Read KIMERU BIBLE PROTESTANT EDITION Kûr 6 Bible Online

Kûr 6 - KIMERU BIBLE PROTESTANT EDITION bible

Kûr 6

¹Musa nî eerîre Israeli atîrî, “Jaja nîjo Maathana, na Mawaatho na nkuagaya irîa MWATHANI Mûrungu weenu aambîrîre mbûritane nîkenda bwithingataga bûrî nthîgûrûûne îrîa akabwaa yee yeenu.

²Karageeni ntukû cionthe bûgîkîraga MWATHANI Mûrungu weenu, buî na nchiarwa cieenu bûmenyagîîre Mawaatho na Maathana jaawe jonthe jarîa nkûbwatha; nîkenda bûtûûra ûtûûro bûbûraaja.

³Tontû bûû, buî Aisraeli, thikîreeni na bwathîkagîre Maathana, nîkenda bûkara kindaajî, na bûthegea mono bûrî nthîgûrûûne îrîa nthongi na îrî mûthetu jûmûnoru na ûtonga bûbwingî o ta ûrîa MWATHANI Mûrungu wa biûjûjû bieenu aaugîre.

⁴ “Thikîreeni buî Aisraeli: MWATHANI Mûrungu weenu nî ûmwe mma.

⁵ Eendageni MWATHANI Mûrungu weenu na nkoro yonthe na mwoyo junthe na inya yeenu yonthe.

⁶ Najo Maathana jaja nkubwatha ntukû ya naarua nî jakare ndeene yeenu.

⁷Ritanageeni bwega aana beenu jo, na bwaragie bwa jo rîrîa bûkari nthî nyomba cieenu, na rîrîa bwîtîte njîreene, na rîrîa bûmami na rîrîa bûûkîîrîte.

⁸Ningî bûjaogeere ja rwano njareene cieenu, na ûthiûûne bweenu jarî kîririkania.

⁹Bûjaandîkage mîrangoone ya nyomba cieenu na mpingîroone cieenu.

¹⁰ “MWATHANI Mûrungu weenu akabwikia nthîgûrûûne îrîa aciîtîîrie biûjûjû bieenu; nabo nî Abrahamu na Isaaka na Jakubu atî akabaa ntûûra injega na inene irîa bo bataaka.

¹¹MWATHANI akabwaa nyomba ciûjûri into bibiega birîa buî bûteeka ku na abwee ithima biînji birîa buî bûtenja na miuunda ya mîzabibû na ya mîzeituni îrîa buî bûtaanda; na rîrîa bûkarîa na bûnyire,

¹²bûkéeja kûûrîrua nî MWATHANI ûrîa waabûritîre nthîgûrû ya Misri, kûrîa bwaarî nkombo.

¹³ Kîrageni MWATHANI Mûrungu weenu, na bûmûtumîkagîre, na bûciîtagie na riîtwa rîaawe.

¹⁴Bûkáthaathayia mîrungu ya antû barîa bagaatûûraga akuî naabuî.

¹⁵Tontû MWATHANI Mûrungu weenu ûrîa ûtûûraga gatîgatîîne keenu nî Mûrungu wa rûriitho, atîkeeje kûbûtûrîkîria mûthûûro jwaawe jûbûthiria buru.

¹⁶ “Bûkágeria MWATHANI Mûrungu weenu, ta ûrîa bwaathithîrie bûrî kûu Masaha.

¹⁷Ririkanageeni kwathîkîra Maathana na Mawaatho na nkuagaya irîa MWATHANI Mûrungu weenu abwathîte.

¹⁸Thithagieni bûrîa bûrî bwa mma na bûbwega mbere ya MWATHANI, nîkenda mantû jeenu jakaraga bwega, na nîkenda bûtonya na bwigwatîra nthîgûrû înjega îrîa MWATHANI aaciîtîîrie biûjûjû bieenu.

¹⁹Buî bûkoomba anthû beenu bonthe ndweene o ta ûrîa MWATHANI aabwîrîre.

²⁰“Rîrîa aana beenu bakabûûragia matukû jakeeja atîrî, ‘Nîmbi gîtûmi kîa Maathana na Mawaatho na nkuagaya irîa MWATHANI Mûrungu weenu aabwathîre?’

²¹Rîu buî bûkabeera atîrî, ‘Tuî twarî nkombo cia Farao kûu Misri. MWATHANI nî aatûritîre Misri na inya yaawe înene.

²²MWATHANI nî oonanîrie mantû jamanene ja kûrigarania kûu nthîgûrû ya Misri. Aroonia Farao na atongeeria baawe bonthe, na kinya antû bonthe ba Misri.

²³Nawe aratûrita ku nîkenda atwikia na atûnenkera nthîgûrû îrîa eerîîre biûjûjû bieetû.

²⁴MWATHANI aratwaatha twathîkagîre Maathana jaawe jonthe, na tûmûkîrage. Twathithia ûu tûgaakaraga tûrî kiindaaji na tûthinyaarîte.

²⁵Këethîra tûkaathîkagîra Maathana ja MWATHANI Mûrungu weetû, tuî tûkaa babaagîru.’”