Read KIMERU BIBLE PROTESTANT EDITION Joh 12 Bible Online

Joh 12 - KIMERU BIBLE PROTESTANT EDITION bible

Joh 12

¹Ntukû ithanthatû mbere ya thigûûnkû ya Pasaka îkinya, Jesû nî aakinyîre Bethania nja ya ba Lazarû, ûrîa aarî akûriûkia kuuma kîrî akuû.

²Rîu baramûrugîra biakûrîa bia ûgoro. Mariitha nîwe waabaikagîria biakûrîa. Lazarû nî aarî ûmwe wa barîa baarîîjaga amwe na Jesû.

³ Rîu Maria arajûkia nusu lita ya maguta ja nado, jarîa jaarî ja goro, na jaaeeraga bwega, na araaka magûrû ja Jesû na arajaangûra na mûtuundu jwaawe. Nyomba yonthe îraeera bwega mono.

⁴Rîu Judasi Iskarioti, ûmwe wa aritwa baawe, ûrîa waarî akuî kûmûkunyanîra arauga,

⁵“Nîkî maguta jau jatîenderue denari magana jathatû na mbeecha iu igaîrwa nkîa?”

⁶Ataugîre ûu nîûntû nî aarî na bata na nkîa, îndî nîûntû aarî mwamba. Nîwe weekaga mûbuko jwa mbeecha na nî amenyeretie kwiya mbeecha kuuma mûbukoone jûu.

⁷Îndî Jesû arauga, “Tiganeni nawe! Rekeeni eeke jau arî najo nîûntû bwa ntukû ya kûthikwa gwaakwa.

⁸ Nkîa ikeethîrwa irî kîrî buî magiita jonthe, îndî bûtîthîrwa bûrî naani magiita jonthe.”

⁹Rîrîa Ayahudi babaingî bamenyere atî Jesû arî Bethania, nî beetîre ku. Batetîre ku nîûntû bwa kûmwona akî, îndî nîkenda boona kinya Lazarû ûrîa Jesû aarî akûriûkia kuuma kîrî akuû.

¹⁰Tontû bûû, athînjîri-Mûrungu barîa anene barabanga atî no mwanka kinya Lazarû ooragwe,

¹¹nîûntû Ayahudi babaingî nî baabatigaga na bageetîkia Jesû nîûntû bwa Lazarû.

¹²Rûûneene, antû babaingî barîa beetîte thigûnkûûne ya Pasaka, nî baigîrue atî Jesû nî aarî njîreene eetîte Jerusalemu.

¹³ Tontû bûû, nî baajûkîrie mpang'i cia mîkîndû na baraumagara bareeta kûmûthagaana bakiugaga na kajû gakanene, “Mwathani arokumua! Nî atharimi ûrîa wîjîte riîtweene rîa Mwathani. Mûnene wa Israeli arotharimwa.”

¹⁴Jesû nî eethîîre gatigiri na kareeta kamûkamatîte o ta ûrîa Maandîko jaugîîte:

¹⁵ “Ntûûra ya Zaiûni, ûgákîra! Raithîîria, mûnene waaku nî eejîte, akarîrîte gatigiri.”

¹⁶Îgiita rîu aritwa baawe batoombîre gûciûra, îndî rîrîa Jesû aakumithîrue, nîrîo baariikanîre atî mantû jaja jamwegiî nî jaandîki na noo jo antû baarî bakûmûthithîria.

¹⁷Antû barîa baarî amwe na Jesû rîrîa eetîre Lazarû kuuma kaburiine na aramûriûkia kuuma kîrî akuû, nî beetîre bakîîraga antû ûrîa kwathithîkîre.

¹⁸Kîrîa gîatûmîre antû bau beeta kûthagaana Jesû nî atî nî baarî bakuigua atî nî aarî akûringa kîama kîu.

¹⁹Rîu Afarisayo bareerana, “Nî bûkwona gûtî u tûûmba kûthithia! Raithîrieni, antû bonthe bakûmûthingata.”

²⁰Nî kwaarî na Agriiki bamwe kîrî antû barîa beetîte Jerusalemu kûthaathayia Mûrungu îgiiteene rîa thigûûnkû îîu.

²¹Nî beetîre kîrî Filipû, ûrîa waumîte Bethisaida ya Galili, baramwîra, “Mûkaathe, nî tûkwenda kwona Jesû.”

²²Filipû areeta areera Anderea, na bobaîrî bareeta kwîra Jesû.

²³Jesû arabeera, “Îgiita rîa gûkumithua kwa Mûtaana wa Muntû rîgûkinya.

²⁴Ga nkûbwîra na mma atî mpîndî ya nkano îkaraga îrî mpîndî tiga îkagwa nthî mûthetuune na îkauma. Yaumaa nîrîo îciaraga maciara jamaingî.

²⁵ Muntû ûrîa wendeete ûtûûro bwaawe, nîka akaûrîrwa nîbu îndî ûrîa ûthwîre ûtûûro bwaawe nthîgûrûûne îîjî akabûtûûria kenya na kenya.

