Read KIMERU BIBLE PROTESTANT EDITION Joh 13 Bible Online

Joh 13 - KIMERU BIBLE PROTESTANT EDITION bible

Joh 13

¹Kûrî ntukû îmwe mbere ya thigûûnkû ya Pasaka îkinya, Jesû nî aamenyere atî îgiita rîaawe rîa kuuma nthîgûrûûne acoka kwa Îthe rîgûkinya. Nî aarî akwenda antû barîa baarî baawe gûkû nthîgûrûûne na arabeenda mwanka mûthia.

²Jesû na aritwa baawe nî baarîjaga biakûrîa bia ûgoro. Nkoma aarî agwîkîra Judasi Iskarioti, mûtaana wa Simioni, îthûgaanio rîa gûkunyanîra Jesû.

³Jesû nî aijî atî Îthe nî aamûnenkerete into bionthe. Ningî nî aijî atî aaumîte kwa Mûrungu na nî aacokeete kwa Mûrungu.

⁴Tontû bûû, nî ookîrîre na ararita rwambambio na aracioga taurû kauna.

⁵Rîu areekîra rûûjî karaîîne na arambîrîria kûthambia aritwa baawe magûrû na kûjanyaaria na taurû îrîa aaciogeete.

⁶Agûkinya kîrî Peterû, Peterû aramûûria, “Mwathani, Ka ûkwenda kûnthaambia magûrû?”

⁷Jesû aramûcokeria, “Nandî ûtîkûmenya ûrîa nkûthithia îndî ûgaciûra nyumeene.”

⁸Peterû aramwîra, “Gwe ûtîkoronthaambia magûrû!” Jesû aramûcokeria, “Këethîra ntîkûthambia magûrû, ûtîîthîrwa ûrî na ngwatanîro naani kaîrî.”

⁹Simioni Peterû aramwîra, “Mwathani, nthaambia magûrû na tî magûrû akî, îndî nthaambia kinya njara na mûtwe.”

¹⁰Jesû aramwîra, “Muntû wonthe ûrîa ûthambîte, atî na bata ya kûthamba kaîrî tiga magûrû akî, nîûntû nî atheri mwîrî junthe. Buî bûrî babatheru, îndî tî bwinthe.”

¹¹Nîkwîthîrwa Jesû nî aijî ûrîa ûkamûkunyanîra nî augîre: “Buî bûrî babatheru îndî tî bwinthe.”

¹² Rîrîa aathirîrie kûbathaambia magûrû na eekîra rwambambio rwaawe kaîrî nî aakarîre nthî na arabeera, “Nî bûgûciûra ûrîa ndabûthithîria?

¹³Buî bûmbîtaga Mûritani na bûkambîta Mwathani, na nî buugaga ûûma, nîûntû ndî we.

¹⁴Këethîra ni Mwathani na Mûritani weenu nkûbûthaambia magûrû, kinya buî no mwanka bûthaambanagie magûrû.

¹⁵Nîkwîthîrwa ni ndathithia ûu îrî ngerekano nîkenda kinya buî bûthithagia ûu ndaabûthithîria.

¹⁶ Ga nkûbwîra na mma atî, nthûûmba tî înene nkûrûki ya mwathi waayo, na mûtûmwa tî ûmûnene nkûrûki ya ûrîa ûmûtûmîte.

¹⁷Tontû nî bwijî mantû jaja, nî bûtharimi këethîra bûkajathithagia.

¹⁸ “Tî bwinthe nkwarîîria nîûntû nî mbijî barîa nthuurîte. Îndî ndauga ûu nîkenda Maandîko jaja joojûra: ‘Ûrîa waarîre mûgaate amwe naani akûngarûka.’

¹⁹Ndîbwîra mantû jaja nandî mbere ya jakarîka nîkenda rîrîa jagakarîka bwîtîkia atî ni nî ni we.

²⁰ Ga nkûbwîra na mma atî, muntû wonthe ûrîa ûgwataga muntû ûrîa ntûmîte ûgeni, nî ni agwataga ûgeni. Ningî ûrîa ûngwataga ûgeni nî ûrîa waantûmîre agwataga ûgeni.”

²¹Rîrîa Jesû aaugîre mantû jau, nî aathangîkîre mono nkoroone na arauga carûrûkû atî “Ga nkûbwîra na mma atî, ûmwe weenu agankunyanîra!”

²²Aritwa nî baateganîre barigari mono nîûntû bataamenyaga ûrîa augagîra.

²³Mûritwa ûmwe, ûrîa Jesû eendeete mono, nî aakarîre nthî akuî na Jesû.

²⁴Rîu Peterû aramweneria na aramwîra, “Mûûrie ûrîa akuugîra.”

²⁵Tontû bûû, mûritwa ûu areetaîta akuî na Jesû na aramûûria, “Mwathani, nûû?”

²⁶Jesû aramûcokeria, “Nî ûrîa nkanenkeeria kîng'enyua kîa mûgaate nyuma ya kûjûtombeka mpakûriine.” Rîu arajûkia mûgaate na arajûtombeka mpakûriine na aranenkeeria Judasi, mûtaana wa Simioni Iskarioti.

²⁷Judasi akûjûkia kîng'enyua kîu Nkoma aramûtonya. Rîu Jesû aramwîra, “Ûrîa ûkwenda kûthithia, nthiî ûthithie na mpwîî!”

²⁸Gûtî we kîrî barîa baarîjanagîra na Jesû waamenyere kîrîa gîatûmîre amwîra ûu.

²⁹Tontû Judasi nîwe weekaga mbeecha, bamwe baao nî baathûgaanîrie atî Jesû nîka aamwîraga akagûre into birîa biendekanaga thigûûnkûûne îîu kana akaee nkîa gîntû.

³⁰Tontû bûû, Judasi akûthiria kûrîa kîng'enyua kîrîa aanenkeerwe araumagara ntûti. Îgiita rîu kwaarî ûtukû.

³¹Rîrîa Judasi aumagarîre, Jesû nî aaugîre, “Nandî Mûtaana wa Muntû nî akumithîtue, na Mûrungu nî akumithîtue ndeene yaawe.

³²Këethîra Mûrungu nî akumithîtue ndeene ya Mûtaana, Mûrungu kinya we agakumithia Mûtaana ndeene yaawe wengwa, na akamûkumithia ntûti.

³³ “Aana baakwa, ndî naabuî kagiita gagakai. Bûgancwaa; îndî ka mbwîre o ta ûrîa ndeerîre atongeeria ba Ayahudi: ‘Kûrîa mbîtîte bûtîûmba kwîja.’

³⁴ Nî nkûbûnekera rîathana rîrîerû: Endanageni. O muntû nî eendage ûngî o ta ûrîa ni mbwendeete.

³⁵Bwaakara bwendeene nîrîo antû bonthe bakamenya atî buî bûrî aritwa baakwa.”

³⁶Simioni Peterû nî aamûûrîrie, “Mwathani, nîkû wîtîte?” Jesû nawe aramûcokeria, “Kûrîa mbîtîte, ûtîûmba kûnthingata nandî, îndî ûkanthingata nyumeene.”

³⁷Peterû aramûûria, “Nîkî ntîûmba gûkûthingata nandî? Ni nî ncieejanîte kûûragwa nîûntû bwaaku!”

³⁸Jesû aracokia, “Ûrî na mma nî ûcieejanîte kûûragwa nîûntû bwaakwa? Ga ngûkwîra na mma atî, nchamba ya ngûkû îtîgamba, ûtîrankaana maita jathatû.”