Read KIMERU BIBLE PROTESTANT EDITION Joh 10 Bible Online

Joh 10 - KIMERU BIBLE PROTESTANT EDITION bible

Joh 10

¹“Ga nkûbwîra na mma atî, muntû wonthe ûrîa ûtîkûrûkaga kiugûûne kîa ng'ondu atîkûrûkîrîîte mûrangoone, îndî agatonyeera antû angî, ûu nî mwamba na mûtuunyani.

²Îndî ûrîa ûtonyagîîra mûrangoone, nîwe mûrîîthi wa ng'ondu.

³Mûkaria wa mûrango jwa kiugû nî aamûrugûragîra, na ng'ondu ikaigua kajû kaawe. Eetaga ng'ondu ciaawe, o ng'ondu na riîtwa rîaayo na agacitongeeria agaciumagaria.

⁴Aathiria kuumagaria ng'ondu ciaawe cionthe, nî eetaga arî mbere yaacio, nacio ikamûthingata, nîûntû nî ciijî kajû kaawe.

⁵Ng'ondu iu itîendaga kûthingata mûgeni, îndî ka imatûkaga kuuma kîrî we nîûntû itiijî kajû ka ageni.”

⁶Jesû aabeerîre ngerekano îîu îndî bo bataaciûrîre ûrîa aabeeraga.

⁷Tontû bûû, Jesû arabeera kaîrî atî, “Ga nkûbwîra na mma atî, ni nî ni mûrango jûrîa ng'ondu ikûrûkagîîra.

⁸Barîa bonthe beejîre mbere yaakwa nî aamba na atuunyani, nacio ng'ondu itaabathîkîîre.

⁹Ni nî ni Mûrango. Muntû wonthe ûrîa ûgakûrûkagîîra kîrî ni akoonokua na agatonyaga na akaumagara na akoona gîa kûrîa.

¹⁰Mwamba eejaga kwiya na kûûraga na kwînyangia akî. Ni mbîjîte nîkenda bûgîta ûtûûro, ûtûûro bûbûjûru.

¹¹“Ni nî ni mûrîîthi ûmwega. Mûrîîthi ûmwega airitaga na agakua nîûntû bwa ng'ondu ciaawe.

¹²Mûrîîthi wa kwaandîkwa, nîûntû tî mwene ng'ondu, oonaga mbawa îîjîte agatiga ng'ondu na akamatûka. Rîu mbawa îkagwata ng'ondu na ingî ikanyagana.

¹³We amatûkaga nîûntû nî mwandîkwa na atîmakaga ûrîa ng'ondu igakara.

¹⁴Ni nî ni mûrîîthi ûmwega. Nî mbijî ng'ondu ciaakwa, nacio nî imbijî.

¹⁵ O ta ûrîa Baaba ambijî naani nî mbijî Baaba na nî ncieejanaga gûkua nîûntû bwa ng'ondu.

¹⁶Ndî na ng'ondu ingî itî ûrîîthine bwaakwa. No mwanka mbîte nkaigîîre kinya cio na ikaathîkagîra kajû gaakwa. Tontû bûû, gûkeethîrwa kûrî na ûrîîthi bûmwe na mûrîîthi ûmwe.

¹⁷“Baaba nî ampendeete nîûntû nî ndiiritîte gûkua nîkenda ngatûûra kaîrî.

¹⁸Gûtî muntû ûûmba gûntuunya ûtûûro îndî nî ni ningwa ngûcieejana nîkenda nkua na kwenda gwaakwa. Ni ndî na inya ya gûcieejana nkua na ndî na inya ya gûtûûra kaîrî. Ûu nîu Baaba ambîrîte nthithie.”

¹⁹Ayahudi nî baakararanîrie kaîrî mwanka bararemwa kûgwatanîra nîûntû bwa nteto iu.

²⁰Babaingî baao nî baugîre atîrî, “Arî na roho înthûûku na arî na nthû. Kûrî na gîtûmi kîa kûmûthikîîra?”