²⁶Këethîra muntû nî akwenda gûntumîkîra noo mwanka anthingate, nîkenda akeethîrwa arî amwe naani kunthe kûrîa nkeethîrwa ndî. Muntû wonthe ûrîa ûntumîkagîra akaaewa gîtîîo nî Baaba.

²⁷“Nandî nkoro yaakwa nî îkûthangîka mono. Îndî mbuge atîa? Baaba ûgéetîkîîria mantû jarîa jarî mbere yaakwa jambîjîîra. Îndî arî, gîkî nîkîo gîatûmîre mbîja, nîkenda nkûrûkîîra igiitene rîrî rîa mîthangîko.

²⁸Baaba, kumithia riîtwa rîaaku.” Rîu kajû karauma îgûrû karauga, “Nî ndîkumithîtie na nkarîkumithia kaîrî.”

²⁹Antû barîa baarûngi o bakwiigua kajû kau, bamwe barauga atî nî ngorogoro yagamba, bangî barauga atî nî mûraîka wa mwarîria.

³⁰Jesû arabeera, “Kajû kau gatîreeja nîûntû bwaakwa, îndî nîûntû bweenu.

³¹Nandî nîrîo îgiita rîa nthîgûrû îîjî kûgambithua; nandî mwathi wa nthîgûrû îîjî akeengwa.

³²Rîrîa ngokîîrua îgûrû kuuma nthî ngatûma antû bonthe beeja kîrî ni.”

³³Augîre ûû kwonanania mûthemba jwa gîkuû kîrîa agaakua.

³⁴ Rîu antû baramûcokeria atîrî, “Twîragwa maandîko jaugaga atî Mesia agatûûra kenya na kenya. Nîatîa îndî gwe ûkuuga atî no mwanka Mûtaana wa Muntû ookîrue îgûrû? Mûtaana wa Muntû ûu rî, nûû?”

³⁵Jesû arabeera, “Weerû bûrî naabuî kagiita gagakai. Îteeni rîrîa bûrî na weerû nîkenda muundu jûtîkabwîjîîre; nîûntû ûrîa wîtaga kûrî na muundu atîonaga kûrîa eetîrîte.

³⁶Rîrîa bûrî na weerû, îtîkieni weerû, nîkenda buî bûaa antû ba weerû.” Jesû akwaria nteto iu, areeta na araiciitha.

³⁷Kinya këethîra nî aaringîre biama bibingî mono bakîonaga, baatamwîtîkîrie,

³⁸ nîkenda nteto irîa kîroria Isaya augîre ciûjûra: “Mwathani, nûû ûreetîkia ntûmîîri yeetû? Nûû Mwathani aguûrîrîte inya yaawe?”

³⁹Tontû bûû, batîngîûmba gwîtîkia nîûntû Isaya nî aaugîre kaîrî,

⁴⁰ “Mûrungu nî atûmîte baarega kûona, na oomia nkoro ciaao; nîkenda batîkoone na meetho jaao, na baciûra na nkoro ciaao; bancokeera nîkenda mbooria.”

⁴¹Isaya nî aarîrie nteto iu nîûntû nî oonere ûkumio bwa Jesû na araaria mantû jamwegiî.

⁴²Amwe na jau, antû babaingî kinya atongeeria ba Ayahudi nî beetîkîrie Jesû. Îndî nîûntû nî baakîraga Afarisayo bataamuumbûrîre batîkeeje kwîngwa kîromberoone.

⁴³Nîkwîthîrwa nî beendere gûkumua nî antû nkûrûki ya gûkumua nî Mûrungu.

⁴⁴Jesû nî augîre na kajû gakanene, “Muntû wonthe ûrîa ûmbîtîkagia tî ni ninka eetîkagia îndî nî eetîkagia kinya ûrîa waantûmîre.

⁴⁵Ningî ûrîa ûmbonaga nî oonaga ûrîa waantûmîre.

⁴⁶Nî ni weerû, na ndeejîre nthîgûrûûne nîkenda muntû wonthe ûrîa ûkambîtîkia atîgatuure muunduune.

⁴⁷Muntû wonthe akëeja kwigua nteto ciaakwa na akarega gûciîtîkia, tî ni nkamûgambithia nîûntû nteejîre kûgambithia nthîgûrû îndî ndeejîre kûmîonokia.

⁴⁸Muntû wonthe ûrîa ûndegaga na akarega gwîtîkia nteto ciaakwa arî na wa kûmûgambithia. Nteto îrîa mbarîîtie nîcio îkamûgambithia ntukû ya mûthia.

⁴⁹Ûûni ntîarîtie na bwaakwa ningwa îndî Baaba ûrîa waantûmîre nîwe ûmbîrîte ûrîa mbwîrîte kuuga, na jarîa mbwîrîte kwaria.

⁵⁰Ni nî mbijî atî Waatho bwaawe nîbu bûreetaga ûtûûro bwa kenya na kenya. Tontû bûû, mantû jarîa nkwaria, nî jarîa Baaba ambîrîte mbarie.”