Read KIMERU BIBLE PROTESTANT EDITION Kûr 9 Bible Online

Kûr 9 - KIMERU BIBLE PROTESTANT EDITION bible

Kûr 9

¹Musa areera antû ba Israeli atîrî, “Thikîîrieni buî antû ba Israeli! Naarua bwîtîte kuuna mûuro jwa Jorodani nîkenda bwîta kwigwatîra nthîgûrû inene na irî na inya nkûrûki yeenu. Ningî bwigwatîre ntûûra inene na ciirigîri na nthingo indaaja.

²Nî mîgongo ya antû babanene na baraaja, tabo nchiarwa cia Anakimu barîa bwijî na bwigagua gûkîranwa bwaao atî: ‘Nî antû barîkû boomba kwithûkîra nchiarwa cia Anakimu bakaboomba ndweene?’

³Menyeni bwega atî nî MWATHANI Mûrungu weenu naarua ûkabûtongeeria akari ja mwanki jwa kûthirania. Akabathiria na atûme baage inya mbere yeenu, nîkenda bûbeenga na bûbathiria o ntûti o ta ûrîa MWATHANI abuîrîte.

⁴“Rîrîa MWATHANI Mûrungu weenu akaabwîngîra antû bau baume nthîgûrû îrîa bwîtîte, bûgaaciîra atî: ‘Tontû bwa waagîru bweetû bûtûmîte MWATHANI atûreeta twigwatîra nthîgûrû îîjî yaa yeetû!’ Nî mma MWATHANI abwîngîrîte antû ba mîgongo îîjî nîûntû bwa moothûûku jaao.

⁵Tî waagîru bweenu kana mantû jarîa bûthithagia jameega jagaatûma bwîta na bwigwatîra nthîgûrû yaao yaa yeenu. Îndî nî moothûûku ja antû ba mîgongo îîu jatûmîte MWATHANI Mûrungu abwîngîra bo na nîkenda arikithia wîrane bûrîa eerîîre biûjûjû, tabio Abrahamu na Isaaka na Jakubu.

⁶Menyeni bwega atî MWATHANI Mûrungu weenu atîkûbwaa nthîgûrû îîjî nthongi na inoru bwigwatîra yo tontû bûrî babaagîru. Îndî buî nî bwijî bûrî ndemi.

⁷“Ririkanageeni na bûkóorîrua nî ûrîa bwathûûrîrie MWATHANI Mûrungu weenu kûu rwanda. Ningî bûririkane bwatwîre bûremeete MWATHANI kuuma ntukû îrîa bwaumîre Misri mwanka rîrîa bwakinyîre gûntû gûkû.

⁸Nî bwatûmîre MWATHANI athûûra kinya bûrî kîrîmeene gîa Sinai, nawe aarî akuî kûbûthiria.

⁹ Nî ndaitîrie kîrîmeene îgûrû nîkenda ngîîra mbechua cia maiga irîa ciaandîki kîrîkanîro kîrîa MWATHANI aarîkanîîre naabuî. Ndîrakara kûu kîrîmeene ntukû mîrongo îna mûthenya na ûtukû ntîkûrûma gantû kana nkunda rûûjî.

¹⁰MWATHANI aranenkera mbechua ijîîrî cia maiga irîa aandîkîte wengwa. Nawe aandîkîte nteto irîa aarîîtie naabuî arî gatîgatî ka mwanki ntukû îrîa bwothûranîte kîrîmeene.

¹¹Rîrîa ntukû mîrongo îna, mûthenya na ûtukû ciaathirîre, MWATHANI nî aanenkeere mbechua iu ijîîrî cia maiga irîa ciaarî cia kîrîkanîro.

¹²“Ningî MWATHANI arambîîra atîrî, ‘Ithuranîre wîname na mpwîî, nîûntû antû baaku barîa waaritîre Misri nî bathithîtie ûthûûku. Nî batiganîte na ûrîa ndabaathîre bathithagie, na baithithîria mûrungu jwa mûng'uanano.’

¹³“MWATHANI arambîîra o kaîrî atîrî, ‘Ndîkûraithîîria kîrîndî gîkî na ndoona nî kîa antû ndemi.