²¹Bangî barauga, “Rwaria rûrû tî rwa muntû ûrî na roho înthûûku. Ka roho înthûûku yûûmba gûtûma mûtumuumu oona?”

²²Kûu Jerusalemu nî kwaarî na mambura ja kwathûrîra Mûrungu kîûrû.

²³Îgiita rîu rîaarî rîa mpio na Jesû nî aarî kîûrûûne rwembeene rûrîa rwetagwa rwa Solomoni.

²⁴Ayahudi nî baamûthiûrûkîre na baramûûria, “Ûgeeka nkoro cieetû irî na nkaanja mwanka rî? Këethîra nîgwe Mesia, twîre carûrûkû.”

²⁵Jesû arabacokeria, “Nî nthirîtie kûbwîra, îndî buî bûtîmbîtîkagia. Ngûgî irîa ndîtaga riîtweene rîa Baaba nîcio inkûûjagîîra.

²⁶Îndî buî bûtîîtîkagia tontû bûtî bamwe ba ng'ondu ciaakwa.

²⁷Ng'ondu ciaakwa nî ciigagua kajû gaakwa; ni nî nciijî, nacio nî inthingataga.

²⁸Ûûni nî mpeejaga ng'ondu ciaakwa ûtûûro bwa kenya na kenya; na itîkorokua, na gûtî muntû ûkoomba gûcirita kuuma kîrî ni.

²⁹Baaba ûrîa ûnenkerete cio nîwe mûnene nkûrûki ya bonthe, na gûtî we ûûmba gûcirita kuuma ûmenyeriine bwaawe.

³⁰Ûûni na Baaba tûrî kîmwe.”

³¹Tontû bûu Ayahudi barajûkia maiga nîkenda bamûringa najo.

³²Rîu Jesû arabeera, “Nî mbwonetie ngûgî inyingî injega kuuma kîrî Baaba. Kîrî ngûgî iu cionthe rî, nî irîkû igûtûma bwenda kûndinga na maiga?”

³³ Ayahudi baramûcokeria, “Tûtîgûkûringa na maiga nîûntû bwa ngûgî injega irîa ûthithîtie, îndî nîûntû bwa kûruma Mûrungu. Nîkwîthîrwa gwe ûrîcieethia Mûrungu na ûrî muntû.”

³⁴ Jesû arabacokeria, “A rî, gûtîandîki waathoone bweenu: ‘Ni nî mbugîîte atî buî bûrî mîrungu?’

³⁵Mûrungu nî eetîre barîa baakinyîîrwe nî rûteto mîrungu. Rûteto rwaawe nî rwa mma na rûtîûmba kûgarûrwa.

³⁶Nîkî buî bûkuuga nkûruma Mûrungu na nî ni ûrîa Baaba aathuurîre na aarantûma nthîgûrûûne nîûntû nkuuga ‘Ndî Mûtaana wa Mûrungu?’

³⁷Këethîra ntîkûrita ngûgî cia Baaba, bûkambîtîkieni.

³⁸Îndî këethîra nîcio nkûrita, kinya këethîra bûtîkûmbîtîkia, îtîkieni ngûgî iu nîkenda bûmenya na bûciûra atî Baaba arî ndeene yaakwa, naani ndî ndeene yaawe.”

³⁹Nî baagererie kûmûgwata o kaîrî îndî arathonoka na araaciîtîra.

⁴⁰ Jesû nî aaunîre rwongo rûrîa rûngî rwa mûuro jwa Jorodani kaîrî, na areeta antû arîa Johana aabatithanagîria na arakara o.

⁴¹Antû babaingî nî beetîre kîrî we barauga, “Gûtî kîama Johana aarîngîre îndî mantû jarîa Johana aarîrie jegiî muntû ûûjû nî ja mma buru.”

⁴²Tontû bûu antû babaingî nî baamwîtîkîrie arî antû au.