Read KIMERU BIBLE PROTESTANT EDITION Kûr 4 Bible Online

Kûr 4 - KIMERU BIBLE PROTESTANT EDITION bible

Kûr 4

¹Musa nî eerîre antû ba Israeli atîrî, “Athîkagîreeni Mawaatho na Maathana jarîa nkûbûritana nîkenda bûtûûra na bwîta na bwîgwatîra nthîgûrû îrîa MWATHANI Mûrungu wa biûjûjû bieenu akabwaa.

² Bûkéeja kwongeera kana bûrita Waatho noo bûrîkû bwa jarîa mbwathîte. Athîkagîreeni Maathana ja MWATHANI Mûrungu weenu, jau ndabwîra.

³ Nî bwonere bûrîa MWATHANI aathithîrie kûu nthîgûrû ya Baali-peori! Nîkwîthîrwa MWATHANI Mûrungu nî aathirîrie antû bamwe beetû barîa baathaathaîrie Baali kûu Peori.

⁴Îndî buî barîa bwaathîkîîre MWATHANI Mûrungu weenu bûrî mwoyo naarua îîjî.

⁵Oneeni, nî nkûbûritana Mawaatho na Maathana o ta ûrîa MWATHANI Mûrungu waakwa aambîrîre nthithie, nîkenda bûjathingata bûrî nthîgûrûûne îrîa bûgatonya na bwigwatîra yo yee kiigai kieenu.

⁶Menyagîîreeni Mawaatho na Maathana jau bwega. Bwathithia ûu, antû barîa bakabwonaga na baigue mantû jau bakaagîa ûûme na ûmenyo. Nabo bakaugaga atîrî, ‘Nî mma mûgongo jûjû mûnene ûu nî jwa antû baboome na babaciûku.’

⁷Nî Mûgongo jûrîkû jûmûnene jûrî mûrungu ûrî akuî naju ta ûrîa MWATHANI Mûrungu weetû arî akuî naatuî? Nî aatûteethagia rîrîa rîonthe tûmûrombaga ûteethio.

⁸Ningî nî mûgongo jûmûnene jûngî jûrîkû jûrî na Mawaatho na Maathana ja îota ta jarîa jonthe nkûbûritana naarua?

⁹“Menyeereeni, na bûkare bûciûki, bûtîkeeje kûûrîrua nî mantû jarîa bwoneete. Bûjaathîkagîre matukû jonthe ja ûtûûro bweenu. Bûritanage aana beenu jo na kinya nchiarwa irîa ingî ikeeja.

¹⁰Ririkaneeni ntukû îrîa bwaarûngi mbere ya Mûrungu weenu kûu kîrîmeene gîa Sinai na ûrîa aambîrîre atîrî, ‘Mbûthûranîria antû nîûntû nî nkwenda baigua ûrîa nkuuga nîkenda bambathîkagîra ûtûûroone bwaao bunthe na baritanaga aana baao kûthithagia o ûu.’

¹¹ Îreeni aana beenu ûrîa bweetîre akuî na bûrarûngama mûgwanthîîne jwa kîrîma kîa Sinai nakîo gîokaga mwanki jûgakinya îgûrû buru; jûkunîkîri nî matu jamatumanu na muundu.

¹²Rîu MWATHANI arabwarîria arî gatîgatî ka mwanki. Nî bwaigagua kajû kaawe îndî bûtoonaga ûrîa ûkûûbwarîria.

¹³ Nî aabûmenyithîrie kîrîkanîro kîaawe kîrîa aathanîre kîûjûrague, nakîo nîkîo Maathana îkûmi, na arajaandîka îgûrû rîa mbechua ijîîrî cia maiga.

¹⁴ MWATHANI arambîîra îgiita rîu mbûritanage Mawaatho na Maathana, nîkenda bûjaathîkagîra bûrî nthîgûrû îrîa bûkaigwatîra yee yeenu.

¹⁵“Naabuî imenyeereeni mono. Nîkwîthîrwa bûtoonere mûûmbîre no jûrîkû ntûku îrîa MWATHANI aabwaragîrîa kûu kîrîmeene kîa Sanai arî gatîgatî ka mwanki.

¹⁶ Menyeereeni bûtîkeeje kwîyia bûciajîra mûng'uanano jwa mûûmbîre no jûrîkû; jwethîrwa jûkari ta ntomûrûme kana mûka,

¹⁷ kana mûûmbîre jwa nyomoo irîa irî nthîgûrû, kana mûng'uanano jwa nyoni irîa iburûkaga îgûrû

¹⁸kana mûng'uanano jwa nyomoo noo îrîku îtambaga na nthî kana mûng'uanano jwa gîkûyû o kîrîkû kîrîa kîrî rûûjîîne.