¹⁴Tiga mbathirie buru ûrîa bûtîririkanwa kaîrî nthîgûrûûne. Naani ngakweethia îthe wa mûgongo jûmûnene na jûrî na inya nkûrûki yaao.’

¹⁵“Tontû bûû, ndîragarûka, ndîrenama kuuma kîrîmeene kîrîa gîaakanaga mwanki, nkamatîte mbechua iu cio-ijîîrî irîa ciaandîki kîrîkanîro.

¹⁶Naani ndîkûraithîîria, nî ndoonere nî mma nî bwîîtie mbere ya MWATHANI Mûrungu weenu. Naabuî bwaithithîria kajaû ka îturutia rîrîkerûre. Buî nî bwaarî bûkûrega kwaathîkîra ûrîa MWATHANI aabwîrîte bûthingataga.

¹⁷Naani nî ndaagerere mbechua iu cio-ijîîrî nthî ciaunîkanga bûkîonaga.

¹⁸Rîu ndîraturia maru, ndîreenamîîria mwanka nthîgûrû ndîrathaathayia MWATHANI ntukû mîrongo îna, mûthenya na ûtukû, ntîkûrûma gantû kana nkunda rûûjî. Ndaathithîrie ûu nîûntû nî bweeîrîîtie MWATHANI na bwatûma athûûra.

¹⁹ Nî ndaakîraga mûthûûro jûu jwaatûmîre MWATHANI athûûra nî buî na eenda kûbûthiria. Nawe araigua îromba rîaakwa kaîrî.

²⁰MWATHANI nî aathûûri mono nî Aaroni na aarî akuî kûmûthiria. Îndî îgiiteene o rîu nî ndaaroombere MWATHANI nîûntû bwaawe.

²¹Nî ndaajûkîrie kajaû karîa bwaaithithîrîtie karî mûrungu jwa mûng'uanano, ndîrakaunanga tûchunchî na ndîrakaîîthia. Rîu ndîrakathiaa buru karaa mûju. Ndîrajûkia mûju jûu ndîrajûgera karûûjîîne karîa kaaumaga kîrîmeene.

²² “Rîrîa bwaarî Tabera na Masaha na Kiburothi-hataava nî bwathûûrîrie MWATHANI.

²³ Ningî rîrîa MWATHANI eendaga buuma Kadeshi-barinea, nî aabwîrîre atîrî, ‘Îteeni bûkaigwatîre nthîgûrû îrîa nkabûnenkera.’ Naabuî nî bwaaremere, bûrauna Waatho bwaawe. Nî bwaaregere kûmwîtîkia kana bûthîkîîra ûrîa aabwîrîte.

²⁴Kuuma rîrîa ndaabûmenyere, bûtwîre bûregeete kwathîkîra MWATHANI.

²⁵“Tontû bûû, nî ndaaturîrie maru, ndîreenamîîria mwanka nthî, nkîrombaga MWATHANI, ntukû mîrongo îna; mûthenya na ûtukû. Ndaathithîrie ûu nîûntû MWATHANI nî augîîte akabûthiria.

²⁶Naani nî ndaarombere MWATHANI Mûrungu nkiugaga atîrî, ‘Ûkáthiria antû baaku, tabo rûgai rwaaku rûrîa woonokerie na inya yaaku. Antû barîa waaritîre Misri na inya yaaku înene.

²⁷Itû ririkana nthûûmba ciaaku Abrahamu na Isaaka na Jakubu. Ûgátega ûûmo bwa nkoro cia antû baba, kana ûthûûku na meeyia jaao.

²⁸Nîkenda antû ba nthîgûrû îrîa waatûritîre batîkeeje kuuga atîrî,’ ‘MWATHANI nî aaremerwe kûbakinyia nthîgûrû îrîa aabaciîtîrîtie. Nawe nîkwîthîrwa nî abameneete, aabaritîre gûkû nîkenda eeta kûboragîra rwanda.’

²⁹Îndî antû baba nî baaku, na nî rûgai rwaaku. Antû baba waabaritîre kûu Misri na inya yaaku înene na ûchamba bûbûnene.”