Read KIMERU BIBLE PROTESTANT EDITION Kûr 5 Bible Online

Kûr 5 - KIMERU BIBLE PROTESTANT EDITION bible

Kûr 5

¹Musa nî eetîre antû ba Israeli amwe, na arabeera atîrî, “Antû ba Israeli, thikîîreeni Maathana na Mawaatho jarîa nkûbwarîria naarua îîjî. Iritaneeni jo na bûmenyeere bwega kûjathithagia.

²MWATHANI weetû athithîrie kîrîkanîro naatuî kûu kîrîmeene gîa Sinai.

³MWATHANI atathithîrie kîrîkanîro gîkî na biûjûjû bieetû akî îndî nî aathithîtie naatuî tûrî mwoyo naarua îîjî.

⁴MWATHANI aarîîrie naabuî ûthiû kwa ûthiû kûu kîrîmeene, arî gatîgatî ka mwanki.

⁵Îgiita rîu ndaarûngi gatîgatî ka MWATHANI naabuî nîkenda mbûmenyithia mantû jarîa MWATHANI akuuga. Buî bûtaitia kîrîmeene nîûntû nî bwakîraga mwanki. “MWATHANI arauga atîrî,

⁶‘Nî ni MWATHANI Mûrungu weenu ûrîa waabûritîre nthîgûrûûne ya Misri, kûrîa bwaarî nkombo.

⁷“‘Bûkáthaathayia mîrungu îngî tiga ni.

⁸ “‘Bûkáithithîria mûrungu jwa kwaja, kana mûng'uanano jwa gîntû no kîrîku kîrî îgûrû, kîrî nthîgûrû kana rûûjîîne.

⁹ Bûkámîturîria maru kana bûmîthaathayia; nîûntû ni MWATHANI Mûrungu weenu ndî Mûrungu ûrî rûriitho. Ni nkanûkagia barîa banthwîre. Ngakanûkia aciari na nchiarwa ciaao mwanka nthukî ya ithatû na ya inya.

¹⁰Îndî nî mbigagîîrua kîaao antû ngiri inyiingî cia barîa bampendaga na bakathîkîra Maathana jaakwa.

¹¹ “‘Bûkágweta riîtwa rîa MWATHANI Mûrungu weenu na rûûgo, tontû MWATHANI agakanûkia muntû ûrîa ûgwetaga riîtwa rîaawe na rûûgo.

¹² “‘Menyagîîreeni ntukû ya sabatû, îîthagîrwe îrî întheru o ta ûrîa ni MWATHANI Mûrungu weenu mbwathîte.

¹³ Ritageeni ngûgî ntukû ithanthatû bûthithagie mantû jeenu jonthe;

¹⁴Îndî ntukû ya mûgwanja nî sabatû ya MWATHANI Mûrungu weenu. Bûkárita ngûgî no îrîkû ntukû îîu. Buî kana ataana beenu kana aarî beenu, kana nthûûmba cieenu cia arûme kana cia aka, kana ndeegwa cieenu kana ntigiri cieenu kana nyomoo cieenu cia ndîîthia kana ageni beenu barîa bûrî nabo ntukû îîu, nîkenda nthûûmba cia arûme kana cia aka inogoka ja buî.

¹⁵Ririkanageeni atî bwaarî nkombo nthîgûrûûne ya Misri, na MWATHANI Mûrungu weenu nî aabwigîîrue kîaao arabûrita ku na inya yaawe. Tontû bûû, MWATHANI Mûrungu weenu aabwathîre bûmenyagîîre ntukû ya sabatû.’”

¹⁶ “‘Eejageni aciari beenu gîtîîo, ta ûrîa MWATHANI Mûrungu weenu augîîte, nîkenda abwaa ûtûûro bûbûraaja na bûkaraga bûthinyarîte kûu nthîgûrûûne îrîa akûbwaa.

¹⁷ “‘Bûkóragana.

¹⁸ “‘Bûkáthûngîîra.

¹⁹ “‘Bûkáiya.

²⁰ “‘Bûgátuîrîîra antû bangî ûkûûjî bwa ûrongo.

²¹ “‘Bûkáirîrîîria aka ba antû bangî; kana bwirîrîîria nyomba cia antû bangî, kana miuunda yaao, kana nthûûmba ciaao cia aka kana arûme, kana bwirîrîîria ndeegwa ciaao kana ntigiri ciaao kana gîntû no kîrîku kîrîa barî nakîo.’

²² “MWATHANI aarîîrie nteto iji kîrî buî bûûthûreene au kîrîmeene nawe arî gatîgatî ka mwanki, na matu na muundu jûmûtumanu, na kajû gakanene. Najo gûtî Maathana jangî ongeera. Nî ajaandîkîre îgûrû rîa mbechua ijîîrî cia maiga na araanenkera cio.

²³“Naabuî rîrîa bwaigîrue kajû karî gatîgatîîne ka muundu, rîrîa kîrîma gîokaga mwanki, nî bwejaîjîre akuî naani, bûrî na atongeeria ba mîîrîga na atongeeria bangî beenu,

²⁴na bûrambîîra atîrî, ‘Tega, MWATHANI Mûrungu weetû nî atwonetie mwago na nkuma yaawe, na twaigua kajû kaawe kuuma gatîgatî ka mwanki. Tuî nî twoneete naarua Mûrungu akîaria na muntû, na muntû ûu agatûûra mwoyo.

²⁵Îndî nandî nîkî tontû tûgakua? Nîkwîthîrwa mwanki jûu jûmûnene ûû jûgatûthiria. Ningî tweeta na mbere kwigua kajû ka MWATHANI Mûrungu weetû, tûgakua.

²⁶Tontû nî muntû ûrîkû watûûra mwoyo akwigua kajû ka Mûrungu ûrîa waaragia arî gatîgatî ka mwanki ta ûrîa tuî twigîîtue?

²⁷Îta akuî na ûthikîîre jarîa jonthe MWATHANI Mûrungu weetû akauga. Naagwe wîje ûtwîre jo, naatuî tûkaigua na twathîkîre.’

²⁸“MWATHANI araigua nteto cieenu irîa bwaambîraga. Arambîîra atîrî, ‘Nkwigua nteto cia kîrîndî gîkî irîa bo bakwîrîte. Nî baarîîtie ûûma kîrî jarîa jonthe baarîîtie.

²⁹Kûbua atîa këethîra nîu beethagîrwa barî na mathûgaanio ta jaja îgiita rîonthe. Naku kûbua atîa këethîra nîu bambîkagîîra na bakathikîîra Maathana jonthe jaakwa, nîkenda mantû jaao jeetaga bwega, o na ja nchiarwa ciaao kenya na kenya!

³⁰Îta ûbeere bacoke maemeene jaao.

³¹Îndî gwe kara aja amwe naani na ngakûmenyithia Maathana na Mawaatho na nkuagaya irîa ûkaabaritanaga nîkenda baithingataga barî nthîgûrûûne irîa nkabaa yee yaao.’”

³²Musa arabeera atîrî, “Buî antû ba Israeli, thithagieni ûrîa MWATHANI Mûrungu weenu abuîrîte. Bûkárega kûmwathîkîra.

³³Bûthithagie jonthe jarîa MWATHANI Mûrungu weenu abuîrîte, nîkenda bûtûûra mwoyo na mantû jeenu jeetaga bwega, naabuî bûgatûûra îgiita rîrîraaja nthîgûrûûne îrîa akûbwaa yee yeenu.”