Read KIMERU BIBLE PROTESTANT EDITION Kûr 8 Bible Online

Kûr 8 - KIMERU BIBLE PROTESTANT EDITION bible

Kûr 8

¹Musa nî eerîre Aisraeli atîrî, “Athîkagîreeni Maathana jonthe jarîa ndabwatha naarua, nîkenda bûtûûra mwoyo na bûthegea na bwîta kwigwatîra nthîgûrû îrîa MWATHANI aciîtîrie atî akaa biûjûjû bieenu.

²Ningî bûririkanage ûrîa MWATHANI Mûrungu weenu abûtongeererie mîaka mîrongo îna kûu rwanda, nîkenda bwinyiiyia. Aathithîrie ûu nîkenda abûgeria na amenya këethîra bûkaathîkîra Maathana jaawe kana bûtîjaathîkîra.

³ Nî aatûmîre bûraigua mpara. Arabûrera na manna, irio birîa buî na bijûûjû bieenu bûtaijî. Aathithîrie ûu nîkenda bûmenya atî muntû atîtûûragua nî irio bionka, îndî atûûragua nî mantû jarîa jonthe MWATHANI augîîte.

⁴Mîaka îîu mîrongo îna bûtathirîrwa nî nguû cieenu kana bwimba magûrû nî gwîta.

⁵Menyeni atî o ta ûrîa muntû akanûkagia mwana waawe, nîu MWATHANI Mûrungu weenu abûkanûkagia.

⁶Nîu nandî athîkagîreeni Maathana ja MWATHANI Mûrungu weenu. Thingatageeni Mawaatho jaawe na bûmûkîrage.

⁷MWATHANI Mûrungu weenu akabwikia nthîgûrû înoru, îrîa îrî na mîuro na ithima biumîte irîmeene na ndûûjî iu igakûrûkîîra mîgwanthîîne na tûrîmeene.

⁸Nthîgûrû îîu îrîmagwa nkano na mûnyaki, na mîzabibû na mîkûû na mîkukumanga, na mîzeituni, na îkauma nainchû.

⁹Bûrî nthîgûrûûne îîu bûkarîîjaga biakûrîa na bûtîaga gantû no karîkû. Nî nthîgûrû îrî na maiga jarî na chuuma, na irîma biaayo birî na îturutia.

¹⁰Naabuî bûkarîîjaga bûnyire na bûkumagie MWATHANI Mûrungu weenu nîûntû bwa kûbwaa nthîgûrû înthongi.

¹¹ “Menyeereeni bûtîkeeje kûûrîrua nî MWATHANI Mûrungu weenu. Bûkarega kûthingataga Maathana na Mawaatho na nkuagaya irîa nkûbûritana naarua.

¹²Rîrîa bûkaarîa na bûnyire na bwaciakîre nyomba inthongi cia gûtûûra,

¹³na bwîthîrwe bûrî na rûûtû rwa ng'ombe na mbûri na ng'ondu, na bwîthîrwe bûrî na fetha na thaabu na birîa bionthe bûrî nabio biongeereke,

¹⁴bwimenyeere bûtîkeeje gwikumia na bûûrîrua nî MWATHANI Mûrungu weenu, ûrîa wabûritîre Misri, kûrîa bwaarî nkombo.

¹⁵Nîwe wabûtongeererie bûrakûrûkîîra rwanda rûnene na rwa kûmakania, rûrîa rwaarî na njoka înthûûku na tûng'aurî. Nthîgûrû îîu yaarî înjûmo na îtaarî na rûûjî. Ningî nîwe wabûtûrîîre rûûjî kuuma iigeene rîrîûmo.

¹⁶Nîwe wabûmathîîre kûu rwanda na biakûrîa biîtagwa manna birîa biûjûjû bieenu bitaijî. Athithîrie mantû jau nîkenda bwinyiia akîbûgeria, na abûguna nyumeene.

¹⁷Bûgáciîreeni atî, ‘Ûtonga bûbû mbûcûîte na inya na ûûme bwaakwa.’

¹⁸Ririkanageeni MWATHANI Mûrungu weenu, Tontû nîwe ûrîa wabweere inya ya gûcwaa ûtonga. Aathithîrie ûu nîkenda arikithia kîrîkanîro kîaawe kîrîa aciîtîîrie biûjûjû bieenu o ta ûrîa gûkari naarua.

¹⁹Ningî bûkoorîrua nî MWATHANI Mûrungu weenu, bûthingata mîrungu îngî na bûmîtumîkîra na bûmîthaathayia. Nî nkûbwîra na mma ntukû ya naarua atî, bwamîathîkîra, ntukû îîu nîrîo bûkathira.

²⁰Bwarega kwathîkîra MWATHANI Mûrungu weenu, akaabûthiria o ta ûrîa aathirîrie antû ba mîgongo îrîa yaarî o mbere yeenu.”