¹⁹Bwimenyeere rîrîa bûgaategaga îgûrû bwona riûa na mweri na njota, na birîa bionthe birî îgûrû, bûtîkeeje gûkuucîîrua nîbio bûbithaathayia bûkîbitumîkagîra. Biu nî into birîa MWATHANI Mûrungu weenu aagaîîre antû bonthe barîa barî nthîgûrû.

²⁰ Îndî buî bûrî kîrîndî kîrîa MWATHANI oonokerie kuuma Misri nthîgûrû îrîa bwathangîkîte ta bwaarî mwankiine jwa gûkerura chuuma. Aathithîrie ûu nîkenda bwaa antû baawe o ta ûrîa bûrî naarua îîjî.

²¹ MWATHANI nî aathûûrîre nî ni nîûntû bweenu araciîtia atî ntiuna rwongo rwa mûuro jwa Jorodani, na ntîtonya nthîgûrû înjega îrîa MWATHANI Mûrungu weenu akabwaa yaa yeenu.

²²Îndî ni ngaakuîra gûkû na ntiuna mûuro jwa Jorodani. Îndî buî bûkauna rwongo rûrîa rûngî na bûgwate nthîgûrû îîu njega.

²³Menyeereeni bûtîkeeje kûûrîrua nî kîrîkanîro kîa MWATHANI Mûrungu weenu, kîrîa aarîîkanîîrie naabuî. Bûkáthithia mîng'uanano ya kwaja yeethîrwa îrî na mûûmbîre kana mûng'uanano jwa birîa bionthe MWATHANI Mûrungu weenu aakaanîtie.

²⁴ Nîkwîthîrwa MWATHANI Mûrungu weenu akari ta mwanki jwa kûthirania na arî rûriitho.

²⁵“Rîrîa bûkeethîrwa bûkarîte nthîgûrûûne îîu îgiita rîrîraaja na bwîthîrwe bûthegeete na nchiarwa cieenu kinya cio ciîthîrwe ithegeete, bûmenyeere bûtikeeje kûthithia mîrungu ya mîng'uanano. Nîkwîthîrwa bwathithia mîrungu ya mîng'uanano bûkeeyia na bûthûûrie MWATHANI Mûrungu weenu.

²⁶Ni ngeeta îgûrû na nthî biee akûûjî kîrî buî ntukû ya naarua, atî buî bûkaathira buru o ntûti kuuma nthîgûrû îrîa buî bwîtîte kwigwatîra bwauna mûuro jwa Jorodani yee yeenu. Bûtîtûûra ku îgiita rîrîraaja, îndî bûkaathirua buru.

²⁷ MWATHANI akabûnyagania mîgongoone îrîa îngî, naabuî bûgaatigara bûrî babakai mîgongoone îîu MWATHANI akeethîrwa abwikîtie.

²⁸Kûu nîku bûgatumîkagîra mîrungu îthithîtue na mîtî na maiga, mîrungu îrîa îtîonaga kana iigua kana îrîa biakûrîa kana înunkîra.

²⁹ Îndî bwacwaa MWATHANI Mûrungu weenu bûrî o kûu, bûkamwona këethîra bûkamûcwaa na nkoro na mîoyo yeenu yonthe.

³⁰Rîrîa bûkëethîrwa bûrî thîîneene na mantû jaja jonthe jabwîjîîre matukûûne jau, bûgacoka kîrî MWATHANI Mûrungu weenu na bûmwathîkîre.

³¹MWATHANI Mûrungu weenu nî Mûrungu ûrî kîaao. Mûrungu weenu atîbûrekeeria bûûra kana abûthiria kana oorîrua nî kîrîkanîro kîrîa aciîtîîrie biûjûjû bieenu.

³²“Cûnkûûneni nandî mantû jarîa jaakarîkîre karaaja, rîrîa bûtaaciari, rîrîa Mûrungu oombîre muntû aramwîka aja nthîgûrû, bwoone këethîra ûntû bûbûnene ta bûbû bûrathithîka no rî kana bwigîîgua nthîgûrûûne yonthe.

³³Kûrî antû noo barîku baigua kajû ka mûrungu akîaria kuuma gatîgatî ka mwanki batûûra ta ûrîa buî bwaakaigîrue na bûrî mwoyo?

