Read KIMERU BIBLE PROTESTANT EDITION Joh 11 Bible Online

Joh 11 - KIMERU BIBLE PROTESTANT EDITION bible

Joh 11

¹ Nî kwaarî na muntû ûmwe waajîtue weetagwa Lazarû, wa kuuma Bethania. Bethania nîyo ntûûra îrîa Maria na mwarî wa ng'ina Mariitha baatûûraga.

² Maria nîwe waakîre Mwathani maguta jarî na marashi na aaramwangûra na mûtuundu jwaawe. Lazarû ûrîa waajîtue aarî mûtaana wa ng'ina.

³Tontû bûû, aarî bang'ina nî baatûmanîre kîrî Jesû bakiugaga: “Mwathani, mûcoore waaku nî ajîtue.”

⁴Rîrîa Jesû aigîrue ûu arauga, “Mûrimo jûjû jûtîreeta gîkuû, îndî nî jwa gûtûma Mûrungu akûmithua na Mûtaana wa Mûrungu akûmithua.”

⁵Jesû nî eendeete Mariitha, na mwarî wa ng'ina na Lazarû mono.

⁶Kinya këethîra Jesû nî eerîrwe atî Lazarû nî aajîtue, nî aakarîre gûntû kûu aarî ntukû ingî ijîîrî.

⁷Rîu areera aritwa baawe, “Twîteeni Judea kaîrî.”

⁸Aritwa baawe baramwîra atîrî, “Mûritani, tî kagiita gagakai gakûrûkîte kuuma rîrîa Ayahudi bareendaga gûkûringa na maiga? Ka ûkwenda gûcoka ku kaîrî?”

⁹Jesû arabacokeria, “Mûthenya nî jwa mathaa îkûmi na jaîrî. Muntû agëeta kûrî mûthenya atîûmba kûgiitara nîûntû nî amûrîkîri nî weerû bûrîa bûthaaraga nthîgûrûûne.

¹⁰Îndî muntû agëeta ûtukû nî agiitaraga nîûntû gûtî na weerû.”

¹¹Rîu Jesû akuuga ûu arabeera, “Mûcoore weetû Lazarû nî amami, îndî ûûni ngeeta kûmûûkia.”

¹²Aritwa baramwîra, “Mwathani, këethîra ka amami agookîra.”

¹³Bo baathûgaanagia atî Jesû aabeeraga mantû jegiî kûmama toro, îndî aaragia mantû ja gîkuû kîa Lazarû.

¹⁴Rîu Jesû arabeera carûrûkû atîrî, “Lazarû nî akuîte.

¹⁵Ni nî ngwîrîtue nîûntû bweenu nîkwîthîrwa ntîgûkarî nao, twîteeni kîrî we nîkenda bwîtîkia.”

¹⁶Toma, ûrîa weetagwa Maatha, areera aritwa bangî atîrî, “Twîteeni kinya tuî tûgakujanîrie nawe!”

¹⁷Rîrîa Jesû aakinyîre kûu, nî eethîîre Lazarû agûkara kaburiine ntukû inya.

¹⁸Ntûûra ya Bethania yaarî ûû ta kilomita ithaatû kuuma Jerusalemu.

¹⁹Ayahudi babaingî nî baarî bagwîta kwa ba Maria na Mariitha kûbaboreria nîûntû bwa gîkuû kîa mûtaana wa ng'ina.

²⁰Rîrîa Mariitha aigîrue atî Jesû nî eejîte, nî eetîre kûmûthagaana îndî Maria aratigwa nyomba.

²¹Mariitha nî eerîre Jesû atîrî, “Mwathani, këethîra nî ûrarî aja mûtaana wa chiaa atîngîkua.

²²Îndî nî mbijî atî kinya nandî bûrîa bunthe ûkaromba Mûrungu agakûthithîria.”

²³Jesû aramwîra, “Mûtaana wa nyakwe akariûka.”

²⁴Mariitha aramûcokeria, “Îî, nî mbijî atî akariûka ntukû ya mûthia rîrîa akuû bakariûka.”

²⁵Jesû aramwîra, “Ûûni nî ni kûriûka na nî ni ûtûûro. Ûrîa ûmbîtîkagia, kinya agakua agatûûra mwoyo,

²⁶na ûrîa ûrî mwoyo na nî ambîtîkîtie atîkorookua. A gwe rî, nî ûgwîtîkia ûû?”

²⁷Mariitha aramwîra, “Îî Mwathani, ûûni nî ngwîtîkia atî gwe nîgwe Mesia, Mûtaana wa Mûrungu, ûrîa weejîre nthîgûrûûne.”

²⁸Nyuma ya kuuga ûû, Mariitha areeta gwîta Maria, mwarî wa ng'ina, aramwîra na kîoe “Mûritani arî aja na nî agûgwîta.”

²⁹Maria akwigua ûû, arookîîra ntûti na areeta kîrî Jesû.

³⁰Îgiita rîu Jesû ataarî agûtonya ntûûreene îndî aarî o arîa Mariitha aarî agûcemania nawe rîrîa aamûthaganîte.

