Read KIMERU BIBLE PROTESTANT EDITION Joh 14 Bible Online

Joh 14 - KIMERU BIBLE PROTESTANT EDITION bible

Joh 14

¹Jesû arabeera, “Bûkathangîkeeni nkoroone cieenu. Îtîkieni Mûrungu na kinya ni bûmbîtîkie.

²Kwa Baaba kûrî na nyomba inyingî, naani ndeeta kûthuranîra arîa bûgakaraga. Këethîra tî u, ndîngîbwîra.

³Rîrîa ngeeta na nthuranîre antû arîa bûgakaraga, nkeeja kaîrî na mbûjûkie nîkenda arîa ndî kinya buî bûkaraga o.

⁴Nî bwijî njîra ya gwîta kûrîa mbîtîte.”

⁵Toma aramûûria, “Mwathani, tûtîkûmenya kûrîa wîtîte. Nîatîa tûkoomba kûmenya njîra?”

⁶Jesû aramwîra, “Ni nî ni njîra na ûûma na ûtûûro. Gûtî muntû wîîjaga kîrî Baaba atîkûrûkîîrîte kîrî ni.

⁷Këethîrwa nî bûmbijî, kinya Baaba bwamûmenya. Kuuma nandî bûkûmûmenya na bûkûmwona.”

⁸Filipû aramwîra, “Mwathani, twonie Abaagu, naatuî tûkang'anîrwa.”

⁹Jesû aramwîra, “Filipû, nî nkarîte naabuî îgiita rîrîraaja îndî gwe ûtîmbijî? Muntû wonthe ûrîa ûmboneete, nî ooneete kinya Baaba. Nîkî ûkuuga, ‘Twonie Abaagu?’

¹⁰Ka ûtîgwîtîkia atî ni ndî ndeene ya Baaba na Baaba arî ndeene yaakwa? Nteto irîa nkûbwîra ntîgûciuga na bwaakwa ningwa. Nî Baaba ûrîa ûtûûraga ndeene yaakwa nîwe ûkûrita ngûgî ciaawe.

¹¹Mbîtîkieeni nîûntû ndî ndeene ya Baaba na Baaba arî ndeene yaakwa, kana bûmbîtîkie nîûntû bwa mantû jarîa nthithîtie.

¹²Ga nkûbwîra na mma atî, ûrîa ûmbîtîkagia akathithagia mantû jarîa nthithagia, na jangî jamanene nkûrûki ya jau nîûntû ndeeta kîrî Baaba.

¹³Ûntû bûrîa bûnthe bûkaromba riîtweene rîaakwa nkabûthithia nîkenda Baaba akumithua ndeene ya Mûtaana.

¹⁴Kîonthe kîrîa bûkaromba riîtweene rîaakwa, nkathithia.

¹⁵“Këethîra nî bûmpendeete, bûkathîkagîra maathana jaakwa.

¹⁶Naani nkaaromba Baaba, nawe akabûtûmîra Mûeejani kîrîra ûngî, ûrîa ûgatûûra naabuî kenya na kenya.

¹⁷Mûeejani kîrîra ûu nîwe Roho wa mma ûrîa nthîgûrû îtîûmba gwîtîkîra nîûntû îtîûmba kûmwona kana kûmûmenya. Îndî buî nî bûmwijî nîûntû nî atûûraga amwe naabuî na akeethîrwa arî ndeene yeenu.

¹⁸“Ntîbûtiga ja twaana tûkuîri nî aciari, ngacoka kaîrî kîrî buî.

¹⁹Nyuma ya kagiita gagakai, nthîgûrû îtîmbona kaîrî îndî buî bûkamboona. Tontû ni ndî mwoyo, kinya buî bûgatûûra mwoyo.

²⁰Rîrîa ntukû îîu îgaakinya nîrîo bûkamenya atî ni ndî ndeene ya Baaba, naabuî bûrî ndeene yaakwa, naani ndî ndeene yeenu.

²¹Ûrîa waathîkagîra maathana jaakwa na akajathingata, ûu nîwe ûmpendeete. Nawe ûrîa ûmpendeete nî eendagwa nî Baaba, naani nkamwenda, na ncionanie kîrî we.”

²²Judasi, îndî tî Judasi Iskarioti, aramûûria, “Nîatîa ûgaacionania kîrî tuî na tî kîrî nthîgûrû?”

²³Jesû aramûcokeria, “Ûrîa wonthe ûmpendeete akaathîkîra rûteto rwaakwa na Baaba akamwenda na twîje kîrî we na tûtûûre nawe.

²⁴Muntû wonthe ûrîa ûtîmpendeete atîathîkagîra nteto ciaakwa. Rûteto rûrîa bwaigua tî rwaakwa, îndî nî rwa Baaba ûrîa waantûmîre.

²⁵“Ndîbwîra mantû jaja îgiiteene rîrî ndî amwe naabuî.

²⁶Mûeejani kîrîra tawe Roho Ûmûtheru, ûrîa Baaba agaatûma ndeene ya riîtwa rîaakwa, akaabûritanaga mantû jonthe na abûririkanagie jonthe jarîa mbwîrîte.

²⁷“Nî nkûbûtigîra thîîrî, nî thîîrî yaakwa nkûbûaa. Îtîkari ta îrîa nthîgûrû îeejanaga. Bûkathangîkeeni nkoroone kana bwigua ûguaa.

²⁸Nî bwaigîrue nkîbwîra atî ‘Nî mbîtîte, îndî ngacoka kîrî buî.’ Këethîra nî bûmpendeete bûrîngîgwîrua, nîkwîthîrwa mbîtîte kîrî Baaba, nîûntû we nî ûmûnene nkûrûki yaakwa.

²⁹Ndabwîra mantû jaja mbere ya jakarîka nîkenda rîrîa jagakarîka bwîtîkia.

³⁰Ntîîta na mbere kwaria naabuî nîûntû mwathi wa nthîgûrû îîjî nî eejîte. We atî na inya ya kûmbatha.

³¹Îndî nthithagia mantû jonthe kûringana na ûrîa Baaba ambathîte nîkenda nthîgûrû îmenya atî nî mpendeete Baaba. Rûngameni, twîte tuume aja!”