Read KIMERU BIBLE PROTESTANT EDITION Joh 1 Bible Online

Joh 1 - KIMERU BIBLE PROTESTANT EDITION bible

Joh 1

¹Kîambîrîriene, nî kwaarî na Rûteto; Rûteto rwaarî na Mûrungu; na Rûteto rwaarî Mûrungu.

²Kuuma kîambîrîria Rûteto rwaarî na Mûrungu.

³Into bionthe biombîrwe na njîra yaawe; gûtî gîntû kinya kîmwe kîombîrwe atî o.

⁴Ûtûûro buumaga kîrî we, na ûtûûro bûu nî bwaretere weerû kîrî antû.

⁵Weerû bûu bûthaaraga muunduune, naju muundu gûtî rîo jwaabûciinda.

⁶ Mûrungu nî aatûmîre muntû ûmwe weetagwa Johana.

⁷Johana nîwe weejîre arî mûkûûjî wa kwîra antû mantû jegiî weerû bûu. Eejîre nîkenda ûkûûjî bwaawe bûtûma antû bonthe beetîkia.

⁸We tîwe waarî weerû bûu, îndî eejîre akî arî mûkûûjî wa weerû bûu kîrî antû.

⁹Bûbû nîbu weerû bwa mma, weerû bûrîa bwîjaga nthîgûrûûne, na bûkamûrîkîra antû bonthe.

¹⁰Kinya këethîra Rûteto nî aarî nthîgûrûûne na nthîgûrû yoombîrwe na njîra yaawe, nthîgûrû îtamûmenyere.

¹¹We nî eetîre kwaao kungwa, îndî antû ba kwaao batamwîtîkîrîrie.

¹²Îndî barîa bonthe baamwîtîkîrîrie na baramwîtîkia, nî aabaeere inya ya kwaa aana ba Mûrungu.

¹³Bataeere aana ba Mûrungu na inya ya kîûmuntû, kana inya ya mwîrî, kana kwenda kwa muntû îndî nî kwenda kwa Mûrungu.

¹⁴Rûteto nî aaere muntû, na nî aatûûrîre amwe naatuî, oojûri ûtugi na ûûma. Nî twonere mwago jwaawe; mwago jwa ûrîa ûrî Mûtaana wa mûûmwe wa Îthe.

¹⁵Johana nî aakûûjîrîre mantû jaawe rîrîa aatûmîîrîrie na kajû gakanene akiugaga, “Ûûjû nîwe ndaaragia mantû jaawe rîrîa ndaugîre, ‘Muntû ûrîa wîîjîte nyuma yaakwa arî îgweta nkûrûki yaakwa, nîûntû nî aarî o mbere ya ntîraciarwa.’”

¹⁶Kuumania na wingî bwa ûtugi bwaawe, nî atweete ûtugi na itharimo bibingî mono.

¹⁷Nîkwîthîrwa Mûrungu aatumîîre Musa gûtûretera Waatho, îndî aatumîîre Jesû Kristû gûtûretera ûtugi na ûûma.

¹⁸Gûtî muntû kinya ûmwe woona Mûrungu. Mûtaana wa mûûmwe wa Mûrungu, ûrîa ûng'uanene nawe na akaraga rûteere rwa Îthe, nîwe waatûmenyithîrie Mûrungu nûû.

¹⁹Bûbû nîbu ûkûûjî bûrîa Johana aeejanîre rîrîa atongeeria ba Ayahudi ba kuuma Jerusalemu baamûtûmîîre athînjîri-Mûrungu na Alawi nîkenda bamûûria we nîwe ûû.

²⁰Johana atarega kûbacokeria îndî nî aabacokerie carûrûkû arabeera, “Ûûni tî ni Mesia.”

²¹ Rîu baramûûria, “Nîgwe ûû? Nîgwe Elija?” Johana arabacokeria, “Arî, tî ni.” Nabo baramûûria, “Nîgwe kîroria?” Nawe aracokia arauga, “Arî.”

²²Rîu baramûûria, “Nîgwe ûû îndî? Twîre, nîkenda twona bwa kwîra barîa batûtûmîre. Gwe ûriuga nîgwe ûû?”

²³ Johana arabacokeria, “Ûûni nî ni ûrîa kîroria Isaya aandîkîre nteto imbegiî ûjû: ‘Ni ndî kajû ka muntû ûgûtûmîîria rwanda akiugaga; Erekanieni njîra ya Mwathani.’”

²⁴Antû bau baatûmi nî Afarisayo

²⁵barooria Johana, “Nîkî îndî ûbatithanagia këethîra tîgwe Mesia, kana Elija, kana kîroria kîrîa?”

²⁶Johana arabacokeria, “Ûûni mbatithanagia na rûûjî, îndî kûrî ûmwe ûrî gatîgatîîne keenu, ûrîa bûtiijî.

²⁷Ûu nîwe wîjîte nyuma yaakwa, îndî ni ntîagîrîte kwogora mîrigi ya iraatû biaawe.”

