Read KIMERU BIBLE PROTESTANT EDITION Kûr 34 Bible Online

Kûr 34 - KIMERU BIBLE PROTESTANT EDITION bible

Kûr 34

¹Musa nî aumîre kûu nthîgûrû ya Moabu areeta kîrîmeene kîa Nebo na araitia kathûmbi ka Pisiga, karîa keerekeene na nthîgûrû ya Jeriko. MWATHANI aramwonia nthîgûrû yonthe kuuma Gileadi mwanka Dani.

²Aramwonia nthîgûrû yonthe ya Nafutali, na nthî ya Efuraimu na ya Manase, na nthîgûrû yonthe ya Juda mwanka rûteere rwa bwa rûgûrû rwa îria rîa Mediterania.

³Aramwonia nthîgûrû ya mûgwanthî jwa bwa ûmotho bwa ntûûra ya Jeriko, tayo ntûûra ya Mîkîndû, mwanka ntûûra ya Zoari.

⁴ MWATHANI areera Musa atîrî, “Îîjî nîyo nthîgûrû îrîa ndaaciîtîîrie Abrahamu na Isaaka na Jakubu atî nkaa nchiarwa ciaao. Ndîgwîtîkîîria ûmîona îndî ntîreka wîta kûu.”

⁵Rîu, o ta ûrîa MWATHANI augîîte, Musa nî aakuîrîîre kûu nthîgûrûûne ya Moabu.

⁶MWATHANI aramûthika kiguurûûne kîrîa kîerekeene na ntûûra ya Bethipeori. Îndî gûtî muntû wiijî arîa ongwa mbîrîra yaawe îrî kinya naarua tûrî.

⁷Musa agîkua aarî na ûkûrû bwa mîaka îgana rîmwe rîa mîrongo îîrî. We nî aarî na inya na nî oonaga bwega.

⁸Nabo antû ba Israeli nî baarîrîîre Musa ntukû mîrongo îthatû barî kûu mûgwanthîîne jwa nthîgûrû ya Moabu. Rîu ntukû cia kîrîro na kwithikîîra nîûntû bwa Musa nî ciathirîre.

⁹Joshua mûtaana wa Nuni nî oojûrîrwe nî roho wa ûûme, nîûntû Musa nî aarî akûmûthuura aa mûrîaûkua waawe. Nabo antû ba Israeli nî bamwathîkîîre na barathithia o ûrîa MWATHANI eerîte Musa.

¹⁰ Kuuma îgiita rîu gûtooneka kîroria kîngî ta Musa kûu Israeli. MWATHANI aaragia nawe ûthiû kwa ûthiû.

¹¹Gûtî kîroria kîngî ta Musa kîomba kûringa biama na kûthithia magegania ta jarîa MWATHANI aatûmîte Musa eeta kûthithîria Farao, wa nthîgûrû ya Misri, amwe na nthûûmba ciaawe cionthe na nthîgûrû yaawe yonthe.

¹²Ningî gûtî kîroria kîngî ta Musa kîomba kûthithia mantû ja inya na ja kûmakania ta jarîa Musa aathithîîrie antû ba Israeli bonthe bakîonaga.