Read KIMERU BIBLE PROTESTANT EDITION Kûr 7 Bible Online

Kûr 7 - KIMERU BIBLE PROTESTANT EDITION bible

Kûr 7

¹ Musa areera antû ba Israeli atîrî, “MWATHANI Mûrungu weenu akabwikia nthîgûrû îria akabwaa bwigwatîre yo. Bûgîtonya kû, akabwîngîra antû ba mîgongo îmingî tabo Ahiti na Agirigashi, na Aamori, na Akanaani, na Aperizi na Ahivi na Ajebushi. Mîgongo îîjî mûgwanja nî îmînene na îrî na inya nkûrûki yeenu.

²Îndî rîrîa MWATHANI Mûrungu weenu agatûma bûboombe ndweene, îgiita rîu bûbathirie buru. Bûkáthithia kîrîkanîro no kîrîkû nabo kana bûbaigîîrua kîaao.

³Bûkágûrana nabo kana bûreka nthaka cieenu igûra aarî baao kana aarî beenu bagûrwa nî nthaka ciaao.

⁴Tontû boomba kûgarûra aana beenu kuuma kîrî MWATHANI bakathaathayia mîrungu îngî. Tontû bûû, bûgatûma mûthûûro jwa MWATHANI jûbwîjîîra na jûbûthiria na mpwîî.

⁵ Ûrîa bûkathithia nî ûjû: Bûtharie iritîro bia igongwana biaao na bûthethere mîng'uanano ya itugî biaao na bûgitange itugî bia mûrungu jwa mûng'uanano jwa Ashera[1]. Bûcoke bwîîthie buru mîng'uanano yaao ya kwaaja.

⁶ “Bûkathithia ûu nîûntû buî bûrî antû babatheru kîrî MWATHANI Mûrungu weenu. Nîwe ûbûthuurîte bwaa antû baawe bongwa, kuuma kîrî antû bangî bonthe barîa barî nthîgûrûûne.

⁷MWATHANI aatabwendere na abûthuura tontû nî bwaarî babaingî nkûrûki ya antû barîa bangî. Îndî buî bwaarî mûgongo jwa antû batî thau.

⁸Îndî MWATHANI nî aabwendere na aroojûria wîrane bûrîa aaciîtîîrie biûjûjû bieenu. Arabûrita nthîgûrûûne ya Misri îrîa mûnene Farao aabweethetie nkombo.

⁹ Tontû bûû, menyeni atî MWATHANI Mûrungu weenu nîwe Mûrungu wenka, na nî mwîtîkua. We nî oojûragia kîrîkanîro kîaawe nthukîîne cionthe na akeenda barîa bonthe bamwendaga na wendo bûrîa batîthiraga.

¹⁰Îndî we atîthaa gûkanûkia na kûthiria buru barîa bamûthûûraga.

¹¹Tontû bûû, buî athîkagîreeni Maathana na Mawaatho na nkuagaya irîa ndabûritana naarua.

¹² “MWATHANI Mûrungu weenu ageeta na mbere kûûjûria kîrîkanîro na abwonie kîaao kîaawe kîrîa gîtîthiraga këethîra bûkamwathîkîra ûrîa aarîkanîîre na biûjûjû bieenu.

¹³MWATHANI Mûrungu akabwenda, na abûtharime na abûthegeyie. Akatharima kinya nchiarwa cieenu na maciara ja miuunda yeenu. Akatharima irio na ndibei na maguta jeenu. Akabûtharima bûgîe na ndîîthia înene ya ng'ombe na mbûri na ng'ondu bûrî nthîgûrû îrîa aaciîtîîrie biûjûjû bieenu atî akabwaa.

¹⁴Bûkatharimwa mono nkûrûki ya antû barîa bangî. Gûtîîthagîrwa kûrî na ntomûrûme nthata kana mûka nthata, kana ng'ombe nthaata nthîgûrûûne yeenu.

¹⁵MWATHANI akabweeberia mîrimo yonthe, na atîreka bûgwatwa nî mûrimo no jûmwe jwa mîrimo îrîa mîthûûku yaabwajagîria Misri. Îndî antû barîa bamûmenaga akabareetagîra mîrimo îîu mîthûûku.

¹⁶Naabuî bûkaathiria antû bonthe ba mîgongo îrîa MWATHANI Mûrungu weenu akabûnenkera. Bûkáabaigîîrua kîaao kana bûthaathayia mîrungu yaao nîûntû bwathithia ûu bûkaagiitara.

¹⁷“Bûkéeja kuuga atî antû ba mîgongo îîu îngî nî babaingî nkûrûki yeenu na bûrigara ûrîa bûkaabeenga bauma ku.

¹⁸Bûkáabakîreeni, îndî ririkaneeni ûrîa MWATHANI Mûrungu weenu aathithîîrie Farao na antû bonthe ba Misri.

¹⁹Bûririkane magerio jarîa manene bwoonaga, na biama na mantû ja kûrigaria jarîa MWATHANI Mûrungu weenu, ûrîa waabûritîre kûu Misri aathithîrie. Ûu nou MWATHANI Mûrungu weenu akaathithîria antû bonthe barîa buî bûgûkîra.

²⁰Amwe na jau, MWATHANI Mûrungu weenu akaabatûmîra maguu nîkenda jathiria barîa batigi baiciithîte bûtîkaboone.

²¹Tontû bûû, bûgákîreeni antû bau, nîûntû MWATHANI Mûrungu weenu arî amwe naabuî. Nîwe Mûrungu ûrî inya înene na wa gûkîrwa.

²²MWATHANI Mûrungu weenu akabwebaeberia antû ba mîgongo îîu mpaara mpaara. Bûkábathiria o rîmwe bwîja gûtûma nyomoo cia kîthaka cingîa, ibûthangîkia.

²³Îndî MWATHANI Mûrungu weenu agaatûma bûboombe ndweene, atûme bamake mono, bathire buru.

²⁴MWATHANI Mûrungu weenu akabûnenkera kinya anene baao nîkenda bûbathiria buru ûrîa batîririkanwa kaîrî nthîgûrûûne. Gûtî muntû ûkabûûmîîria. Îndî bûkabathiria bonthe.

²⁵Bwîthîîrie mîrungu yaao ya mîng'uanano; bûkáirîrîîria fetha kana thaabu îrîa yerereetue nayo kana bûmîjûkia yaa yeenu, îtîkeeje gûtûma bûgiitara, nîkwîthîrwa mîng'uanano îîu nî îmeni mono nî MWATHANI Mûrungu weenu.

²⁶Naabuî bûkéeja kûreeta mîrungu ya mîng'uanano nja cieenu bûtîkeeje kûgwatwa nî mûgiro jûrîa jûbagwataga. No mwanka bûmîmene na bûmîthûûre mono nîûntû îrî na îgi na nî îrumi nî MWATHANI.”