²⁸Mantû jaja jaathithîkîre Bethania, rûtere rwa gaiti ka mûuro jwa Jorodani, arîa Johana aabatithanagîria.

²⁹Rûûneene, Johana aroona Jesû eetîte kîrî we na arauga, “Raithîrieni, Gatûrûme ka Mûrungu, karîa kebagia meeyia ja nthîgûrû.

³⁰Ûûjû nîwe ndîraaragia mantû jamwegiî nkiugaga, ‘Kûrî we wîjîte nyuma yaakwa ûnkûrûkîte, nîûntû nî aatwîre o mbere ya ntîraciarwa!’

³¹Ni ningwa ntaamwijî, îndî ndeejîre kûbatithania na rûûjî nîkenda amenyekana nî antû ba Israeli.”

³²Johana nî aaritîre ûkûûjî arauga, “Nî ndonere Roho Ûmûtheru eenamîte kuuma îgûrû akari ta kîjea akara kîrî we.

³³Ni ntaamwijî, îndî ûrîa waantûmîre mbîja kûbatithia antû na rûûjî nî aarî akûmbîîra, ‘Muntû ûrîa Roho wa Mûrungu akeenamîîra kuuma îgûrû na akare kîrî we, nîwe ûbatithanagia na Roho Ûmûtheru.’

³⁴Ûûni nî mwonete na ga nkûbwîra atî ûûjû nîwe Mûtaana wa Mûrungu.”

³⁵Rûûneene, Johana nî aarûngami antû o au amwe na aritwa baawe baîrî.

³⁶Rîrîa oonere Jesû akûrûkîte arauga, “Tegeeni! Ûûjû nîwe Gatûrûme ka Mûrungu.”

³⁷Aritwa bau bakwigua Johana akiuga mantû jau, barathingata Jesû.

³⁸Jesû aragarûka na akwona aritwa bau bamûthingatîte arabooria, “Nîmbi bûgûcwa?” Nabo baramûcokeria, “Rabi, ûû nî kuuga ‘Mûritani’ nîkû ûgûkara?”

³⁹Jesû arabeera, “Njûûni bûkoone.” Aritwa bau baramûthingata na baroona gûntû kûrîa akaraga. Tontû kwaarî akuî thaa kûmi cia mûthenya, barakara nawe mwanka ûgoro.

⁴⁰Ûmwe wa antû baîrî barîa baigîrue Johana akîaria na barathingata Jesû aarî Anderea, mûtaana wa ng'ina wa Simioni Peterû.

⁴¹Anderea nî aatîrimîre Simioni, mûtaana wa ng'ina arî wa mbere na aramwîra, “Tûkwona Mesia” (ûu nî kuuga Kristû).

⁴²Rîu araikia Simioni kîrî Jesû. Nawe Jesû aramûraithîria arauga, “Gwe wîtagwa Simioni mûtaana wa Johana îndî kuuma nandî ûgeetagwa Kefa” (na Kîgriiki nî Peterû, na nî kuuga “Iiga”).

⁴³Rûûneene Jesû araambîrîria gwîta Galili na arî njîreene aroona Filipû na aramwîra atîrî, “Nthingata.”

⁴⁴Filipû aarî wa kuuma ntûûreene ya Bethisaida, kûrîa Anderea na Peterû baûmîte.

⁴⁵Nawe Filipû aratirima Nathanieli na aramwîra, “Tûkwona muntû ûrîa Musa aandîkîre mantû jamwegiî maukuune ja Waatho, na ûrîa kinya iroria biaandîkîre nteto imwegiî, nawe nî Jesû mûtaana wa Josefu, wa kuuma Nazarethi.”

⁴⁶Nathanieli arooria Filipû, “Kûrî gîntû gîkîega kîûmba kuuma Nazarethi?” Filipû aramûcokeria, “Njû ûkoone.”

⁴⁷Rîrîa Jesû oonere Nathanieli eejîte kîrî we, arauga atîrî, “Tegeeni! Ûûjû nî Mûisraeli wa mma; atî waayia ndeene yaawe.”

⁴⁸Nawe Nathanieli aramûûria, “Nîatîa ûmbijî?” Jesû aramwîra, “Rîrîa ûgûkari nthî gîtina kîa mûkûû, mbere ya Filipû agwîta, nî ngûkwene.”

⁴⁹Rîu Nathanieli aramwîra, “Mûritani, gwe ûrî Mûtaana wa Mûrungu. Gwe nîgwe Mûnene wa Israeli!”

⁵⁰Jesû aramwîra, “Nî ûrîa ndakwîra atî nî ngûkwene ûrî gîtina kîa mûkûû nîkîo gîatûma wîtîkia? Ûkoona mantû jamanene nkûrûki ya jaja.”

⁵¹ Jesû areeta na mbere kuuga, “Ga nkûbwîra na mma atî bûkoona Îgûrû rîkîrugûka, na araîka ba Mûrungu bagiitagia na kwinama kîrî Mûtaana wa Muntû.”