Galili gwîta bwa ûmotho bwaarîo.”

²⁴Musa akîtharima mwîrîga jwa Asheri nî aaugîre atîrî, “Nchiarwa cia Asheri nî itharimi nkûrûki ya mîîrîga îrîa îngî, cio nî cieendi nkûrûki ya nchiarwa cia mîîrîga îîu îngî. Nthîgûrû yaao îroojûra kîmera kîa mîzeituni.

²⁵Ntûûra ciaao iroirigîrwa na chuuma na îturutia, nîkenda îtûûraga îrî kindaajî magiita jonthe.”

²⁶“Î buî antû ba Israeli, gûtî mûrungu ûngî ûkari ja Mûrungu weenu. We ûrîa wîtagîîra îgûrû akîbûteethagia, We mwene ûkumio kûu îgûrû.

²⁷Mûrungu wa kenya na kenya nîwe giiciitho kîeenu, We nîwe ûbwonokagia na inya yaawe magiita jonthe. We nîwe wabwîngîîre anthû beenu, bûrabathiria buru.

²⁸Tontû bûû, nchiarwa cia Israeli igatûûra kiindajî, nthîgûrûûne îrî na maketha jamaingî na ndibei, na nthîgûrû yeenu îkauragîrwa nî ngai îng'anu

²⁹Gwîrua gwe Israeli, Nîkwîthîrwa gûtî ûngî ûkari taagwe, gwe wonoketue nî MWATHANI. Nîwe rong'o îrîa bûciigagîra nayo, na nîwe rûchiû rwa ûûmbani bweenu! Anthû beenu bakeeja bakîbwerencaga bûbaigîîrua kîaao, îndî buî bûkabooraga bûkabakinyangîra nthî.”