³⁴Kana nî mûrungu jûrîkû jwoomba kwonokia mûgongo kuuma kîrî mûgongo jûngî jûkîringaga biama na kûthithia mantû ja kûrigaria? Kana nî mûrungu jûrîkû jwaithûkîra mûgongo na jûjûûmba ndweene na inya înene na kûjûretera imakania? Kûrî ju jûûmba kûthithia mantû jarîa MWATHANI Mûrungu weenu aabûthithîîrie kûu Misri bûkîonaga.

³⁵ Baabuî bwoonerue ûntû bûu nîkenda bûmenya atî MWATHANI nî Mûrungu; na gûtî ûngî tiga we wenka.

³⁶Aatûmîre bwigua kajû kaawe kuuma îgûrû nîkenda abûritana gûtûûra bwega. Nî aabwonerie aja nthî mwanki jwaawe jûmûnene na bûraigua nteto ciaawe ikiuma gatîgatî ka mwanki.

³⁷Ningî nîûntû nî eendeete biûjûjû bieenu, nî aabûthuurîre, na arabûrita Misri na inya yaawe înene,

³⁸na areenga mîgongo îmînene na îrî na inya nkûrûki yeenu, nîkenda abwikia kûu na abwaa nthîgûrû ciaao ciaa kiigai kîeenu o ta ûrîa gûkari naarua îîjî.

³⁹Tontû bûû, menyeni naarua na bûkoorîrua atî MWATHANI nîwe Mûrungu kûu îgûrû buru na nthîgûrû yonthe. Ningî gûtî Mûrungu ûngî.

⁴⁰Tontû bûû, menyagîîreeni Mawaatho na Maathana jaawe, jarîa akûbwatha naarua, nîkenda mantû jeenu jeeta bwega, na kinya ja nchiarwa cieenu irîa ikeeja nyumeene, nîkenda matukû jeenu jongeereka nthîgûrûûne îrîa MWATHANI Mûrungu weenu akabwaa kenya na kenya.”

⁴¹ Ningî Musa nî aathuurîre ntûûra ithatû irîa ciaarî gaiti ka mûuro jwa Jorodani,

⁴²kûrîa muntû o ûrîkû ûûraganîte abuîrîte kûmatûkaga gwiciitha, bunka ëethîrwe oragîte muntû ûngî atîkwenda, kana ëethîrwa araarî na ûthû nawe. Muntû ta ûu akamatûkaga ntûûreene îmwe ya iu ithatû nîkenda acionokia.

⁴³Mwîrîga jwa Rubeni jwathuurîrwe ntûûra ya Bezeri îrîa îrî rwanda rwa mûgwanthî yaa ya kûmatûkagîra. Naju mwîrîga jwa Gadi jûrathuurîrwa Ramothi-gileadi, na mwîrîga jwa Manase jûrathuurîrwa ntûûra ya Golani îrîa îrî Bashani nîkenda barîa booraganîte bamatûkaga ku.

⁴⁴“Jaja nîjo Maathana jarîa Musa aanenkeere Israeli.

⁴⁵Najo nî Mawaatho na nkuagaya na mantû ja wîthîre jarîa Musa eerîre antû ba Israeli rîrîa baaumîre Misri.

⁴⁶Aabeerîre jo barî rwongo rwa Jorodani kûu kîguuruune kîrîa kîaarî akuî na Bethipeori. Nthîgûrû îîu nîyo mûnene Sihoni wa Aamoni aathaga arî ntûûreene ya Heshiboni. Nîwe Musa na njûûrî ya asikarî ba Israeli boombîre ndweene rîrîa baaumîte Misri.

⁴⁷Nî baabaithûkîîre na baraigwatîra nthîgûrû yaawe na kinya nthîgûrû ya Ogi mûnene wa Bashani. Anene bau bo baîrî ba Aamori baatûûraga rwongo rwa bwa gaiti ka mûuro jwa Jorodani.

⁴⁸Nthîgûrû îîu yaaumîte ntûûreene ya Aroeri mwanka rwareene rwa mûgwanthî jwa mûuro jwa Arinoni, gwîta mwanka kîrîmeene kîa Sirioni na nîkîo gîtagwa Herimoni.

⁴⁹Nthîgûrû îîu îgwateene na mûgwanthî jwa Araba jûrîa jûrî kîguuruune kîa mûuro jwa Jorodani bwa gaiti mwanka îrieene rîa Chumbî kûu mûgwanthîîne jwa kîrîma gîa Pisiga.”