³¹Rîrîa Ayahudi barîa baarî nyomba amwe na Maria bakîmûboragîîria boonere arûngama na aumagara na mpwîî, nî baamûthingatîre nîûntû nî baathûgaanagia atî ka eetîte kûrîrîra kaburiine.

³²Rîrîa Maria aakinyîre arîa Jesû aarî, nî aamwonere na araturia maru aramwîra, “Mwathani, këethîra nî ûrarî aja, mûtaana wa chiaa atîngîkua.”

³³Rîrîa Jesû oonere Maria akîrîra na kinya Ayahudi barîa beejanîtie nawe bakîrîra, nî aaigîrue kîeba gîkînene na arathangîka nkoroone mono.

³⁴Rîu arooria, “Nîkû bûmwîkîte?” Nabo baramwîra, “Mwathani, îja woone.”

³⁵Jesû ararîra.

³⁶Rîu Ayahudi barauga, “Oneeni ûrîa aramwendeete!”

³⁷Îndî bamwe baao barauga, “Këethîra nî aatûmîre mûtumuumu oomba kwona rî, ka atîngîûmba kûrigîîria muntû ûûjû atîgaakue?”

³⁸Jesû o akiigagua kîeba nkoroone nî eetîre kaburiine. Gîkurungu nîkîo kîaarî kaburi na nî gîakunîki na iiga rîrînene.

³⁹Jesû arabeera, “Riteeni iiga!” Mariitha, mwarî wa ng'ina wa muntû ûû waakuîte aramwîra, “Mwathani, nî akûnunka nîûntû nî akarîte kaburiine ntukû inya.”

⁴⁰Jesû aramwîra, “Uga ntîkwîrîre atî weetîkia ûkoona ûkumio bwa Mûrungu?”

⁴¹Tontû bûû, barariita iiga. Rîu Jesû araraithîîria îgûrû na arauga, “Baaba, nî ngûgûcokeria nkaatho nîûntû gwe nî ûnthikagîîra.

⁴²Nî mbijî atî nî ûnthikagîîra magiita jonthe. Îndî ndiuga ûû nîûntû bwa antû baba barî aja nîkenda beetîkia atî nîgwe waantûmîre.”

⁴³Athiria kuuga ûu, areetana na kajû gakaneene: “Lazarû, umagara!”

⁴⁴Lazarû araumagara aogi mwîrî jûnthe na itambaa. Njara na magûrû na kinya ûthiû nî biaogi. Jesû arabeera, “Mwoogoreni, na bûmûrekeerie aciîtîre.”

⁴⁵Rîrîa Ayahudi babaingî barîa beejanîtie na Maria boonere ûntû bûu Jesû aathithîrie bareetîkia Jesû.

⁴⁶Îndî bamwe kîrî bo bareeta kîrî Afarisayo na barabeera ûrîa Jesû aarî akûthithia.

⁴⁷Rîu athînjîri-Mûrungu barîa anene na Afarisayo, bareeta mûcemanio jwa kîama kiaao na baroorania, “Nîatîa tûkûthithia? Nîkwîthîrwa muntû ûûjû nî akûringa biama bibingî mono.

⁴⁸Twamûreka eeta na mbere kûthithia ûû, antû bonthe bakamwîtîkia, na Aroma beeje benyaangie kîûrû amwe na mûgongo jweetû.”

⁴⁹Rîu ûmwe waabo, weetagwa Kaifa, ûrîa waarî mûthînjîri-Mûrungu ûrîa mûnene mwakeene jûu arabeera, “Buî gûtî u bwijî.

⁵⁰Ka buî bûtîkwona atî nî kwagîrîte muntû ûmwe akue nîûntû bwa antû bonthe, antû a mûgongo junthe jûthirua?”

⁵¹Aataugîre ûu na bwaawe wengwa, îndî aaugîre ûu nîûntû aarî mûthînjîri-Mûrungu ûrîa mûnene mwakeene jûu, na nîka aaroragia atî Jesû agakua nîûntû bwa mûgongo jwa Ayahudi.

⁵²Tî ûntû bwa Ayahudi bonka akî, îndî agaakua nîkenda oothûrania amwe aana ba Mûrungu barîa banyaganîte nthîgûrûûne yonthe.

⁵³Kuuma ntukû îîu atongeeria ba Ayahudi baraambîria kûbanga ûrîa bakooraga Jesû.

⁵⁴Tontû bûû, Jesû aratiga gwîtagîîra kûrîa Ayahudi baakaraga, na areeta akuî na rwanda, ntûûreene yeetagwa Efuraimu na arakara ku amwe na aritwa baawe.

⁵⁵Thigûûnkû ya Ayahudi ya Pasaka nî yaarî akuî gûkinya na antû babaingî kuuma gûntû na gûntû nî beetîre Jerusalemu nîkenda baitheeria mbere ya thigûûnkû îîu îkinya.

⁵⁶Barî kîûrûûne nî baacwaga Jesû bakîûranagia, “Nî bûkwona teeka akeeja thigûnkûûne îîjî?”

⁵⁷Athînjîri-Mûrungu barîa anene na Afarisayo nî baarî bakûrita Waatho atî muntû wonthe ûrîa ûkamenya kûrîa Jesû aarî noo mwanka abamenyithie nîkenda bamûgwata.